بۇگىن قازاقستاندىقتار ءۇشىنشى رەت العىس ايتۋ كۇنىن اتاپ وتەدى، دەپ حابارلايدى Qamshy.kz اقپارات اگەنتتىگى.

العىس ايتۋ كۇنى – كۇردەلى زاماندا يىق تىرەسە بىرگە ەڭسەرىپ، قىسقا مەرزىم ىشىندە ەلباسىنىڭ باسشىلىعىمەن تاۋەلسىز قازاقستاندى قۇرۋ جولىندا ايانباي تەر توككەن ەلىمىزدىڭ بارلىق ازاماتتتارىنىڭ بىر-بىرىنە قۇرمەت بىلدىرەتىن كۇن.

2016 جىلعى 14 قاڭتاردا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ قازاقستان حالقى اسسامبلەياسىنىڭ قۇرىلعان كۇنى 1 ناۋرىزدى ەلىمىزدە العىس ايتۋ كۇنى دەپ جاريالاپ، № 173 جارلىققا قول قويعان بولاتىن.

سوندا العىس ايتۋ كۇنىنىڭ ماڭىزىن ەلباسى بىلاي تۇسىندىرگەن:

«قازاقستان حالقى اسسامبلەياسى قۇرىلعان كۇن – 1 ناۋرىزدى جىل سايىن بارلىق ەتنوستاردىڭ ءبىر بىرىنە جانە مەيىرباندىق تانىتىپ، ول ادامداردى ءوز تۋعانىنداي قابىلداعان قازاقتارعا العىس ايتۋ كۇنى رەتىندە اتاپ ءوتۋ ادىلەتتى بولار ەدى. ول كۇن ءبىزدى بۇرىنعىدان دا گورى جاقىنداستىرا تۇسپەك. بۇل كۇن مەيىرىمدىلىكتىڭ، بۇكىل قازاقستاندىقتاردىڭ ءبىر بىرىنە دەگەن دوستىعى مەن ماحابباتىنىڭ جارقىن مەرەكەسى بولا الار ەدى»، – دەگەن بولاتىن.

بۇعان قوسا مەرەكەنىڭ قازاقستان قوعامىنداعى سەنىم مەن دوستىقتى نىعايتا تۇسەتىنىنە سەنىم بىلدىرگەن.

العىس ايتۋ كۇنى بار بولعانى ءۇشىنشى مارتە اتالىپ ءوتىپ جاتسا دا، ەل ءۇشىن ايتۋلى ىزگى داستۇرگە اينالىپ كەلەدى. وسى ورايدا، بۇگىن استاناداعى بەيبىتشىلىك جانە كەلىسىم سارايىندا ق ر مەملەكەتتىك حاتشىسى گۇلشارا ءابدىحالىقوۆانىڭ قاتىسۋىمەن «العىس ايتۋ كۇنىنە» وراي قازاقستان حالقى اسسامبلەياسىنىڭ سالتاناتتى شاراسى وتەدى. ال ءدال بۇگىن ايتۋلى داتاعان وراي، الماتى شاھارىنداعى ۇلتتىق كىتاپحانا اشىق ەسىك كۇندەرىن باستاپ، دوستىق ۇيىندە «قازاقستان - بىرلىك پەن تاتۋلىقتىڭ مەكەنى» اتتى شارا ارقىلى كونسەرتتىك باعدارلامامەن بىرگە قولونەر تۋىندىلارىنىڭ كورمەسى مەن الماتى قالاسىنىڭ ەتنومادەني بىرلەستىكتەرىنىڭ ۇلتتىق اسپازدىق ونەرىنىڭ كورمەسىن ۇيىمداستىرماق.