16 مامىردا بارشا مۇسىلمان جاماعاتى ءۇشىن قاسيەتتى رامازان ايى باستالادى. وسى ورايدا  «ازىرەت سۇلتان» مەشىتىنىڭ نايب يمامى قانات قىدىرميننەن رامازان ايىنا قالاي دايىندالۋ كەرەكتىگىن ايتتى، دەپ حابارلايدى Sputnik قازاقستان .

— ءقازىر ءبىز رامازاننىڭ الدىنداعى شاعبان ايىنا كىرىپ جاتىرمىز. يسلام عالىمدارى رامازانعا دايىندىقتا بىرنەشە ماسەلەنى قاراستىرادى. ەڭ ءبىرىنشى، ول مۇسىلماننىڭ نيەتىن جاڭارتىپ الۋ. ياعني ءبىر ىسكە كىرىسپەي تۇرىپ، الدىمەن نيەت ەتۋ بۇل قايىرلى ءىس بولىپ سانالادى. پايعامبارىمىز (س.ع.س.) ايتادى: "ءاربىر نارسە نيەتپەن عانا دۇرىس بولادى جانە ادام نيەت ەتكەن نارسەسىنە قول جەتكىزەدى". سوندىقتان دا قاسيەتتى رامازان ايىنىڭ الدىندا ەڭ اۋەلى نيەتتى دۇرىستاپ الۋ كەرەك. رامازاننىڭ نەگىزگى ماقساتى تۋرالى اللا تاعالا قۇراندا بىلاي دەيدى: "ەي، يمان كەلتىرگەندەر، اقيقاتىندا سەندەرگە ورازا پارىز بولدى. بالكىم، سەندەر اللادان قورقاتىن بولارسىڭدار" دەيدى. رامازاننان شىعۋداعى نەگىزگى ماقسات ادام اللادان قورقىپ، يماندىلىقپەن شىعۋى كەرەك. ول تەك سۋسىننان، تاماقتان تىيىلۋ ەمەس. پايعامبارىمىز (س.ع.س.) ايتادى: "كىمدە-كىم جامان ءسوز سويلەۋىن جانە جامان ءىسىن توقتاتپاسا، اللا تاعالاعا ونىڭ تاماقتان، سۋسىننان تىيىلعانى قاجەت ەمەس". ەندەشە رامازاننىڭ ىشكى سىرى –  تەك تاماقتان، سۋسىننان ەمەس، جامان ءسوز بەن ىستەن، جامان ويدان تىيىلۋ. ادام ىزگىلىكتى نيەت ەتىپ، جاقسى جاعىنا وزگەرۋگە تىرىسۋ كەرەك. ياعني، ەڭ ءبىرىنشى رامازانعا دايىندىق نيەت ارقىلى بولادى، — دەدى يمام.

رامازان ايىنا دايىندىق رەتىندە جاسالاتىن ەكىنشى نارسە – دۇعا تىلەۋ. 

— پايعامبارىمىز (س.ع.س.)  "اللا تاعالا ەرەجەپ ايىن، شاعبان ايىن بەرەكەلى ەتشى جانە ءبىزدى رامازانعا جەتكىزشى" دەپ دۇعا قىلاتىن بولعان ەكەن. سوندىقتان ءاربىر مۇسىلمان "اللا تاعالا، رامازانعا جەتكىزە گور" دەپ دۇعا ەتۋى كەرەك. ءۇشىنشىسى، ەگەردە ادام بىرەۋگە قارىز نەمەسە اماناتى بولاتىن بولما، رامازان ايىنا دەيىن قۇتىلىپ، قاسيەتتى ايعا تازا، تاۋبەمەن كىرگەنى جاقسى. رامازان – اللا مەن قۇلدىڭ اراسىنداعى بايلانىس، ال بىرەۋدىڭ زاتى ادام مەن ادامنىڭ اراسىنداعى حاقىسى. سوندىقتان ادامنىڭ حاقىسى جەلىنگەن بولسا، اللانىڭ الدىندا ول ادامنىڭ ورنى بيىكتەمەيدى. ول ادام قانشا جەردەن نامازدا جىلاپ تۇرسىن، قاجىلىق قىلسىن، ورازا ۇستاسىن، ءبىراق  ول باسقا بىرەۋگە قيانات جاساپ، العان زاتىن قايتارماي جۇرگەن بولسا نەمەسە الداپ كەتكەن بولسا، اللا تاعالا ونىڭ نامازدا جىلاپ تۇرعانىن قاجەت ەتپەيدى. ويتكەنى بۇل جەردە ادامنىڭ حاقىسى جەلىنىپ تۇر. سوندىقتان رامازانعا دەيىن بىرەۋدەن العان دۇنيەنى قايتارىپ، بەرگەن ۋادەنى ورىنداپ، تاۋبە جاساپ، تازا كىرگەن جاقسى، — دەدى قىدىرمين. 

يمامنىڭ ايتۋىنشا، مۇنىڭ ىشىنە وتكەن ورازا ايىنان قالعان قارىزدى ۇستاۋ دا كىرەدى. رامازان ايىنا وتكەن جىلدىڭ قارىزىمەن كىرۋگە بولمايدى. قارىز بولسا، وسى شاعبان ايىندا وتەپ تاستاعان جاقسى ەكەن. 

— ءتورتىنشى ماسەلە، رامازان ايىندا مۇسىلمان ادامدى عيباداتتان نەمەسە قۇلشىلىقتان مازالايتىن جۇمىستار بولاتىن بولسا، سولاردى رامازانعا دەيىن شەشىپ تاستاۋ. بۇل دەگەنىمىز نە؟ كەيبىر كەزدە ادامدار ورازا ايىنىڭ الدىندا ءبىر ءىستى باستاپ قويىپ، ونى اياقتاپ ۇلگەرمەي، رامازان ايىندا سول ءىستىڭ ماشاقاتىمەن ءجۇرىپ، اۋىزشارعا عانا كوڭىل بولەدى. ءسويتىپ ءجۇرىپ رامازان ايىنداعى باسقا عيباداتتاردان جۇرداي بولىپ قالۋى مۇمكىن. نەگە؟  رامازانعا جوسپارسىز كىرگەندىكتەن. سوندىقتان كەز كەلگەن مۇسىلمان رامازان الدىنداعى دايىندىق رەتىندە وسى ايعا ۇلكەن ساپارلاردى نەمەسە توي-دۋمانداردى جوسپارلاماعانى ابزال. ونداي ىستەردى رامازانعا دەيىن نەمەسە كەيىن جاساۋ ادەمىرەكتەۋ بولادى. بەسىنشىسى،  ءوزى قۋانۋ، وزگەنى قۋاندىرۋ. ءوزى قۋانۋ – قاسيەتتى اي كەلە جاتىر دەپ، اللا تاعالانىڭ قاسيەتتى قىلعان نارسەلەرىنە قۋانۋ.  مۇسىلماندار رامازان ايىنىڭ كەلە جاتقانىنا قۋانۋعا تىرىسۋى كەرەك. ال وزگەنى قۋاندىرۋ دەگەن نە؟ مىسالى وتباسىلى ادام ۇيدە ايەلىمەن، بالا-شاعاسىمەن وتىرىپ، رامازان كەلە جاتىر، مۇقتاج ادامدارعا تاماق تاراتايىق، ساداقا بەرەيىك دەپ يگى ىستەردى جوسپارلاپ، مەرەكەگە دايىندالعانداي قۋانىپ، وزگەلەردى قۋاندىرسا، بۇل نۇر ۇستىنە نۇر، — دەيدى يمام.

— ساحابالار ايتادى: "پايعامبارىمىز(س.ع.س.) وتە جومارت ادام ەدى، ءبىراق رامازان كەلگەن كەزدە ودان سايىن جومارت بولىپ كەتەتىن ەدى" دەپ. رامازان ايىندا ادام ءوزى وزگەرۋگە تىرىسۋى كەرەك. ويتكەنى بۇل اللا مەن قۇلدىڭ اراسىنداعى سىر بولىپ ەسەپتەلىنەدى. ءبىز نامازعا جىعىلعانداردى، قاجىلىققا بارعانداردى كورەمىز، ال ورازا كورىنبەيتىن عيبادات. ىشكى دۇنيەسىنىڭ اللا تاعالاعا تولىق بەرىلۋىنە سەپتىگىن تيگىزەتىن قاسيەتتى عيبادات. جانە دە رامازان ايىندا ساۋاپتى امال جاساعان بولسا، اي بىتكەن سوڭ دا ونى جالعاستىرۋى كەرەك. ەگەر رامازاننان كەيىن دە ادامنىڭ مىنەز-قۇلقى، ىزگى امالدارى جالعاسىپ جاتاتىن بولسا، بۇل ونىڭ ورازاسىنىڭ قابىل بولعاندىعىنىڭ اسەرى دەپ ايتادى عۇلامالار، — دەدى قىدىرمين.