بۇگىنگى ۇكىمەت وتىرىسى تازا قازاق تىلىندە ءوتتى، دەپ جازادى Qamshy.kz اقپارات اگەنتتىگى.
مەملەكەت باسشىسىنىڭ كەشەگى سوزىنەن ۇكىمەت مۇشەلەرى قورىتىندى شىعارعان سياقتى. بۇعان دەيىن تەك ورىسشا شۇلدىرلەپ، كەيدە ەكى ءتىلدى ارالاستىرىپ ويران-بوتقا جاسايتىن شەنەۋنىكتەر بۇگىن جاپپاي قازاقىلانىپ شىعا كەلدى. پرەمەر-مينيستر باقىتجان ساعىنتايەۆ باستاپ بەرگەن ءۇردىستى مينيسترلەر ءىلىپ اكەتىپ، باستان-اياق مەملەكەتتىك تىلدە بايانداما جاسادى. ءبىرىنشى بولىپ ءسوز العان ينۆەستيسيالار جانە دامۋ ءمينيسترى جەڭىس قاسىمبەك تازا قازاقشا سويلەدى. ەنەرگەتيكا ءمينيسترى قانات بوزىمبايەۆ تا پرەزيدەنتتىڭ پارمەنىن جەرگە تاستامايتىنىن كورسەتتى.
وبلىس اكىمدەرى دە ەلباسىنىڭ اماناتىنا ادالدىق تانىتىپ، ءوز باياندامالارىن قازاق تىلىندە وقىپ بەردى. اۋىل شارۋاشىلىعى ۆيسە-مينيسترى ارمان ەۆنييەۆ، «بايتەرەك» حولدينگىنىڭ، «قازاقينۆەست» كومپانياسىنىڭ باسشىلارى دا قازاقشا سويلەدى.
قاراپ وتىرساق، قازاقشاعا ەشقايسىسى قارا جاياۋ ەمەس. ەجىكتەسە دە، قينالسا دا، بارلىعى دەرلىك تىرىسىپ باقتى. «توقپاعى مىقتى بولسا، كيىز قازىق جەرگە كىرەدى» دەگەن وسى ەكەن عوي. ەلباسىنىڭ ءبىر اۋىز تاپسىرماسىنان شىققان ناتيجە بۇل.
نەگە ەكەنىن قايدام، اقمولا وبلىسىنىڭ اكىمى مالىك مىرزالين بايانداماسىن قازاق تىلىندە باستاپ كەلىپ، سوڭىندا ورىسشاعا ويىسىپ كەتتى. ءبىلىم جانە عىلىم ءمينيسترى ەرلان ساعادييەۆ تە ءسويتتى. ءسوز لامىنە ءمان بەرسەڭ، ءبارى دۇرىس، ءبارى ورىندى. پرەمەر-مينيستردەن اۋىل مەكتەپتەرىن كومپيۋتەرمەن، ينتەرنەتپەن قامتاماسىز ەتۋدى سۇراپ وتىر. ءبىراق ورىسشا قوسپاسا ءسوزىنىڭ ءدامى كىرمەي مە، ايتەۋىر بايانداماسىنىڭ ءبىر بولىگىن «ۇلتارالىق تىلدە» وقىدى.
«ۇلتارالىق ءتىل» دەگەننەن شىعادى. وسى كۇنگە دەيىن ورىس تىلىنە قاجەتتى قاتىناس قۇرالى دەپ قاراپ كەلدىك. كوپشىلىك جۇرتقا تۇسىنىكتى بولعان سوڭ، امال جوق، ۇندەمەدىك. شەن-شەكپەندىلەردىڭ ىعىنا جىعىلىپ، قانشاما وتىرىستى ورىسشا وتكىزسە دە، باسقا شاۋىپ، توسكە ورلەمەدىك. ءقازىر جاعداي باسقاشا. ءبىرلى-جارىم ءدۇبارالار بولماسا، ەشكىم قازاقشادان ماقۇرىم ەمەس. ءتىپتى، وزگە ۇلت وكىلدەرىنىڭ دە «توبەسى تەسىك». سوندىقتان ۇكىمەت وتىرىسىنىڭ قازاقشا وتكەنىنە ءسۇيىنشى سۇراۋدىڭ ءوزى رەتسىز. بۇل – زاڭدىلىق. بۇل – مىندەت. بۇل – قالىپتى قۇبىلىس. بيلىك پەن حالىق وسىعان ۇيرەنە بەرۋى كەرەك.
