اۋعانستاندا وسىدان 30 جىل بۇرىن ءىز-تۇسسىز جوعالىپ كەتكەن سوۆەت اسكەري ۇشقىشى ءتىرى تابىلدى. بۇل تۋرالى ريا نوۆوستي رەسەي دەسانتشىلار وداعىنىڭ باسشىسى ۆالەريي ۆوستروتينگە سىلتەمە بەرىپ حابارلايدى.

«بۇل ادام سەنگىسىز – عاجايىپ. ەندى ول قارجىلىق كومەكتەن بولەك، اكىمشىلىك، قوعامدىق ۇيىمداردىڭ كومەگىنە مۇقتاج»، - دەپ اتاپ ءوتتى ول.

ۇشقىشتىڭ ەسىمى – الەكساندر ميرونوۆ. كەيبىر دەرەكتەرگە سۇيەنسەك، ۇشقىش مىنگەن سوۆەت ۇشاعىن 1987 جىلى اۋعانستاندا اۋەدەن اتىپ تۇسىرگەن. "بويەۆوە براتستۆو" ارداگەرلەردىڭ حالىقارالىق قايىرىمدىلىق قورى وكىلدەرىنىڭ اگەنتتىككە ايتۋىنشا، اۋعانستاندا جوعالىپ كەتكەن ۇشقىش تۋرالى اقپاراتتى رەسەيگە اقش بەرگەن. ءبىراق اسكەري تۇتقىندار جونىندەگى رەسەي-امەريكالىق كوميسسيا وكىلى الەكساندر كيريلين "ريا نوۆوستي" اگەنتتىگىنە ماسكەۋ ۆاشينگتوننان اۋەدەن اتىپ تۇسىرىلگەن سوۆەت ۇشقىشى تۋرالى ەشقانداي اقپارات العان جوق دەپ مالىمدەگەن.

ءۆوستروتيننىڭ سوزىنشە، ۇشقىشتىڭ جاعدايى جۋىردا وتكەن «جاۋىنگەر باۋىرلار - Battle brotherhood» - «جاۋىنگەر قارىنداستار - Battle Sisterhood» ماراپاتىن تابىستاۋ راسىمىندە اۋعانستان وكىلدەرىمەن تالقىلانعان.

1979 جىلدىڭ سوڭىندا ساياسي كۇشتەر اراسىندا جانجال ورىستەپ تۇرعان اۋعانستانعا سوۆەت وكىمەتى اسكەر كىرگىزگەن. ولارعا قارسى سوعىسقان "مۇدجاحەدتەرگە" باتىس ەلدەرى قولداۋ تانىتقان. سوۆەت اسكەرى اۋعانستاننان 1989 جىلى شىعارىلعان. ون جىلدىڭ ىشىندە اۋعانستاندا، رەسمي ەسەپ بويىنشا، 14 مىڭ سوۆەت جاۋىنگەرى قازا تاپقان. بۇل سوعىسقا قازاق سسر-ىنەن اپارىلعان 22 مىڭ ساربازدىڭ 924ء-ى مەرت بولىپ، مىڭنان استامى مۇگەدەك بولىپ ورالعان. 21 قازاقستاندىق حابار-وشارسىز كەتكەن