Qazkom وعىز دوعانعا مەملەكەتتىك تىلدە قىزمەت كورسەتپەگەنى ءۇشىن كەشىرىم سۇراپ، ۆيدەوۇندەۋ جاريالادى دەپ جازادى Qamshy.kz اقپارات اگەنتتىگى. 

ەسكە سالساق قىزۋ تالقىعا تۇسكەن وقيعا استانا قالاسىندا "سارىارقا" بانك بولىمشەسىندە بولعان. وسىدان ءبىراز ۋاقىت بۇرىن ەير استانانى قازاق تىلىندە قىزمەت كورسەتپەگەنى ءۇشىن سوتقا بەرىپ، سوتتا جەڭىپ شىققان بولاتىن. 

Qazkom بانكىنىڭ قىزمەتكەرلەرى قازاق تىلىندە قىزمەت كورسەتۋدى تالاپ ەتكەن وعىز دوعاننىڭ ءسوزىن ەلەمەي، ونى مەملەكەتتىك تىلدە قىزمەت كورسەتۋدەن باس تارتقان.  كەيىن وسى وقيعا الەۋمەتتىك جەلدە قىزۋ تالقىعا ءتۇسىپ، وعىز دوعان اتالعان بانك قىزمەتكەرلەرگە كەشىرىم سۇراۋدى تالاپ ەتتى. 

بۇگىن بانكتىڭ ءتوراعاسى ۋلۆ ۆوكۋركا  حالىقتان كەشىرىم سۇرادى. 

«بانك كەشەگى وقيعا ءۇشىن بارلىق قاتىسۋشىلار مەن كۋاگەردەن كەشىرىم سۇرايدى.ءتىل تۋرالى زاڭعا سايكەس، بانك ءوز قىزمەتىن مەملەكەتتىك تىلدە، ياعني قازاق تىلىندە جانە رەسمي ستاتۋسى بار ورىس تىلىندە كورسەتەدى. كليەنتتەردىڭ سۇرانىسى بويىنشا جانە قازاقستان رەسپۋبليكاسىندا تىلدەردى دامىتۋ مەن قولدانۋدىڭ 2011-2020 جىلدارعا ارنالعان مەملەكەتتىك باعدارلاماسى بويىنشا بانك ءۇش تىلدە قىزمەت كورسەتۋگە دايىن»، دەدى بانك باسشىلىعى. 

سونىمەن بىرگە Qazkom بانكىنىڭ باسشىلىعى ەكى تىلدە قىزمەت كورسەتەتىن قىزمەتكەرلەردىڭ بار ەكەنىن مالىمدەدى. ونىڭ ايتۋى بويىنشا، كليەنتتەرگە قىزمەت كورسەتەتىن بارلىق مەنەدجەرلەر مەملەكەتتىك ءتىلدى مەڭگەرگەن. الايدا قارجى مەكەمەسى كليەنتتىڭ تالابىن ورىنداماي، ورىس تىلىندە عانا سويلەگەن بانك قىزمەتكەرلەرىنىڭ ارەكەتىن اقتامايتىنىن ايتتى.

«كەشە استاناداعى بولىمشەدە بولعان وقيعا ءۇشىن سىزدەردەن كەشىرىم سۇرايمىز. بۇل بولىمشەدە ءبىزدىڭ بانكتە قابىلدانعان كليەنتكە قىزمەت كورسەتۋ ەرەجەسى ساقتالمادى. بۇل وقيعا ءبىز ءۇشىن ساباق بولدى. ءبىز ءوز تاراپىمىزدان تەك استانا قالاسىنداعى ەمەس باسقا قالالارداعى بولىمشەلەردە قىزمەت كورسەتۋ ساپاسىن باقىلاپ، جاقسارتۋعا تىرىسامىز»، دەيدى بانك باسشىلىعى.