جەتىمدەر ۇيىندە بىرنەشە جىل بويى بالالار زورلانىپ كەلگەنى تۋرالى اقپارات كەلىپ تۇسكەننەن كەيىن چەليابينسك وبلىسىنىڭ تەرگەۋشىلەرى قىلمىستىق ءىس قوزعادى.

تەرگەۋ كوميتەتىنىڭ باسپا ءسوز قىزمەتىنىڭ حابارلاۋىنشا، چەليابينسك وبلىسىنىڭ تۇرعىنى «14-كە تولماعان بالانى زورلادى» دەگەن ايىپپەن قاماۋعا الىندى.

اتالمىش قىلمىستىق ءىس بويىنشا جەتى ادام جابىرلەنۋشى رەتىندە تىركەلدى. «ءوز جۇمىسىنا نەمقۇرايلى قارادى» دەگەن ايىپپەن جەتىمدەر ءۇيىنىڭ قىزمەتكەرلەرى جاۋاپقا تارتىلۋى مۇمكىن. 

جەرگىلىكتى باق-تىڭ حابارلاۋىنشا، جەتىمدەر ءۇيى چەليابينسكتەن 40  شاقىرىم جەردە ورنالاسقان. وندا ينتەللەكتۋالدىق دەڭگەيىندە اقاۋى بار بالالار تاربيەلەنەدى.

جەتىم بالالاردىڭ بىرنەشە جىل بويى زورلانىپ كەلگەنى تۋرالى اقپارات باق-تا جاريالانعاندا بىرنەشە انا چەليابينسكتەگى بالالار ۇيىنەن اسىراپ العان بالالاردىڭ زورلىق-زومبىلىق كورگەنىن جۋرناليستەرگە ايتىپ بەردى.

- بالامنىڭ جازدا قالاي زورلانعانىن ەستىگەندە توبە شاشىم تىك تۇردى. سەنە المادىم، - دەيدى 14 جاستاعى بالانى اسىراپ العان جەرگىلىكتى تۇرعىن "ايف-چەليابينسك" باسىلىمىنا.

تاعى بىرنەشە انا اسىرىپ العان بالالارىنىڭ زورلىق كورگەنىن جانە ولاردى بالىق اۋلايمىز دەپ كولگە الداپ اپارىپ، زورلىق كورسەتىپ، سوققىعا جىققانىن ايتىپ بەردى.

تەرگەۋشىلەر زورلاۋ ايىبى بويىنشا قاماۋعا الىنعان كۇدىكتىنىڭ ەسىمىن قۇپيادا ساقتاپ وتىر. ونىڭ جاسى  51-دە ەكەنى عانا بەلگىلى.

اتا-انالار جەتىمدەر ءۇيىنىڭ قىزمەتكەرلەرىن دە جاۋاپقا تارتۋ كەرەك ەكەنىن ايتادى.

- مەن بالالاردىڭ زورلىق كورمەگەنىنە 200% سەنىمدىمىن، - دەيدى مەكەمە باسشىسى.

جەرگىلىكتى تۇرعىنداردىڭ ايتۋىنشا، ينتەرنات ايماعىنا كىرۋ وڭاي. داربازا ۇنەمى اشىق  تۇراتىنىن ايتادى.

جەتىمدەر ۇيىندە تەكسەرۋ جۇرگىزىلدى. سونىڭ ناتيجەسىندە، بىرنەشە زاڭ بۇزۋشىلىق تىركەلدى. ءقازىر سوتقا دەيىنگى تەكسەرۋ جۇمىستارى جۇرگىزىلىپ جاتىر. تەرگەۋشىلەر زورلانعاندار مەن وسى ىسكە قاتىستى ايىپتىلاردىڭ سانى ارتۋى مۇمكىن ەكەنىن جاسىرمايدى.