ءتىل كۇرەسكەرى رۋزا بەيسەنبايتەگى رەداكسيامىزعا حابارلاسىپ، پاۆلودارداعى №111 قوعامدىق كولىگىندە بولعان وقيعانى ايتىپ بەردى.

— جۇرگىزۋشى اۆتوبۋسقا كىرگەن بەتتە: «وپلاتيتە  پروەزد»، - دەپ ايتتى. مەن: «قازاقشا ايتىڭىز، مەملەكەتتىك ءتىلدى ەشكىم الىپ تاستاعان جوق دەدىم»، - دەيدى پاۆلودار تۇرعىنى.

جۇرگىزۋشى بولسا ورىس تىلىندە سويلەپ، قايتادان جولاقىسىن تولەۋىن سۇراعان.

ال رۋزا بەيسەنبايتەگى كوندۋكتور قازاقشا سويلەمەسە، جولاقىسىن تولەمەيتىنىن ايتقان.

اۆتوبۋستاعى جولاۋشىلار سول ساتتە قازاقشا سويلەۋدى تالاپ ەتكەن تۇرعىنعا جابىلا كەتكەن كورىنەدى.

— جولاۋشىلار اراسىندا ورنىما جولاقىسىن تولەۋدى ۇسىنعاندار دا بولدى. مەن اقشامدى اياپ تۇرعان جوقپىن، مەملەكەتتىك ءتىلدىڭ قوعامدىق ورىنداردا ساقتالۋىن تالاپ ەتىپ وتىرمىن، - دەيدى رۋزا بەيسەنبايتەگى. 

ۋاقىت وزدىرماي رۋزا بەيسەنبايتەگى وبلىس اكىمدىگىنە حابارلاسقان. ول جەردەگىلەر ءتىل كۇرەسكەرىنىڭ  داۋىسىن ەستىگەن سوڭ تۇتقانى قويا سالعان. سودان كەيىن قالا اكىمدىگىنە تەلەفون سوققان ءتىل جاناشىرى: «ەگەر اكىمدىكتەگىلەر نەمەسە پوليسيا قىزمەتكەرلەرى  ايالدامادا الدىمنان شىقپاسا، اۆتوبۋستىڭ استىنا تۇسسەم دە، ونى توقتاتامىن»، - دەگەن.

اۆتوبۋس ايالداماعا توقتاعان كەزدە رۋزا بەيسەنبايتەگى ونىڭ الدىنا شىعىپ، جولىن بوگەگەن. جۇرگىزۋشى ءتىل كۇرەسكەرىن قورقىتپاق بولىپ، كولىكتىڭ تۇمسىعىمەن كەۋدەسىنەن اقىرىن يتەرىپتى. رۋزا اپاي ونىسىن ەلەڭ قىلماي، شىنتاعىن تىرەپ تۇرىپ العان. 5 مينۋتتان سوڭ پوليسيا قىزمەتكەرلەرى كەلىپ، ەكى جاققا دا تۇسىنىكتەمە جازدىرعان. ناتيجەسىندە، اۆتوبۋس جۇرگىزۋشىسى رۋزا بەيسەنبايتەگىنەن ورىس تىلىندە كەشىرىم سۇراپتى. 

— مەن جۇرگىزۋشىگە ايتتىم: «مەن ءسىزدى كەشىرەمىن. ءبىراق ەكى شارتىم بار: بىرىنشىدەن، كەشىرىمدى مەملەكەتتىك تىلدە سۇراۋىڭىز كەرەك؛ ەكىنشىدەن، كەلەسى جولى قوعامدىق كولىكتە قازاق تىلىندە قىزمەت كورسەتىڭىز»، - دەدىم. جۇرگىزۋشى بۇل تالابىمدى جاۋاپسىز قالدىرىپ، تەرىس بۇرىلىپ كەتتى، - دەيدى رۋزا بەيسەنبايتەگى.