پوليسيا قىزمەتكەرلەرى تەكسەرىس بارىسىندا الەۋمەتتىك جاعدايى ناشار وتباسىندا تاربيەلەنىپ جاتقان بالالاردىڭ مۇشكىل حالىنە كۋا بولدى. 3 جاستاعى بالالار اش جانە كيىمى لاس بولعان، دەپ جازادى Qamshy.kz اقپارات اگەنتتىگى الماتى قالالىق ءىىد باسپا ءسوز قىزمەتىنە سىلتەمە جاساپ.

پوليسيانىڭ بەرگەن اقپاراتىنا سايكەس، وتباسى المالى اۋدانىندا تۇرادى. ينسپەكتورلار ۇيگە كەلگەندە بالالاردىڭ اكەسى ۇيىقتاپ جاتقان. 1978 جىلعى ەر ادام ۇيگە بوتەن ادامدار كەلسە دە، ويانباعان. الماتى قالالىق ءىىد مالىمەتىنە سايكەس، ول ماس بولعان. بالالاردىڭ اناسى ۇيدە بولماعان.

«ءۇي اپاتتى جاعدايدا تۇر. سانيتارلىق تالاپقا ساي كەلمەيدى. بارلىق جەردە بوتەلكەلەر مەن ءتۇرلى قوقىستار جاتىر. بالالاردىڭ اناسى كەشكە ۇيىنە كەلدى. 1977 جىلعى ايەلدىڭ ايتۋىنشا، ول جۇمىستا بولعان. اتا-انانىڭ بالالارىنا نەمقۇرايلى قاراۋى تاڭعالدىرادى. ەكى بالانىڭ جاسى ۇشتە. بالاباقشاعا بارمايدى. ولاردىڭ قانداي جاعدايدا تۇرىپ جاتقانى ەسكەرىلە وتىرىپ، بالالارعا قاتىستى قاجەتتى شارالار قولدانىلدى. د. جانە ا. ەسىمدى بالالاردىڭ ءومىرى مەن دەنساۋلىعىنا ءقاۋىپ تونگەندىكتەن، ولار كامەلەتكە تولماعان بالالارعا ارنالعان بەيىمدەۋ ورتالىعىنا ورنالاستىرىلدى»، - دەيدى پوليسيا پولكوۆنيگى لەيلا الىپبايەۆا.  

ونىڭ سوزىنشە، وتباسى ەسەپكە الىندى.

«وتباسى باقىلاۋعا الىندى. بالالاردىڭ اتا-اناسى اقىلعا كەلىپ، جاعدايدى وزگەرتۋگە ۋادە بەردى. ايتپەسە ولار اتا-انا قۇقىعىنان ايىرىلۋى مۇمكىن. سەبەبى بالالار ءومىرى مەن دەنساۋلىعىنا ءقاۋىپ تونەتىندەي جاعدايدا تۇرىپ جاتىر»، - دەدى لەيلا الىپبايەۆا.