ءماجىلىس ءتوراعاسى نۇرلان نىعماتۋلين سولتۇستىك قازاقستان وبلىسىنا ساپارى بارىسىندا ءبىرقاتار كاسىپورىنداردى ارالاپ، ەڭبەك ۇجىمدارىمەن كەزدەستى، دەپ حابارلايدى Qamshy.kz اقپارات اگەنتتىگى. 

         ءماجىلىس سپيكەرى وڭىردەگى ەڭ كونە ءارى ەڭ ءىرى كاسىپورىننىڭ ءبىرى كيروۆ اتىنداعى زاۋىتتا بولىپ، ونىڭ «سيفرلىق قازاقستان» باعدارلاماسى اياسىندا قولعا الىنعان جاڭا جۇمىس باعىتىمەن تانىستى.

         ەڭبەك ۇجىمىمەن جۇزدەسۋ بارىسىندا ن. نىعماتۋلين  ءوندىرىستى جاڭعىرتۋ ماڭىزدىلىعىن العا تارتا كەلىپ، ەلباسى ۇسىنعان الەۋمەتتىك باستامالارعا ايرىقشا نازار اۋداردى. تۇرعىندار الدىندا باسپانالى بولۋدىڭ،  سالىقتى ازايتىپ،   جالاقىنى كوبەيتۋدىڭ،   جاڭا تابىس كوزىن اشۋدىڭ  مۇمكىندىكتەرى تۋراسىندا جان-جاقتى باياندادى. ساپالى ءبىلىم جايىن ءسوز ەتكەندە ءماجىلىس ءتوراعاسى:

- جوعارى ءبىلىمنىڭ ساپاسى مەن قولجەتىمدىلىگىن ارتتىرۋ ماقساتىندا ءقازىر جىل سايىن بولىنەتىن 54 مىڭ گرانتقا قوسىمشا تاعى 20 مىڭ گرانت بولىنەدى. ونىڭ كوبى تەحنيكالىق ماماندىقتار بويىنشا باكالاۆرلىق ءبىلىم بەرۋگە ارنالادى. بۇل جوعارى ءبىلىم الۋدىڭ قولجەتىمدىلىگىن ارتتىرۋمەن قاتار، ءتورتىنشى ونەركاسىپتىك ريەۆوليۋسيا جاعدايىندا سۇرانىسقا يە بولاتىن جاڭا مامانداردى دايارلاۋعا جول اشادى. سونىمەن بىرگە، ستۋدەنتتەردى جاتاقحانامەن قامتاماسىز ەتۋ ماسەلەسىن وڭتايلى شەشەتىن بولادى،-دەدى. 

پرەزيدەنتتىك بەس الەۋمەتتىك باستاماعا كەڭىنەن توقتالعان پالاتا سپيكەرى ولاردىڭ بارلىعى وتاندىق ەكونوميكانىڭ ناقتى ەسەبى جاسالعان مۇمكىندىكتەرى بويىنشا قاراستىرىلعانىن اتاپ ءوتتى.

- ەلباسىنىڭ تاپسىرماسى بويىنشا ۇكىمەت ارنايى جول كارتاسىن جاسادى. بۇل پرەزيدەنتىمىزدىڭ باستامالارىن جۇزەگە اسىرۋدىڭ ناقتى، جوسپارلى قادامدارى. وعان سايكەس، ورىنداۋ تەتىكتەرى مەن مەرزىمى بەلگىلەنىپ، جاۋاپتى مينيسترلىكتەر مەن قۇرىلىمدار بەكىتىلگەن ، - دەپ اتاپ ءوتتى ن.نىعماتۋلين.

وسى رەتتە ءماجىلىس ءتوراعاسى ءقازىردىڭ وزىندە پارلامەنتتە الەۋمەتتىك جاڭعىرتۋ اۋقىمدى باعدارلاماسىن زاڭدىق تۇرعىدان قامتاماسىز ەتۋ جۇمىستارى باستالعانىنا توقتالدى.  

- پرەزيدەنتتىك بەس الەۋمەتتىك باستامالاردىڭ ساپالى قۇقىقتىق-نورماتيۆتىك بازاسىن قۇرۋ پارلامەنت دەپۋتاتتارىنىڭ وسى سەسسياداعى جۇمىسىنىڭ نەگىزگى باسىمدىعى بولىپ تابىلادى،- دەدى پالاتا ءتوراعاسى.

ءماجىلىس ءتوراعاسىنىڭ پىكىرىنشە، پارلامەنت 15 شاقتى زاڭدارعا وزگەرىستەر ەنگىزبەك. ولاردىڭ قاتارىندا ازاماتتىق، بيۋدجەتتىك، سالىق كودەكستەرى، ءبىلىم تۋراسىندا، بانك جانە تولەمدەر تۋرالى زاڭنامالىق قۇجاتتار بار.  

سونىمەن بىرگە، 2019-2020 جىلدارعا ارنالعان رەسپۋبليكالىق بيۋدجەتتى قاراپ، اعىمداعى بيۋدجەتكە وزگەرىستەر مەن تولىقتىرۋلار ەنگىزۋ كوزدەلىپ وتىر.

كەزدەسۋ بارىسىندا ۇجىم قىزمەتكەرلەرى ەلباسىنىڭ الەۋمەتتىك باستامالارى جاڭا سەرپىن بەرگەنىن جانە زور سەنىم ارتىپ وتىرعاندارىن جەتكىزدى.