ەلىمىزدە اكەلەرگە ارنالعان talbesik.kz قازاق تىلىندەگى العاشقى تانىمدىق-تاربيەلىك سايت اشىلدى. جوبا جەتەكشىسى ءارى رەداكتورى ازامات بيتاننىڭ  ايتۋىنشا، وسى باعىتتاعى جۇمىستاردىڭ قاجەتتىلىگى قازىرگى قازاق قوعامى ءۇشىن وتە ماڭىزدى.

«شىنى كەرەك، «اتىپ كەتتى»، «اجىراسىپ تىنىپتى»، «ءبۇيتىپ قويعان» دەگەن سەكىلدى جاڭالىقتاردان الەۋمەت مەزى بولدى. قوعام پايدالى دۇنيەنى وقۋعا دا، تاراتۋعا دا دايىن. ونىڭ ۇستىنە بۇل اكەلەرگە ارنالعان العاشقى سايت. سوندىقتان كوپ جاۋاپكەرشىلىك جۇكتەيدى. ازىرگە جيعان-تەرگەنىمدى جۇمساپ جالعىز باستادىم. باقىلاپ، بايقاپ كورەمىن. ەگەر ۇسىنعان دۇنيەلەرىم وقىرمان تاراپىنان وڭ قابىلدانىپ جاتسا، ءبىرقاتار جوبالاردى قولعا السام دەيمىن. وسەك پەن توسەك تۋرالى جاڭالىقتاردى اڭدىعاندار بار. تالعامى جوعارى، ۋاقىتىنىڭ ءقادىرىن بىلەتىندەر دە از ەمەس دەگەن ويدامىن. باستىسى وسى باعىتتاعى العاشقى قادامدار باستالدى»، - دەيدى جوبا اۆتورى ازامات بيتان.

سايت الاشتىڭ ءالديى، ءتىلاشار، پەداگوگيكا، پسيحولوگيا، الاڭ سەكىلدى ايدارلاردان تۇرادى. وقىرمان قاۋىمعا الاش ارىستارىنىڭ ءالى كۇنگە دەيىن مەكتەپ وقۋلىقتارىندا باسىلماي كەلە جاتقان ءبىرقاتار شىعارمالارى، اكە مەن بالاعا قاتىستى تاربيەلىك ماقالالار، قازاقتىڭ ۇلتتىق تاربيەسى مەن جالپى بالا تانىمىنا قاتىستى تانىمدىق ماتەريالدار ۇسىنىلادى. سونىمەن قاتار، قوعام قايراتكەرلەرى مەن پەداگوگتار، ءار سالادا بەلگىلى ءبىر جەتىستىكتەرگە قول جەتكىزگەن تانىمال تۇلعالاردىڭ قاتىسۋىمەن «اكەمەن اڭگىمە» اتتى ارنايى جوبا جۇمىس ىستەي باستاعان.