قىرعىزستاندىقتار قازاقستاننان مەنينگوكوكك ينفەكسياسى كەلگەنى جايلى حابارلامالار الىپ جاتىر. حابارلامادا تۇرعىندارعا قوعامدىق ورىندار مەن سالقىن ءتيۋى مۇمكىن جەرلەردەن اۋلاق ءجۇرۋىن ەسكەرتكەن.

«مەنينگيتتىڭ بىزگە كەلگەنى جايلى دايەكتى اقپارات بار. اباي بولىڭىزدار، بالالارىڭىزدى باقىلاپ جۇرىڭىزدەر. باسسەيندەرگە جولاتپاڭىزدار، سۋىق تيەتىن جەرلەرگە بارماڭىزدار، جەمىس-جيدەكتەردى جۋىپ جۇرىڭىزدەر»، - دەپ كەلتىردى Sputnik قىرعىزستان تۇرعىندارعا كەلىپ جاتقان حابارلاما مازمۇنىن.

قىرعىزستان دەنساۋلىق ساقتاۋ مينيسترلىگىنىڭ جۇقپالى اۋرۋلارىن باقىلاۋ جانە الدىن الۋ ءبولىمىنىڭ باستىعى دينارا وتوربايەۆا ەلدەگى جۇقپالى دەرتتىڭ تارالۋ دەڭگەيىنىڭ ازايعانىن مالىمدەدى.

«بۇل 15-20 جىلدا ءبىر رەت شىعاتىن سيكلدىك دەرت. ال دۇربەلەڭ تۋدىراتىن ادامدارمەن ۇلتتىق قاۋىپسىزدىك كوميتەتى اينالىسۋ كەرەك»، - دەدى وتوربايەۆا.

ال بۇدان بۇرىن قىرعىزستاندا ەكى بالانىڭ مەنينگيتتەن كوز جۇمعانى تۋرالى حابارلانىپتى. تەك دەنساۋلىق ساقتاۋ مينيسترلىگى بۇل اقپاراتتى جوققا شىعاردى.

ايتا كەتەيىك، قازاقستاندا 2018 جىلدىڭ باسىنان بەرى 13 ادام مەنينگيت دەرتىنەن كوز جۇمدى. ولاردىڭ التاۋى – بالالار. جۇقپالى دەرتتەن زارداپ شەككەندەردىڭ باسىم بولىگى الماتىدا تىركەلگەن.

دۇيسەنبى كۇنى الماتىدا مەنينگيتكە شالدىقتى دەگەن كۇدىكپەن بالا اۋرۋحاناعا ءتۇستى.