«ازىرەت سۇلتان» مەملەكەتتىك تاريحي-مادەني قورىق-مۋزەيىنە تۇركيانىڭ ستامبۋل قالاسىنان ياسساۋيتانۋشى عالىم، قوجا احمەت ءياساۋيدىڭ جيىرما جەتىنشى ۇرپاعى، «Yesevi ocaklari» جۋرنالىنىڭ باس رەداكتورى يسمەتۋللا ياساۋي كەلدى، دەپ حابارلايدى 24.kz.

قورىق-مۇراجايدا وتكەن ناۋرىز مەرەكەسىنە ارنالعان مادەني ءىس-شارا بارىسىندا يسمەتۋللا ياساۋي سالتاناتتى تۇردە قوجا احمەت ءياساۋيدىڭ «ديۋاني حيكمەت» قولجازباسىنىڭ ءتۇپنۇسقاسىن «ازىرەت سۇلتان» قورىق مۋزەيىنىڭ ديرەكتورى احمەتجانوۆ نۇربولات قادىرۇلىنا تابىس ەتتى. كىتاپ 1212 جىلى شاعاتاي تىلىندە جازىلعان. ياساۋيتانۋشىنىڭ ايتۋىنشا، جەتى عاسىرعا جۋىق ساقتالىپ كەلگەن قۇندى جادىگەردىڭ ءتۇپنۇسقاسىندا جارىققا شىقپاعان قانشاما دۇنيەلەر مول. الداعى ۋاقىتتا اتالعان قۇندى جادىگەردى استانا قالاسىنداعى ۇلتتىق سيرەك كىتاپتار مەن قولجازبالار ورتالىعىندا اۋدارما جۇمىستارىن جاساتۋ جوسپارلانۋدا.

سالتاناتتى شارا ناۋرىز مەرەكەسىن اتاپ وتۋگە ۇلاستى. ماڭىزدى باسقوسۋعا جينالعان حالىق مۋزەي ۇجىمى دايىنداعان ناۋرىزكوجە مەن داستارحاننان ءدام تاتىپ، كونسەرتتىك باعدارلاما تاماشالادى. ۇلىستىڭ ۇلى كۇنىمەن بارشا قىزمەتكەرلەردى قۇتتىقتاعان مەكەمە باسشىسى نۇربولات قادىر ۇلى ياساۋيتانۋشى يسماتۋللا ياساۋيعا «ازىرەت سۇلتان» مەملەكەتتىك تاريحي-مادەني قورىق مۇراجايى اتىنان ارنايى سىيلىقتار تابىس ەتتى.