الەۋمەتتىك جەلىدە سىنعا ۇشىراعان وقۋ قۇرالىنىڭ تاعى ءبىر اۆتورى سەرىكبولسىن دۇيسەمباي حالىقتان كەشىرىم سۇرادى. بۇل تۋرالى اۆتور ءوزىنىڭ Facebook-تەگى پاراقشاسىندا جازدى، دەپ حابارلايدى Qamshy.kz اقپارات اگەنتتىگى.

نازاربايەۆ زياتكەرلىك مەكتەبىنە تۇسۋشىلەرگە ارنالعان تەست جيناعىندا مس سايلاۋبەكتىڭ ءومىربايانى جازىلىپ، رەپەر تۋرالى سۇراق قويىلعان.  الەۋمەتتىك جەلى قولدانۋشىلارى بۇعان جاپپاي نارازى بولىپ جاتىر.

Qamshy.kz اقپارات اگەنتتىگى كىتاپ اۆتورلارىنىڭ بىرىنە حابارلاسىپ، ءىستىڭ انىق-قانىعىنا كوز جەتكىزگەن بولاتىن. قازاق ءتىلى ءپانىنىڭ ءمۇعالىمى قازبەك ساعيدولدا ءوز سوزىندە سايلاۋبەكتىڭ ەسىمى كىتاپقا بايقاۋسىزدا ەنىپ كەتكەنىن ايتتى.

وقۋ قۇرالىنىڭ ەكىنشى اۆتورى، جاس عالىم سەرىكبولسىن دۇيسەمباي دا قاتەلىك كەتكەنىن مويىنداپ، كوپشىلىكتەن كەشىرىم سۇرادى. سونىمەن قاتار ول ءبىر قاتەلىك ءۇشىن جاستاردى سىناي جونەلگەن قازاقتارعا رەنىش ءبىلدىردى.

- تالاي 100 مىڭ دانامەن شىعىپ جۇرگەن، ىشىندە قانشاما قاتەلىكتەر ءورىپ جۇرگەن وقۋلىقتاردى دا كوزىمىز كورىپ ءجۇر. ال ءبىزدىڭ رەسمي ەمەس، تەك ەمتيحانعا دايىندىققا ارنالعان قازاق تىلىنەن بار-جوعى 100 دانا تەستتەر جيناعىنىڭ ىشىندەگى 5-6 جولىمىز قانشاما بالاعات، عايبات سوزدەرگە الىپ كەلدى. ءبىراق، بۇل جولدار كەلەسى باسىلىمدا اۋىستىرىلىپ، تۇزەتىلىپ ۇلگەرگەن ەدى. جانە بۇل تەست جيناعى ەشقانداي رەسمي بەكىتىلمەگەن، مەكتەپ باعدارلاماسىنا ەنبەگەن.

مەن بۇنى اقتالۋ ءۇشىن دە، ماقتانۋ ءۇشىن دە جازىپ وتىرعان جوقپىن. تەك ءبىزدىڭ قوعامنىڭ كەيبىر “بەلسەندىلەرى” ماسەلەنىڭ ءمان-جايىنا بارىپ الماي، تەك الىپ-قاشپا اڭگىمەگە ەرىپ، جەردەن جەتى قويان تاپقانداي جارىسا بولىسە كەتەتىنىنەن الەم كوشىنە ىلەسۋدىڭ اۋىلى الىس پا دەپ قالدىم.تيتتەي “قاتەلىگى” ءۇشىن ءوز ۇلىن وزەگىنەن تەپكەندەي كورىنگەن ەلگە ەندى ورالعىڭ دا كەلمەي قالادى ەكەن. ەلدەن كەشىرىم سۇرادىم. ەل ءۇشىن "قۇربان بولۋعا دايىنمىن". وعان رۋحىم جەتەدى، - دەپ جازدى سەرىكبولسىن دۇيسەمباي ءوز پاراقشاسىندا.