شقو-داعى اياگوز قالاسىندا ءۇيىن سۋ باسقان بالانىڭ اكەسىنە ايتقان سوزدەرى حالىقتىڭ جۇرەگىن ەلجىرەتتى. «ەشتەڭە ەتپەيدى، اكە، جوندەپ الامىز، ءيا؟»، - دەپ اكەسىن جۇباتپاق بولعان بالانىڭ ۆيدەوسىن Instagram جەلىسىندەگى oskemenlive پاراقشاسى جاريالادى.
ايتا كەتەيىك، وبلىس ورتالىعىندا ەكى كۇن بويى تولاسسىز جاۋعان قار ارالاس جاڭبىردىڭ سالدارىنان قالانىڭ ءبىرقاتار اۋدانى مەن كوشەلەرىن سۋ باسقان. سونىڭ سالدارىنان وسكەمەن قالاسىنان بولەك، ۇلان، اياگوز، گلۋبوكوە، زىريان اۋداندارى مەن ريددەر قالاسىندا بىرنەشە ءۇيدى سۋ الدى. بۇعان قوسا، اپاتتان كراسين كەنتىندەگى كوجەدۋب جانە پۋشكين كوشەلەرى بويىندا ورنالاسقان ءتورت ءۇيدىڭ تۇرعىندارى زارداپ شەكتى. جەرگىلىكتى تۇرعىنداردىڭ ايتۋىنشا، مۇنداي جاعدايدىڭ ورىن الۋىنا وسى ماڭداعى ارىق ارناسىنىڭ ءجوندى ءارى ۋاقتىلى تازالانباۋى سەبەپ بولعان. ناتيجەسىندە ارىق سۋى ارناسىنان اسىپ، ىرگەدەگى اۋلالار 40 سانتيمەترلىك سۋ استىندا قالعان.
كۇنى كەشە وبلىس اكىمى دانيال احمەتوۆ وسكەمەن قالاسىنىڭ سۋ باسقان اۋداندارىندا بولىپ، تابيعي اپاتتان زارداپ شەككەن تۇرعىندارمەن كەزدەسىپ قايتقان بولاتىن. ايماق باسشىسى شاھاردىڭ ىرگەسىندەگى كراسين كەنتى مەن ابلاكەتكا ىقشاماۋداندارىندا قارعىن سۋ باسقان جەكە ۇيلەردىڭ تۇرعىندارىمەن جولىعىپ، حال-جاعدايىن ءبىلىپ قايتتى. اپاتتى جاعدايعا تابيعاتتى ەمەس، سوعان جاۋاپتى لاۋازىمدى تۇلعالاردى كىنالاعان ەدى.
پىكىر قالدىرۋ