مەنىڭ اعايىندارىمنىڭ ەكىنشى جانە ءۇشىنشى سىنىپتا وقيتىن بالالارى بار. سولاردىڭ ساباق ۇلگەرىمدەرى جاقسى بولىپ كورىنگەنمەن، ءماتىندى ءالى ارىپتەپ وقيدى. نەگە دەسەڭىز... «الىپپەنى» قۇرتىپ تىنىپ، اقشا ءۇشىن اننان-مۇننان قۇرالعان وقۋلىق جازعىشتاردىڭ باستاۋىش سىنىپ باعدارلاماسىنا اتا-انالاردىڭ ميى جەتە بەرمەيتىن تاپسىرمالاردى ەنگىزىپ قويعانىن قوسپاعاننىڭ وزىندە، قازىرگى مۇعالىمدەر دە بالا مۇمكىندىگىن ەسكەرمەيتىن بولىپ شىقتى.

سونىمەن، 2-سىنىپ وقۋشىلارىنا سىنىپ جەتەكشىلەرى جامبىل جابايەۆ، اباي قۇنانبايەۆ، مۇحتار اۋەزوۆتىڭ پورترەتتەرىن سالىپ كەلىڭدەر دەگەن ەدى. ال ولاردان ءسال ەرەسەكتەۋ عوي دەسە كەرەك، 3-سىنىپ وقۋشىلارىنا رەفەرات جازدىرتىپ قويدى. «تاپسىرما» دامىعان ۇستىنە دامىپ، جىلدىڭ ءتورت مەزگىلىنە ەكى-ەكى شۋماقتان 8 شۋماق ولەڭ جازىپ اكەلۋ دە جۇكتەلدى. وۋ، سوندا ءبىر سىنىپتاعى 20-30 بالانىڭ ءبارى اقىن، سۋرەتشى، عالىم بولعانى ما؟!

«ءجا، قانداي بولسا دا، قازاق مەكتەبىنىڭ ءبىر مامانى عوي» دەپ، «عۇلامالار ۇستازىنا» ازىرگە ەشتەڭە ايتپادىق. ءبىر جاعىنان، وقۋ جىلى دا اياقتالىپ قالدى. ال كەلەسى وقۋ جىلىندا بالالاردى ودان سايىن «كەمەلىنە كەلتىرىپ» قويسا، ءمۇعالىم تۇرماق، مەكتەپ ديرەكتورىنىڭ الدىنا بارىپ، بىردەڭە دەۋگە تۋرا كەلەدى. ويتپەسەك، ول وقۋشىلاردىڭ بەسىكتەن بەلى شىقپاي جاتىپ، ۇلى تۇلعالاردىڭ بەينەسىن اينىتپاي سالا المايتىنى بارشاعا ايان. سۋرەت ساباعىن وزىق تۇردە وقىتىپ، تاپسىرمانى سول ەڭبەگىنىڭ ناتيجەسىنە كوز جەتكىزىپ العاننان كەيىن بەرسە، ءبىر ءسارى...

مىسالى، الگى ءۇش سۋرەتتى دە كىتاپتاعى پورترەتتەرگە قاراپ وتىرىپ، مەن سالىپ بەردىم. ۇلكەن ادامنىڭ قولىنان شىققانى تايعا تاڭبا باسقانداي اپ-انىق بادىرايىپ تۇرسا دا، اناۋ بالا سول ارقىلى «بەستىك» الدى. ءتورت مەزگىلگە ارناپ شىعارىپ بەرە سالعان ولەڭدەرىم دە «وتە جاقسى» دەپ باعالاندى. سونداي-اق، وزگە سىنىپتاستارى دا ءبىر-بىر «بەسىككە» قارىق بولعان. شىن مانىندە، ول باعالار باستاۋىش سىنىپ وقۋشىلارىنىڭ وزدەرىنە ەمەس، ءار تاپسىرما سايىن بارلىعىنا سۋرەت سالىپ، ولەڭ شىعارىپ بەرىپ كەلگەن ەرەسەك تۋىسقاندارىنا قويىلىپ وتىردى. سونى بىلە تۇرا، ساباق ساعاتىن ايتەۋىر وتكىزگەنسىپ جۇرگەن مۇعالىمدەردىڭ جاۋاپكەرشىلىگى قايدا؟! بىرەۋدىڭ ارقاسىندا كوپ جاقسى باعا جيناعان وقۋشىلارعا وقۋ جىلى اياقتالعان ساتتە ماقتاۋ قاعازىن تاپسىراردا، بەتىنىڭ وتى شىقپاي ما ەكەن؟ سۇمدىق قوي، مىنالارى!

«رەفەرات» دەگەنى دە سول – بىزدەي «ءبىلىمى تاسىعان» ءپاتشاعارلاردىڭ ينتەرنەتتەن سۋىرىپ الىپ بەرگەن 4-5 پاراعى! ايتپەسە، «ءوز ەركىمەن ينتەرنەت پايدالانۋدى مەڭگەرىپ، العان مالىمەتتەرىنىڭ باسىن قوسىپ ۇيرەنسىن» دەرلىكتەي، قالاداعى بالالاردىڭ ءبارى بىردەي كومپيۋتەرگە جارىعان ەمەس. ال قاپتاعان كومپيۋتەر كلۋبتارىنا بارۋلارى ءۇشىن قالتالارىنا ۇنەمى قارجى سالىپ تۇرۋ كەرەك. كوپشىلىك شوعىرلانعان ورىنعا كىشكەنتاي ۇل-قىزدى جالعىز جىبەرە المايتىنىڭ تاعى بەلگىلى. ودان دا قاسىندا ماڭقيىپ وتىرماي، كەرەك ماعلۇماتتارىن جىلدامداتىپ ءوزىڭنىڭ تاۋىپ الىپ بەرگەنىڭ قولايلى.

...تاياۋدا ۇيگە سول 3-سىنىپتا وقيتىن ۇل كەلدى. «اپاي: «قازاق مەكتەپتەرىنىڭ وقۋ باعدارلاماسى وسىنداي. دامىعان 30 ەلدىڭ قاتارىنا كىرۋ ءۇشىن ءبارىن قازىردەن بىلۋلەرىڭ كەرەك» دەپ ايتتى»، – دەيدى. بىلگەنى قايسى، ەگەر ۇلكەندەر ورىنداعان اۋىر تاپسىرمالارعا مالدانىپ جۇرسە، ونىسىنان سىنىپ جەتەكشىسى حاباردار بولا تۇرا، جوعارى باعاسىن قويىپ قۇتىلۋدى عانا ويلاپ تۇرسا؟!.

P.S. بۇل – ءبىلىم جانە عىلىم مينيسترلىگىنە تىكەلەي قاتىستى بىلىقتىڭ تەك ءبىر-اق كورىنىسى. دەمەك، شىنىمەن دە ەڭسەمىزدى ەلۋ ەلدىڭ قاتارىنان تىكتەپ، وقۋىمىزدى وتىز ەلدىڭ قاتارىنان وڭدىرىپ كورسەتكىمىز كەلسە، جەتكىنشەكتەرىمىزدىڭ كەلەشەكتە سوعان ۇلكەن ۇلەس قوسۋىنان ۇمىتتەنسەك، ءار جاستىڭ شاماسىنا لايىقتالعان ساباق تۇسىندىرە المايتىن «ماماندى» كوبەيتۋدىڭ قاجەتى جوق-اۋ...

ەركەعالي بولات ۇلى