قازاقستان جازۋشىلار وداعى باسقارماسىنىڭ ءتوراعاسى، اقىن ۇلىقبەك ەسداۋلەت 7 ماۋسىم كۇنى الاشتىڭ رۋحاني استاناسى – سەمەي قالاسىنىڭ زيالى قاۋىم وكىلدەرىمەن، شىعارماشىلىق جاستارمەن كەزدەستى.

بەلگىلى قالامگەر مەدەۋ سارسەكە، جازۋشىلار وداعىنىڭ شىعىس قازاقستان وبلىستىق فيليالىنىڭ جەتەكشىسى، اقىن الىبەك قاڭتاربايەۆ، قوعام قايراتكەرى ءتۇسىپحان تۇسىپبەكوۆ قاتىسقان كەزدەسۋدە ۇ.ەسداۋلەت شاھارداعى زيالى قاۋىمعا وداقتىڭ قولعا الىپ جاتقان جۇمىستارىن، الداعى جوسپارلارىن تانىستىردى. بۇگىندە وداقتاعى 800-دەن استام جازۋشىنىڭ 500ء-ى زەينەتكەر ەكەندىگىن، سوندىقتان ۇيىمعا تالانتتى جاستاردى مۇشەلىككە الۋ جاعىنا كوڭىل ءبولىنىپ جاتقاندىعىن ايتا كەلىپ، سەمەيلىك جاس اقىن مەرەي قارتوۆقا جازۋشىلار وداعىنىڭ مۇشەلىك بيلەتىن تابىس ەتتى.

جازۋشىلار وداعىنىڭ سەمەي قالالىق فيليالىن كوپ جىلدار كورنەكتى ابايتانۋشى توكەن يبراگيموۆ باسقارعانى بەلگىلى. جيىندا وسى فيليالدى جانداندىرۋ، وعان جاڭا باسشى تاعايىنداۋ جايىندا دا ءسوز قوزعالىپ، قازاقتىڭ تالانتتى اقىنى تىنىشتىقبەك ابدىكاكىموۆ، دراماتۋرگ ايبەك ساپىشيەۆ فيليال جەتەكشىلىگىنە جاس اقىن مەرەي قارتوۆتىڭ كانديداتۋراسىن ۇسىندى. باسقارما ءتوراعاسى ۇلىقبەك ەسداۋلەت ەلىمىزدىڭ بىرنەشە وبلىستارىندا وداق فيليالدارىنىڭ باسشىلارى ءوز تىلەكتەرىمەن اۋىستىرىلىپ جاتقانىنا توقتالىپ، سەمەي قالالىق فيليالىنىڭ جەتەكشىسىنە قاتىستى ۇسىنىستى قولدايتىندىعىن جەتكىزدى.

باسقوسۋدا ءسوز العان فيلولوگيا عىلىمدارىنىڭ دوكتورى اراپ ەسپەنبەتوۆ: «سەمەيدە جازۋشىلار وداعىنىڭ فيليالى بولۋى كەرەك دەگەنگە دۇرىس قارايمىن. ءداستۇرلى جەر عوي بۇل. ساباقتاستىق ۇزىلە قويماس. قالادا تالانتتى جاستار از ەمەس. ولاردىڭ كىتاپتارىن شىعارىپ، جازۋشىلار وداعىنا مۇشەلىككە وتۋلەرىنە قولعابىس جاساعانىمىز ءجون. قازىرگى جاعداي نەنى كورسەتەدى؟ «مەن جازۋشىمىن» دەگەننەن ەشتەڭە شىقپايدى. ءقازىر ۇيىمداستىرۋشى كەرەك. جازۋشىعا جاعداي جاسايتىن ادام كەرەك. مەنەدجەر كەرەك» دەي كەلە، سەمەيدە قولعا الىنىپ جاتقان «اباي الەمى» اتتى كىتاپتار سەرياسىنىڭ ءبىر كىتابىنا تالانتتى جاستاردىڭ دۇنيەلەرى توپتاستىرىپ بەرىلسە دەگەن ۇسىنىسىن العا تارتتى.

شىعىس قازاقستانعا جۇمىس ساپارىمەن كەلگەن قازاقستان جازۋشىلار وداعى باسقارماسىنىڭ ءتوراعاسى ۇلىقبەك ەسداۋلەتتى 8 ماۋسىمدا سەمەي قالاسىنىڭ اكىمى ەرماك ءسالىموۆ ارنايى قابىلدادى. كەزدەسۋدە ۇ.ەسداۋلەت وداقتىڭ سەمەيدەگى فيليالىنىڭ جاڭا باسشىسى مەرەي قارتوۆتى اكىمگە تانىستىردى.  ە.ءسالىموۆ فيليالعا قولدان كەلگەن كومەگىن ايامايتىنىن تىلگە تيەك ەتتى. كەزدەسۋ بارىسىندا وسىنداعى اباي مۋزەيىنىڭ ديرەكتورى بولات جۇنىسبەكوۆ فيليالعا مۋزەي ىشىنەن كونفەرەنسيا زالى بار جايلى دا قولايلى ورىن بەرۋگە ءازىر ەكەندىگىن، ال شاكارىم ۋنيۆەرسيتەتىنىڭ باسشىلىعى فيليالدى قاجەتتى جابدىقتارمەن جابدىقتاۋعا جاردەمدەسەتىنىن ايتتى. 

رەتى كەلگەندە ايتا كەتەيىك، 7 ماۋسىمدا سەمەيدەگى شاكارىم اتىنداعى ۋنيۆەرسيتەتتە ۇلىقبەك ەسداۋلەتتىڭ «اققۋ سىر، قاۋىرسىن ناز، قاناتتى ولەڭ» اتتى جاستارمەن كەزدەسۋ كەشى ءوتىپ، كەش اياسىندا وقۋ ورىنىڭ رەكتورى مەيىر ەسكەندىروۆتىڭ ۇيعارىمىمەن بيىل مەكتەپ بىتىرگەن ءۇش تالانتتى جاسقا اقىن اتىنداعى ءبىلىم گرانتى سالتاناتتى تۇردە تاپسىرىلدى.

ا.ءابىل