بيىل استانانىڭ 20 جىلدىق مەرەيتويى ەكەنى امبەگە ايان. كادىمگى سونى جىل بويى تويلاتۋعا بيىل باقانداي 19 ميلليارد (!) تەڭگە بولىنگەن، سارىارقا تورىندە ورنالاسقان جالعىز ەلوردامىزدى ايتىپ وتىرمىز. بۇلاي دەۋىمىزگە ءبىراز ارىپتەستەرىمىزدىڭ «استانا ارتتىرعىش» ارەكەتىنەن مەزى بولعاندىق سەبەپ. ءيا، «قوعامدى وسىرەتىن دە، وشىرەتىن دە – جۋرناليستيكا». ەرىكسىز ەلىكتىرىپ، جەل سوزبەن جەلىكتىرەتىن دە – سول.

الماتى – «وڭتۇستىك استانا»، اتىراۋ – «مۇنايلى استانا»، تۇركىستان – «رۋحاني استانا»، قاراعاندى – «كومىرلى استانا»... وسىلاي تىزە تۇسسەك، ماقتارال – «ماقتالى استانا»، قوستاناي – «استىقتى استانا»، تاعى باسقالارى دا جەرشىلدەردىڭ تانىمىنا تيەسىلى باس قالا بولىپ جالعاسا بەرسىن، ەندەشە. ويتكەنى، قازىرگى زامانداعى استاناسى ەڭ كوپ ەل – قازاقستان بولعاندىقتان، سول سالماقتى ەسەلەي ەسىرگەن ءجون.

وۋ، سەندەگىدەي مۇناي، كومىر، رۋحانيات دۇنيەجۇزىندە بار عوي! ءتىپتى، بىزدىكىنەن ارتىعىمەن تابىلادى. سولاي ەكەن دەپ، ەشقايسىسى ءوندىرىستى وڭىرلەرىن ءبىر-بىر «استانا» ەتىپ قويىپ وتىرعان جوق. ەلىنىڭ باس ورداسى اۋىسسا دا، بۇرىنعىسىنا ءبىزدىڭ «وڭتۇستىك استانا» دەگەنىمىزگە ۇقساتىپ ءمانسىز مارتەبە تاڭۋعا تىرىسپايدى. ارى-بەرىدەن سوڭ، قازاق رۋحانياتىنىڭ قاينار كوزى – تۇركىستان عانا ەمەس. قازاق دەگەن ۇلى ۇلت باردا، كەز كەلگەن جەرىمىز رۋحتى ۇل-قىزداردان، تالانتتى تارلانداردان كەندە بولا قالماس. «استانا – ەل جۇرەگى» دەيمىز. دۇرىس. سوندا دا كوپتەگەن قاناعاتسىز قاراقتارىم وكپەنى دە، باۋىردى دا، بۇيرەكتى دە جۇرەك دەۋدەن تاناتىن ءتۇر بايقاتپايدى-اۋ!..

جالپى، الماتىنى «يۋجنايا ستوليسا» دەۋدى اۋەلى ورىس تىلشىلەر باستادى. ال ءبىزدىڭ اۋدارمادان باس كوتەرە المايتىن كوشىرمە جۋرناليستيكا سونىمەن عانا شەكتەلىپ قالۋعا ارلانعانداي، «باس قالالاردى» بىرىنەن سوڭ ءبىرىن بالالاتتى-اي، كەلىپ! سودان كەيىن كوزى كورگەنىنەن، قۇلاعى ەستىگەنىنەن جاڭىلمايتىن وزگە جۇرتتىڭ ءبارى قازاقستاننىڭ قاي تۇكپىرىنەن بولسا دا ءبىر-بىر استانا «جاساۋعا» ابدەن بەيىمدەلىپ الدى. سونىسىنا ماستانعانداي سىڭايمەن «استانا – رەسمي استانا» دەپ قويادى تاعى. سوندا، بۇل جالعاندا رەسمي ەمەس تە استانا بولا ما ەكەن؟!

«بولىنگەندى ءبورى جەيدى» دەگەنىمىز دە بەكەر ايتىلماعان. ءبىر عانا باس قالاسىنا باعىنعىسى كەلمەۋدەن، مەملەكەتتىك شەشىمدى مويىنداماۋدان باسقا نەگىزى جوق «استاناشىلدىق» – ءجۇزىقارا ءجۇزشىل، رۋحى ءپاس رۋشىل، جەتەسىز جەرشىلدەردىڭ ساندىراعى سىندى. بۇنىڭ بالاماسى – «ءبولىپ ال دا، بيلەي بەر!» عانا، بىزدىڭشە.

ەندى ءوزارا ءجون سۇراسقاندا، «ءسىز قاي استانادانسىز؟» دەۋىمىز قالىپ تۇر («تولىپ جاتقان جۇرەگىڭىزدىڭ قايسىسى وزىڭىزدىكى؟» دەگەن سياقتى ساناعا سىيىمسىز سۇراق قوي بۇل دا). وزىڭىزگە جاقسى ەستىلسە، ونى دا ايتىپ كورەيىك:

ءسىز قاي استانادان بولاسىز، بەيتانىس جان؟

ەركەعالي بولات ۇلى