استانادا ماڭىزدى شارا بولادى، يا بولماسا سىيلى قوناقتار كەلەدى دەسە، مۇنداعى قاڭعىباستاردىڭ مازاسى قاشادى. بىلتىر ەكسپو حالىقارالىق كورمەسى كەزىندە ولاردى قالادان قوقىس قۇساپ شىعارىپ تاستاعانى جايىندا ايتقان ەدىك. بيىل ەلوردانىڭ 20 جىلدىعى قارساڭىندا ۇي-كۇيسىز جۇرگەندەردى تاعى ءبىر بەلگىسىز باعىتقا ساياحات كۇتىپ تۇر ما؟ بۇل تۋرالى ەۋرازيا ءبىرىنشى ارناسى حابارلايدى.  
 
استانادا ۇي-كۇيسىز جۇرگەن ادامداردى تابۋ قيىن ەمەس. ءبىز وڭ جاڭالاۋداعى تۇرعىن ۇيلەردىڭ ماڭىنا كەلىپ جەتتىك. بۇل جەردە ەربول مەن تاتيانا اشىق اسپان استىندا ءومىر ءسۇرىپ جاتىر. ۇرلىق جاسامايدى، بالالارعا تيىسپەيدى. قوقىستان تاپقان دۇنيەلەر بار بولسا، سونى وتكىزىپ، ءشايىن، نان-پۇلىن الىپ جاتقان جايى بار.  

«ەتو كاجدىي گود جە تاك. ۆىۆوزيات! ۆسەح ۆىكينۋلي. وتتۋدا پەشكوم شلي». 

ەربول مەن تاتيانانىڭ بۇل كۇنگە دەيىنگى باستان كەشكەندەرى دراما مەن تريللەرگە تولى فيلم بە دەرسىڭ. قاڭعىباس تىرلىك، مەرەكە سايىن قاماۋ. سوڭعى رەت ولاردى بالالاردى قورعاۋ كۇنى قارساڭىندا بازار ماڭىنداعى وڭالتۋ ورتالىعىنا اپارىپ تىعىپتى. ايتۋلارىنشا، وندا ادام توزگىسىز جاعدايدا بولىپتى. ءتىپتى، ءۇش كۇن بويى تاماق بەرمەي ۇستادى دەيدى.   

«ءۇش كۇن بويى ءبىزدى سوندا ۇستادى. ەكەۋىمىزدىڭ دە اۋرۋىمىز باسىمىزدان اسادى. ول دا، مەن دە جەتىمدەر ءۇيىنىڭ تۇلەگىمىز. باسپانا تۇرماق، قۇجاتتارىمىزدى قايتا قالپىنا كەلتىرە الماي ءجۇرمىز. ادام قۇساپ جۇمىسقا كىرەيىن دەسەڭ دە جولاتپايدى» - دەيدى تاتيانا كيم.   

بۇل جۇپتىڭ كەزبە اتانعانىنا 10 جىلعا جۋىقتاعان. كەي ادامدار تەپكىنىڭ استىنا السا، جانى اشيتىن مەيىرىمدى جاندار بەي-جاي قاراماي، قول ۇشىن سوزادى ەكەن.

«اينالاداعى تۇرعىندار نان، تاماق اكەپ بەرەدى قولدان كەلگەنشە. ولار مەنىڭ مۇگەدەك ەكەنىمدى بىلەدى. وسى جەردىڭ كۇزەتشىلەرى ماعان ەشكىم تيىسپەسىن دەپ قاراپ جۇرەدى. جاقىندا جاسىم ەلۋگە كەلەدى. ەشتەڭەدەن قورىقپايتىن بولدىق. قالادان قۋامىز دەسە قۋا بەرسىن» - دەيدى ەربول ايىمبەتوۆ. 

بۇل ەكەۋىن ۇي-كۇيسىز دەمەسەڭ، اينالاسىن شاشىپ، ەلدىڭ مازاسىن المايدى. سوندىقتان، كورشى-قولاڭ ولاردى قوعامنان الاستاتا بەرمەي، بۇل پروبلەماعا باسقا قىرىنان قاراۋ كەرەك شىعار دەگەن پىكىردە. 

«كومەكتەسۋ كەرەك، كىشكەنە پوددەرجكا بەرىپ كورۋ كەرەك، يسپىتاتەلنىي سروك بەرىپ. مىنا كىسى ادام بولا ما، ادام بولماي ما دەگەن سياقتى. ەگەر ادامگەرشىلىگى بار ادام بولسا، وندا ول ادام بولىپ كەتەدى».

«استانا بولعاننان كەيىن حالىقتىڭ سانى كۇننەن كۇنگە كوبەيىپ جاتىر، تۋريستەر كەلىپ جاتىر. سول كىسىلەردىڭ الدىندا باسىمىزدى جەرگە قاراتپاي، ءبىر جەرگە ورنالاستىرىپ، سولاي تىنىشتالاتىن سياقتى بۇل».

ال الەۋمەتتانۋشى ماماندار بولسا، بۇل ماسەلەنى ءبىرجاقتى شەشۋ ءۇشىن جاۋاپتى ورگاندار قاعاز كۇيىندە ەسەپ بەرۋدى قويىپ، ناقتى ىسكە كىرىسكەندە عانا ناتيجە بولادى دەيدى. ايتپەسە ءبارى بەكەر ەكەنىن اشىق ايتىپ وتىر.

«ءاربىر مەملەكەتتىك ورگان، مەكەمە باسقا مەكەمەلەرمەن بايلانىستا بولۋى كەرەك. بۇل جەردە ونداي بايلانىستى كورىپ تۇرعان جوقپىز. سوندىقتان وزدەرىنىڭ ءبىر شەشىمدەرىن قابىلداپ، قاتىگەزدىك سياقتى ءادىس تاسىلدەردى قولدانىپ جاتىر. ول ارينە دۇرىس ەمەس» - دەيدى الەۋمەتتانۋشى ايدار حاميت.   

استانانىڭ 20 جىلدىعى قارساڭىندا قوعامدىق ءتارتىپتىڭ قالاي ساقتالاتىنى جايىندا اقپارات بەرگەن ىشكى ىستەر مينيسترلىگى وكىلدەرى بولسا، وتكەن جىلى قاڭعىباستاردى قالادان قۋدى دەگەن الىپقاشپا اڭگىمە دەپ سەندىرىپ باقتى. بيىل دا ولارعا قول تيگىزەتىن ويلارى جوق ەكەن. 

«استانادا ارنايى وڭالتۋ ورتالىعى بار. ەگەر ادامنىڭ ناقتى تۇرعىلىقتى جەرى مەن قۇجاتى بولماسا، ونى اتالعان ورتالىققا جەتكىزەدى. سەبەبى، ونىڭ كىم ەكەنىن انىقتاۋ قاجەت. ءالى ەسىمدە، ەكسپو كەزىندە قاڭعىباستاردى باسقا جاققا كوشىرۋگە قاتىستى الىپقاشپا اڭگىمە كوپ بولعان. استانا كۇنىن تويلاۋ كەزىندە ونداي شارالار بولمايدى. ۇشاقپەن دە، پويىزبەن دە ەشكىمدى كوشىرمەيمىز» - دەيدى ق ر ءىىم اكىمشىلىك پوليسيا كوميتەتىنىڭ ءتوراعاسى يگور لەپەحا. 

تۇرمىسى مەن تىرشىلىگى قايناعان استانانى ارماندار ورىندالاتىن مەكەن دەپ اسپەتتەگەندە، الدىمىزعا جان سالمايمىز. قۇجاتىن تۇگەندەپ، زاڭدى ۇيىمىزگە قول جەتكىزسەك دەگەن ءۇمىت ەربول مەن تاتيانادا دا بار. ءبىراق، ولاردىڭ ماقساتىنىڭ ورىندالۋى ەكىتالاي ەكەنى تۇسىنىكتى. بۇل جايتپەن ەكەۋى دە كوندىككەن سىڭايلى.