بەلگىلى قازاقستاندىق ءانشى باۋىرجان يسايەۆ 20-21 اقپان كۇندەرى اتىراۋداعى م. وتەمىس ۇلى اتىنداعى اكادەميالىق دراما تەاتردا كونسەرت قويدى. ءانشىنىڭ اتىراۋعا كەلەتىنى حالىققا الدىن الا حابارلانباعاندىقتان، ءبىرىنشى كۇنى زالدا تەك توعىز عانا كورەرمەن بولدى، دەپ جازدى Qamshy.kz اقپارات اگەنتتىگى اق جايىق گازەتىنىڭ دەرەگىن نەگىزگە الا وتىرىپ. 

ءانشىنىڭ كونسەرتىنە بيلەتتەر مەكەمەلەرگە ساتىلعان، سوندىقان قالادا حابارلاندىرۋلار ىلىنبەپتى.

كونسەرت باستالار ۋاقىتتا زالعا ادام جينالماعان سوڭ، جۇرت كەيىنگە قالدىرىلعان شىعار دەپ ويلاعان. الايدا زالدا از عانا ادام وتىرعانىنا قاراماستان ءانشى ساحناعا شىققان. 

«نە دەگەن كوپسىزدەر!» دەپ ءسوزىن باستاعان باۋىرجان يسايەۆ 1998 جىلى وڭتۇستىك قازاقستان وبلىسى تۇلكىباس اۋدانىنداعى كونسەرتىندە نەبارى ءۇش ادام جينالعانىنا قاراماستان كونسەرت وتكىزگەنىن ەسىنە الدى. «ونىڭ قاسىندا توعىز ادام اجەپتاۋىر عوي»، —  دەپ ازىلدەپ تە قويدى. باۋىرجان يسايەۆ كونسەرت بارىسىندا انىمەن عانا ەمەس، ازىلىمەن دە كورەرمەن كوڭىلىن كوتەرىپ وتىردى. ءانشى ءوزى تۋرالى دا ايتقان. 1979 جىلى شىمكەنت وبلىسىندا تۋعان ءانشى كىشى ءجۇزدىڭ تاما رۋىنان ەكەن. بۇگىندە ول ءۇش قىزدىڭ اكەسى.