بەلگىلى اقىن، قازاق ءسوز ونەرىنىڭ مايتالمانى، ەتنوگراف قاجىتاي ءىلياس ۇلى دۇنيەدەن ءوزدى. كونەنىڭ كوزىندەي بولىپ، بۇگىنگى ۇرپاققا اسىلدىڭ ءسوزىن جەتكىزگەن مارقۇمنىڭ قازاق ادەبيەتى مەن مادەنيەتىنە قوسقان ۇلەسى ۇشان-تەڭىز. قاجەكەڭنىڭ جاتقان جەرى ءجانناتتا، توپىراعى تورقا بولسىن!

وۋ، قاجەكەم، قاجەكەم!.. سەندەي ەرلەر بار ما، ەكەن؟! بەسكۇندىك مىنا عۇمىردا؟! سەندەي دە ءبىر سەرىسى بۇل قازاقتا بار ما ەكەن!.. ماڭگىلىلەۋ مىنا عۇمىردا سەرىلەرگە قازا اتقان قۇدايىم مەنىڭ سوقىر ما؟! جامبىلعا بەرگەن ءجۇز جاستى قيماعان ول دا پاقىر ما؟! نە... نە دەيىن، قاجاعا! ارتىڭدا قالعان ۇرپاعىڭ... رۋدا-كەن تاتەم، جۇرناعىڭ "قاجىتايىم، قايدا؟" دەپ سۇراسا، ولارعا نە دەيىن؟!. جالماۋىز مىنا دۇنيەڭ كوز جاسىنا تويار ما؟.. بوتاسى ولگەن بوز ىنگەن بوزارىپ ءبىر سولار ما؟!. قۇداي اتقان عۇمىرىڭ!.. جىلادىم-اۋ، جىلادىم!.. جالعىز اكەمنەن قالدىرعان كوزدىڭ جاسىن بۇلادىم!!!