الماتىنىڭ 49،5 مىڭ تۇرعىنى جۇمىسسىز ءجۇر. بۇل تۋرالى بۇگىن وڭىرلىك كوممۋنيكاسيالار قىزمەتى حابارلادى.

الماتى قالاسىنىڭ ستاتيستيكا دەپارتامەنتىنىڭ باسشىسى ب.قارعۇلوۆتىڭ اقپاراتىنشا، 2017 جىلدىڭ 4 توقسانىندا 15 جاس جانە ودان جوعارى ەكونوميكالىق بەلسەندى حالىق (جۇمىس كۇشى) سانى 938،4 مىڭ ادامعا جەتىپ، وتكەن جىلدىڭ سايكەس كەزەڭىمەن سالىستىرعاندا 22،8 مىڭ  ادامعا (2،5%)   ءوستى. ەكونوميكالىق بەلسەندىلىك دەڭگەيى — 68،2 %.

ەكونوميكادا جۇمىسپەن قامتىلعاندار وتكەن جىلدىڭ سايكەس كەزەڭىمەن سالىستىرعاندا 22،2 مىڭ ادامعا (2،6 پايىز) ءوسىپ، 888،9 مىڭ ادامدى قۇرادى.

جۇمىسپەن قامتىلعان حالىق سانىنىڭ 820،3 مىڭ ادام نەمەسە 92،3 % جالدامالى قىزمەتكەرلەر،  68،6 مىڭ ادام  نەمەسە 7،7 % ءوز بەتىنشە جۇمىسپەن قامتىلعان حالىق سانىن قۇرادى. 

جۇمىسسىزدىق دەڭگەيى 5،3 % نەمەسە 49،5 مىڭ ادامدى قۇرادى،-دەپ اتاپ ايتتى دەپارتامەنت باسشىسى.

2017 جىلدىڭ 4 توقسانىندا 15 جاس جانە ودان جوعارى ەكونوميكالىق تۇرعىدان ەنجار حالىق سانى (جۇمىس كۇشى قۇرامىنا كىرمەيتىن) 437،5 مىڭ ادامدى قۇرادى، 2016 جىلدىڭ 4 توقسانىمەن سالىستىرعاندا 2 %-عا نەمەسە 8،7 مىڭ ادامعا وسكەنى بايقالادى.

2017 جىلدىڭ قاڭتار–جەلتوقسان ايلارىندا ءبىر قىزمەتكەردىڭ ورتاشا ايلىق اتاۋلى جالاقىسى (شاعىن كاسىپورىنداردى ەسكەرمەگەندە) الماتى قالاسى بويىنشا 188 368 تەڭگەنى قۇرادى، اتاۋلى جالاقى يندەكسى 5،5 پايىزعا ءوسىپ، ال  ناقتى جالاقى يندەكسى 98،5  پايىزدى قۇرادى.

نەعۇرلىم جوعارى جالاقى تولەنەتىن جالدامالى قىزمەتكەرلەر قارجى قىزمەتىندەگى قىزمەتكەرلەر بولىپ قالادى - 398 030  تەڭگە. 

تومەنگى جالاقىنى دەنساۋلىق ساقتاۋ سالاسىنداعى (125 428 تەڭگە) جانە  اۋىل، ورمان جانە بالىق شارۋاشىلىعى سالالارىنداعى (110 162 تەڭگە) جالدامالى قىزمەتكەرلەر الادى،-دەپ باياندادى ول.