15 اقپان كۇنى قازاقستاندىق قۇقىق قورعاۋشى باقىتجان تورەعوجينا Facebook-تەگى پاراقشاسىندا پرەزيدەنت نۇرسۇلتان نازاربايەۆتىڭ اتىنا «قازاتومونەركاسىپ» ۇلتتىق كومپانياسىنىڭ بۇرىنعى باسشىسى مۇحتار جاكىشيەۆكە راقىمشىلىق جاساۋ تۋرالى جازىلعان ۇندەۋ حاتقا قول جيناۋدى باستاعان دەپ جازادى Qamshy.kz اقپارات اگەنتتىگى.

ۇندەۋدە مۇحتار جاكىشيەۆتىڭ جۇرەك-قان تامىرلارى دەرتىنە شالدىققانى تۋرالى ايتىلىپ، دەنساۋلىعى ناشار دەپ حابارلاعان بولاتىن.

ۇندەۋ حاتقا 5  مىڭعا جۋىق ادام قول قويعان. قول قويعانداردىڭ اراسىندا جالپىۇلتتىق سوسيال-دەموكراتيالىق پارتيا ساياسي كەڭەسى پرەزيديۋمىنىڭ ءتورايىمى زاۋرەش باتتالوۆا، «قوعامدىق پروبلەمالاردى تالداۋ ورتالىعى» قوعامدىق قورى ديرەكتورى مەرۋەرت ماحمۇتوۆا، «تەڭ قۇقىلى جۋرناليستەر فەدەراسياسى» پرەزيدەنتى روزلانا تاۋكينا، تاريحشى پروفەسسور باقىتنۇر وتاربايەۆا، جۋرناليست ۆاديم بورەيكو جانە وزگەلەر بار. حاتقا پارلامەنتتىڭ بۇرىنعى دەپۋتاتى ايگۇل سولوۆيەۆا «زاڭ مۇمكىندىك بەرەدى، سوندىقتان بوساتۋدى قولدايمىن» دەگەن سوزدەر جازىپ، قول قويعان.

قازاقستاندىق قۇقىق قورعاۋشى باقىتجان تورەعوجينا 23 ناۋرىز كۇنى Facebook-تەگى پاراقشاسىندا ۇندەۋ حاتتاردىڭ بارىنە قازاقستاننىڭ باس پروكۋراتۋراسىنان «جوق» دەگەن جاۋاپ كەلگەنىن حابارلادى.

باس پروكۋراتۋرانىڭ جاۋابىندا «رايسا جاكىشيەۆانىڭ بالاسى مۇحتار جاكىشيەۆتىڭ مۇددەسىنە قاتىستى ءوتىنىشىن قولداعان ۇندەۋ حات قازاقستان رەسپۋبليكاسى پرەزيدەنتى اكىمشىلىگىنەن ءتۇسىپ، قارالدى، ءبىراق زاڭعا سايكەس، قازاقستان رەسپۋبليكاسى پرەزيدەنتىنە راقىمشىلىق جاساۋ تۋرالى وتىنىشپەن سوتتالعان ادامنىڭ ءوزى جۇگىنۋى ءتيىس» دەپ جازىلعان.

«سوتتالعان ادام ءوتىنىشتى جازانى اتقارۋ مەكەمەسى اكىمشىلىگى ارقىلى بەرەدى. ال مەكەمە سوتتالعان ادامنىڭ وتىنىشىنە وعان قاتىستى ارىزداعى تالاپتار مەن وتەلمەگەن قارىزى تۋرالى انىقتاما سياقتى ءبىرقاتار قۇجاتتاردى تىركەيدى» دەلىنگەن باس پروكۋراتۋرانىڭ جاۋابىندا.