سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ قىزمەتكەرلەرى قىرعىزستانمەن شەكارادا ءبىر توپ ادامدى ۇستادى، - دەپ حابارلايدى Tengrinews.kz.
مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى ۇلتتىق بيۋروسىنىڭ جامبىل وبلىسى بويىنشا دەپارتامەنتىمەن قىرعىزستان جانە قازاقستان رەسپۋبليكاسىنىڭ مەملەكەتتىك شەكاراسى ارقىلى ءىرى قارا مالدارىن زاڭسىز تاسىمالداۋ توقتاتىلعانى ايتىلادى.
بۇل ءىس-شارا ۇقك اسكەري قارسى بارلاۋ ءبولىمىنىڭ، جامبىل وبلىسى ءىىد-نىڭ ۇيىمداسقان قىلمىسپەن كۇرەس باسقارماسىنىڭ جانە "ارلان" ارنايى بولىمشەسىنىڭ كۇشتەرىن تارتۋمەن وتكىزىلدى.
"مەركى اۋدانىنىڭ كەيبىر تۇرعىندارى قىرعىزستان رەسپۋبليكاسىندا ۇرلانعان مالداردى قازاقستاندا ساتۋ ءۇشىن مەملەكەتتىك شەكارانى وتكىزۋ پۋنكتتەرىنەن تىس جەردەن زاڭسىز كەسىپ وتەتىندەرى انىقتالدى. اعىمداعى جىلدىڭ 1 ساۋىرىندە تۇنگى ۋاقىتتا ۇيىمداستىرىلعان ءىس-شارانىڭ ناتيجەسىندە مەركى اۋداننىڭ تۇرعىندارى 13 باس ءىرى قارا مالىن شەكارادان كەدەرگىسىز وتكىزۋدى قامتاماسىز ەتۋى ءۇشىن شەكارا قىزمەتشىسىنە پارا بەرگەندەرى راسىمدەلدى"، - دەلىنگەن حابارلامادا.
پارا بەرۋشىلەردىڭ تاپسىرماسى بويىنشا قىرعىزستان اۋماعىنان مەملەكەتتىك شەكارانى زاڭسىز كەسىپ ءوتىپ، زاڭسىز جولمەن مال باسىن وتكىزگەندەرى ۇشىنشەكارا بەكەتىنىڭ اۋماعىندا قازاقستاندىق ءتورت ازامات ۇستالدى.
"سونىمەن قاتار، ءبىر مەزگىلدە پارا بەرۋ دەرەگى بويىنشا كۇدىكپەن پارا بەرۋشى ەكى ازامات ۇستالدى. قازىرگى تاڭدا وسى تۇلعالارعا قاتىستى "كەپىل" تۇرىندەگى بۇلتارتپاۋ شاراسى قولدانىلدى. مەملەكەتتiك شەكارانى زاڭسىز كەسىپ ءوتۋ دەرەگى بويىنشا ماتەريالدار جەكە وندىرىسكە ءبولىنىپ، تەرگەۋ رەتتىلىگى بويىنشا جىبەرىلەدى"، - دەپ حابارلادى ۆەدومستۆونىڭ باسپا ءسوز قىزمەتى.
پىكىر قالدىرۋ