«كوكجيەك» ىقشاماۋدانىنداعى ورتتەن زارداپ شەككەن №31، №32 ۇيلەردىڭ تۇرعىندارى اكىمدىككە وكپەلى. وسىدان ون كۇن بۇرىن اتالعان ۇيلەردىڭ مانساردى ورتەنگەن بولاتىن. تۇرعىنداردىڭ ايتۋىنشا، الماتى قالاسى جەتىسۋ اۋدانىنىڭ اكىمدىگى ۇيلەردىڭ شاتىرى مەن سىرتقى قاباتىنا جوندەۋ جۇمىستارى جاقىندا باستالادى دەپ ۋادە بەرگەن، الايدا سوزىندە تۇرماعان. اشىنعان حالىق كەشەدەن بەرى اكىمدىكپەن سويلەسۋگە تىرىسقان، ءبىراق ول ارەكەتتەرىنەن ەشقانداي ناتيجە شىقپادى.

 №31 ءۇيدىڭ تۇرعىنى دينار كاميلوۆا جەرگىلىكتى بيلىكتىڭ ورتەنگەن ۇيلەردى قالپىنا كەلتىرۋگە اسىقپاي وتىرعانىن ايتادى.

— ءورت بولعان ۋاقىتتا اكىمدىك: «جوندەۋ جۇمىستارى باستالىپ كەتتى، ءبىتىرىپ بەرەمىز»، — دەدى. ەكى اپتاعا جۋىق ۋاقىت ءوتتى، ءۇيدىڭ شاتىرى ءالى كۇنگە دەيىن جابىلعان جوق. بىلتە تاقتايشالارىن عانا قاعىپ قويعان. سوڭعى كۇندەرى تولاسسىز جاۋعان جاڭبىردىڭ سالدارىنان 6-قاباتتان اققان سۋ ءبىرىنشى قاباتقا دەيىن جەتىپ، ءدالىزدى، پاتەرلەردى سۋ باستى. سونىڭ سالدارىنان ەلەكتريكتەر توكتى وشىرۋگە ءماجبۇر بولدى، — دەيدى د. كاميلوۆا.

تۇرعىنداردىڭ سوزىنشە، ارنايى بىرنەشە بريگادا جۇمىلماسا، جۇمىس ونبەيدى. ءبىراق اينالدىرعان 5-6 قۇرىلىسشى ءۇيدىڭ ءار جەرىن ءبىر ءتۇرتىپ قويىپ، سونىڭ كەسىرىنەن سالدىر-سالاقتىققا جول بەرىلىپ جاتىر ەكەن.

«كوكجيەك» اۋدانىنىڭ №31، №32 ۇيلەرىنىڭ تۇرعىندارى جاڭبىر سۋى پاتەرلەر مەن دالىزدەرگە كىرىپ، التىنشى قاباتتا بىرەۋ دارەتكە وتىرسا، سۋمەن ءبىرىنشى قاباتقا دەيىن اعىپ كەلەتىنىن، سالدارىنان جاعىمسىز ءيىس شىعاتىنىن جەتكىزدى.

— ءۇيدىڭ شاتىرى جابىلعان جاعدايدا ورتەنبەگەن ۇيلەردى جاڭبىر سۋىنان امان الىپ قالۋعا بولار ەدى، — دەيدى تۇرعىندار.

قازگيدرومەتتىڭ مالىمەتىنە سۇيەنسەك، الداعى كۇندەرى الماتىدا اۋا رايى جاڭبىرلى بولماق. ال كوپ قاباتتى ۇيلەردىڭ شاتىرى ءالى دە جابىلمادى. يپوتەكاعا العان ۇيلەرى تاعى دا نوسەردىڭ استىندا قالىپ، تۇرعىندار ودان دا كوپ شىعىنعا باتپاق پا؟ شاتىردى ۋاقىتىلى جوندەمەگەندىكتەن زارداپ شەگىپ وتىرعان حالىق وتەماقىنى كىم تولەيدى دەپ قينالىپ وتىر.

زاڭگەر قايرات جۇكەلدىڭ پىكىرىنشە، يپوتەكاعا الىنعان ءۇي ءالى مەملەكەتتىڭ مەنشىگىندە تۇرسا، جەكە پاتەر كووپەراتيۆىنە وتپەسە، جاڭبىر سۋىنان زارداپ شەككەن تۇرعىندارعا وتەماقىنى اكىمدىك بەرۋى قاجەت.

№31 ءۇيدىڭ تۇرعىنى ءلايلا دۇكەنوۆانىڭ ءۇيى تولىق ورتەنىپ كەتكەن. ءقازىر وتباسىمەن پاتەر جالداپ تۇرىپ جاتىر. اكىمدىك ءبىر ايعا پاتەراقى رەتىندە 60 مىڭ تەڭگە بەرگەن.

— اكىمدىك، قۇجاتتارى راسىمدەلسە، 100 اەك (240 مىڭ تەڭگە) كومەك كورسەتىلەتىنىن ايتقان. ول قارجىعا تولىق جوندەۋ جۇمىستارىن جۇرگىزۋ مۇمكىن ەمەس. مەن بالكونىمنىڭ ءوزىن 400 مىڭ تەڭگەگە جاساتقانمىن. بىلمەيمىن... اكىمدىك ەڭ الدىمەن مۇگەدەكتەرگە، كوپ بالالى وتباسىلارعا كومەكتەسەمىز دەيدى. ەڭ الدىمەن ءۇي شاتىرىن جاۋىپ، ودان كەيىن مۇمكىن بولسا كومەكتەسەتىنىن مالىمدەدى. ءبىراق ەكى اپتا ءوتتى، ەشقانداي قوزعالىس جوق. ءۇيدىڭ شاتىرى ءالى جابىلمادى، — دەيدى ءلايلا دۇكەنوۆا.

تۇرعىندار جينالىپ، الماتى قالاسى اكىمىنىڭ ورىنباسارىمەن كەزدەسۋگە بارعان. وندا ءۇيدىڭ شاتىرىن تەزدەتىپ جابۋ ماسەلەسىن كوتەرمەك بولعان. ءبىراق اكىمدىكتەگىلەر تۇرعىنداردى ۇيگە قاتىستى بارلىق ماسەلەنى جەتىسۋ اكىمدىگى شەشەتىنىن ايتىپ، شىعارىپ سالىپتى.

Qamshy.kz اقپارات اگەنتتىگى ءمان-جايدى انىقتاۋ ءۇشىن الماتى قالاسى جەتىسۋ اكىمدىگىنە حابارلاستى. اكىمدىك وكىلى رەسمي حات جازۋىمىزدى سۇرادى. الداعى ۋاقىتتا كەلگەن رەسمي جاۋاپتى جاريالايتىن بولامىز.

ايتا كەتەيىك، «كوكجيەك» ىقشاماۋدانىنداعى №31، №32 كوپ قاباتتى ۇيلەر 10 كۇن بۇرىن ورتەنگەن ەدى. ءۇيدىڭ مانسارد ۇلگىسىندەگى 6-قاباتى تۇگەل وتقا ورانعان. پاتەر يەلەرى باسپانالارىن يپوتەكاعا العان.

بەيرەسمي دەرەكتەرگە سايكەس، ءورت كىشكەنتاي بالالاردىڭ بالكوندا اتقىشتاردى اتۋىنان تۇتانعان. ءقازىر باسقا دا سەبەپتەرى تەكسەرىلىپ جاتىر.