وتاندىق كاسىپكەر بالالاردى يماندىلىققا باۋليتىن قۋىرشاق جاساپ شىعاردى، دەپ حابارلايدى Qamshy.kz اقپارات اگەنتتىگى. توعىز اي بۇرىن بۇل ءىستى قولعا العان باعدات توقتاربەكوۆ كۇنۇزاق تەلەديدار مەن تەلەفونعا ۇڭىلەتىن بۇلدىرشىندەرگە پايدالى دۇنيە ويلاپ تابۋدى ماقسات تۇتقان. قۋىرشاقتىڭ ەسىمى – فاتيما.
جوبا اۆتورى قۋىرشاقتى شىعارماي تۇرىپ، ونىڭ قانداي سوزدەر ايتاتىنىن ماماندارمەن اقىلداسقان. الماتى قالاسى ءدىن ىستەرى جونىندەگى باسقارماسى كاسىپكەردىڭ نيەتىن قۇپتاپ، «شاريعاتقا قاراما-قايشىلىق جوق» دەگەن سەرتيفيكات بەرىپتى.
- ماقساتىم – بالالاردىڭ ءدىني ساۋاتىن اشۋ. ول ماقساتىمدى كىشكەنتاي بالالار قىزىعىپ وينايتىن قۋىرشاقتار ارقىلى جۇزەگە اسىرماقپىن. ادەتتە بۇلدىرشىندەر تەلەفونمەن ويناپ ءجۇرىپ، ءتۇرلى اندەردى جاتتاپ الادى. سول سەكىلدى قۋىرشاقپەن ويناپ ءجۇرىپ، يمان شارتتارىن دا جاتتاپ السا دەگەن نيەت بولدى. ءدىني باسقارمامەن اقىلداستىم. ءبارىن زەرتتەپ، سارالاپ، ءدىني باسقارمانىڭ ءپاتۋاسىن الىپ، بىلتىر جاساپ شىعاردىق، - دەدى باعدات توقتاربەكوۆ Qamshy.kz تىلشىسىنە.
قۋىرشاقتار نە ۇيرەتەدى؟
كاسىپكەردىڭ ايتۋىنشا، قۋىرشاق ەكى ءتۇرلى نۇسقادا جاسالعان.
ءبىرىنشىسى مۇسىلماندار بىلۋگە ءتيىس باستى سۇراقتاردىڭ جاۋابىن ۇيرەتەدى. بۇعان قوسا، اللا تاعالانىڭ 99 كوركەم ەسىمىن جاتتاتادى.
ەكىنشى نۇسقاسى قۇرانان سۇرەلەر وقيدى جانە اللاعا ماداق سوزدەردى ايتىپ، ماعىناسىن تۇسىندىرەدى.
اراب تىلىندە ونعا دەيىن سانايتىن تاعى ءبىر نۇسقاسى بار. الايدا وعان سۇرانىس از. سول سەبەپتى كوپ شىعارىلمايدى.
قۋىرشاقتاردىڭ قۇنى قانشا؟
قۋىرشاق فاتيما رەسەيلىك ماتەريالداردان جاسالعان، ال ۇستىندەگى كيىمدەرى قازاقستاندىق ماتادان تىگىلەدى. باعداتتىڭ سوزىنشە، قۋىرشاقتىڭ ساپاسى جاقسى ءارى دەنساۋلىققا زالالسىز.
ال باعاسى ماتاسىنا قاراي باعالانادى ەكەن. ماسەلەن، ءتۇرلى-تۇستى تاستارمەن كومكەرىلىپ، ءساندى كيىنگەن قۋىرشاقتىڭ باعاسى – 14 800 تەڭگە. بۇل قۋىرشاقتار كوبىنە سىيلىق تۇرىندە ساتىلادى. ۇزىندىعى – 43 سم. ال كيىمى تاستارسىز، قاراپايىم بولسا، ونداي قۋىرشاقتىڭ باعاسى – 10 800 نەمەسە 11 800 تەڭگە.
- كيىمىندە ايىرماشىلىق بولعانىمەن، قۋىرشاقتاردىڭ ايتاتىن، ۇيرەتەتىن دۇنيەسى ءبىر، - دەيدى كاسىپكەر.
قۋىرشاقتاردى كوبىنەسە نامازحان ازاماتتار ساتىپ الاتىنى ءسوزسىز. الايدا، باعداتتىڭ ايتۋىنشا، كەيبىر ادامدار «ءوزىم ناماز وقىماسام دا، بالام ءبىلىپ قالسىن» دەگەن ويمەن تاپسىرىس بەرەدى ەكەن.
- ۇيىڭىزدە قاسيەتتى قۇران اياتتارى ايتىلىپ تۇرسا، ءسىزدىڭ وتباسىڭىزدان شايتان ىرگەسىن اۋلاق سالادى، - دەيدى كاسىپكەر.
باعدات توقتاربەكوۆتىڭ ەندىگى جوسپارى – ۇل بالالارعا ارناپ باتىر ىسپەتتى قۋىرشاق جاساپ شىعارۋ.
