بۇۇ قىرعىزستانداعى ۇرلانعان قىزدىڭ ولىمىنە قاتىستى رەسمي مالىمدەمە جاسادى. قۇجات ۇيىمنىڭ رەسمي سايتىندا جاريالاندى. بۇل تۋرالى جەرگىلىكتى ب ا ق حابارلادى.

«بۇۇ جۇيەسى كۇشتەپ نەكەگە وتىرعىزۋ ماقساتىندا ەركىنەن تىس ۇرلانعان قىزدىڭ ولىمىنە قاتىستى الاڭداۋلى. سوڭعى دەرەكتەرگە سايكەس، قىرعىزستاندا 13،8 پايىز 24 جاسقا دەيىنگى قىزدار كۇشتەپ تۇرمىسقا شىعادى. بۇۇ قىرعىزستانداعى زاڭسىز تاجىريبەنى ايىپتاپ، جويۋ تۋرالى ويدى تولىق قۇپتايدى»، - دەلىنگەن مالىمدەمەدە.

ۇيىمنىڭ مالىمدەۋىنشە، كۇشتەپ نەكە قيدىرۋ جەكە ادامنىڭ عانا قۇقىعىن شەكتەپ قويماي، قوعامنىڭ بەرەكەسىن قاشىرادى. قالىڭدىق ۇرلاۋ، كۇشتەپ نەكە قيدىرۋ، الىپ قاشۋ سىندى ارەكەتتەر قىرعىزستان سالتىنا دا، مادەنيەتىنە دە جات.

ەستەرىڭىزگە سالا كەتەيىك، 27 مامىردا 30 جاستاعى ەر ادام 19 جاستاعى بۇرۇلاي تۇردالييەۆانى قىزدىڭ ەركىنەن تىس الىپ قاشقان. ارتىنشا قىزدىڭ تۋىستارى پوليسياعا شاعىم تۇسىرەدى. جايىل اۋدانى سوسنوۆكا اۋىلىنىڭ ينسپەكتورلارى جىگىتتى قولعا ءتۇسىرىپ، بۇرۇلاي ەكەۋىن اۋداندىق ىشكى ىستەر بولىمىنە جەتكىزەدى. بىرەر ساعاتتان سوڭ ەر ادام قىزدى پوليسيا عيماراتىندا پىشقاتپا ولتىرەدى. قىزدىڭ تۋىستارى بولعان وقيعاعا قۇقىق قورعاۋ ورگاندارىنىڭ ءوزىن كىنالاپ وتىر. كۇدىكتى «كۇيەۋ جىگىت» ۇستالدى، تەرگەۋ شارالارى ءجۇرىپ جاتىر. ال ميليسيونەرلەرگە قاتىستى «نەمقۇرايلىلىق» بابى بويىنشا ءىس قوزعالماق.