شەكارانى زاڭسىز كەسىپ ءوتتى دەگەن ايىپپەن بۇگىندە تالدىقورعان قالاسىنداعى تەرگەۋ يزولياتورىندا وتىرعان ەتنيكالىق قازاق سايراگۇل ساۋىتباي قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆقا حات جازدى. سايراگۇلدىڭ حاتىن جۋرناليست ساۋلە ابەدينوۆا Facebook-تەگى پاراقشاسىندا جاريالادى. توتە جازۋمەن جازىلعان حاتتىڭ قازاقشاعا اۋدارىلعان نۇسقاسى تومەندەگىدەي:

قازاقستان رەسپۋبليكاسىنىڭ پرەزيدەنتى 
نۇرسۇلتان ءابىش ۇلى نازاربايەۆقا 
تالدىقورعان قالاسى 
لا 155116 مەكەمەسىندەگى قاماۋداعى ساۋىتباي سايراگۇلدەن

ءوتىنىش حات

قۇرمەتتى نۇرسۇلتان ءابىش ۇلى!

مەن، ساۋىتباي سايراگۇل 05.04. 2018جىلى قازاقستان-قىتاي شەكاراسىن زاڭسىز ءوتتىم. بۇل زاڭسىز ارەكەتىمنىڭ باستى ماقساتى – وتباسىممەن قاۋىشۋ، بەيبىت ءومىر كەشۋ.

2016جىلدان بەرى ەكى بالاممەن جولداسىم ، قازاقستاننىڭ تولىققاندى ازاماتى بولدى. ال مەن قىتايدا مەملەكەتتىك قىزمەتتە بولعاندىقتان قازاقستانعا كەتۋگە ۇزىلدى-كەسىلدى تىيىم سالىندى. ونداعى ماسەلە، مەنىڭ مەملەكەتتىك قىزمەتكەر رەتىندە ماڭىزدى جينالىستارعا قاتىسىپ، قىتايدىڭ ىشكى ساياساتىنداعى دۇنيەنى قازاقستانعا جاريا ەتەدى دەگەن قورقىنىش . ءدال قازىرگى ۋاقىتتا قىتايداعى قازاعىمنىڭ جاعدايى وتە اۋىر، ادام سەنگىسىز جاعدايدى باستان كەشىرىپ جاتقاندىعىن سىزگە ەلباسى رەتىندە جەتكىزگىم كەلەدى. بۇگىنگى تاڭدا قىتايدا قازاق حالقىن تۇپكىلىكتى جويۋ ساياساتى جۇرگىزىلۋدە . شىركىن، وسى قاتىگەز ساياساتقا توسقاۋىل بولا الساق قوي!

ۇلتى قازاق اتاۋلىنىڭ بارلىق جەكە باس قۇجاتتارى زاڭسىز تاركىلەنىپ، " ساياسي لاگەر" اتتى لاقاپ اتانعان ، شىن مانىندە تۇرمەگە جابىلىپ، ۇشتى-كۇيلى جوق بولۋدا. قۇجاتسىز ادامدى تابۋ مۇلدەم مۇمكىن ەمەس ەكەندىگى بارشامىزعا ايان!

سول كوپشىلىكتىڭ ىشىندە ، مەنىڭ دە قۇجاتتارىمدى تارتىپ العاندىقتان، قالايدا بالا-شاعاما جەتىپ الۋدى ءجون كوردىم. 

اتامەكەنىمدە بۇل زاڭسىز ارەكەتىم ءۇشىن جاۋاپقا تارتىلۋعا دايىنمىن. 

قۇرمەتتى ەلباسى!

سىزدەن وتىنەرىم ماعان ۇل-قىزىممەن، جولداسىممەن قوسىلىپ تولىققاندى وتباسى بولۋعا مۇمكىندىك بەرۋىڭىزدى سۇرايمىن!

ماعان قازاقستاننىڭ ازاماتتىعىن بەرۋىڭىزدى سۇرايمىن، بۇل - مەنىڭ ەڭ باستى ارمانىم، سەبەبى، مەنىڭ ۇلتىم - قازاق.

قۇرمەتپەن ، س.ساۋىتباي.

20.06. 2018ج

بيىل ءساۋىردىڭ ورتاسىندا قازاقستانعا وتكەن سايراگۇلدى مامىردىڭ 22ء-سى كەشكە 21.00-21.30-دار شاماسىندا شەكارا قىزمەتكەرلەرى، ۇيىندە وتىرعان جەرىنەن ۇستاپ اكەتكەن. سەبەبى ايەل قازاقستان شەكاراسىنان قۇجاتسىز وتكەن. ال ايەلىنىڭ قۇجاتسىز قالاي وتكەنىنەن جولداسى ءۋالي ءسىلام حابارسىز ەدى. العاشىندا جاركەنتتىڭ ۋاقىتشا تەرگەۋ يزولياتورىندا وتىردى. بىر-ەكى اپتا بۇرىن تالدىقورعان ۋاقىتشا تەرگەۋ يزولياتورىنا اۋىستىردى.