اقش-تىڭ قازاقستانداعى ەلشىسى دجوردج كرول قازاقستان رەسپۋبليكاسىنىڭ مەملەكەتتىك ءتىلىن قالاي مەڭگەرىپ جۇرگەنىن ايتتى. 

«قازاق تىلىندە قۇتتىقتاۋ مەنىڭ يدەيام، الايدا ءتىلدى ەركىن مەڭگەرمەگەندىكتەن قيىن. مەن تىرىسىپ ءجۇرمىن، ماسەلەن «بۇگىن ناۋرىز كۇنى قۇتتى بولسىن، ۇلىستىڭ ۇلى كۇنى قۇتتى بولسىن، اق مول بولسىن!». بۇگىنگى مەيرامعا وراي ايتا الاتىنىم – وسى عانا. ءبىراق مەن قازاق ءتىلىن ۇيرەنۋ ءۇشىن ارنايى كۋرستارعا بارماعانمىن. بۇعان دەيىن وزبەكستانداعى ەلشى بولىپ جۇرگەنىمدە ءتىلدى ۇيرەنۋگە ۋاقىت بولعان جوق. ال وزبەكستاندا ەلشى بولماي تۇرىپ، وزبەك ءتىلىن ۇيرەنۋگە ۋاقىتىم بولدى. مەن قازاق تىلىندە وزبەك اكسەنتىمەن سويلەيمىن»، - دەدى دجوردج كرول tengrinews.kz تىلشىسىنە بەرگەن سۇحباتىندا.

ەلشىنىڭ ايتۋىنشا، ول قازاق ءتىلىن ءوزى، ەشقانداي كۋرستارعا بارماي ۇيرەنىپ ءجۇر.

«بۇگىن Facebook-تەگى پاراقشامىزدا ەلشىلىكتىڭ ناۋرىزدى تويلاپ جاتقان ۆيدەوسىن كورۋلەرىڭىز مۇمكىن»، - دەدى ول.