جۋىردا عانا قىزىن جۇڭگو ۇلتىنىڭ ازاماتىنا بەرگەن سۇلەيمەن اسقار باعىت ۇلى Zakon.kz رەداكسياسىنا اشىق حات جىبەرىپتى. اكەسىنىڭ ايتۋىنشا، قىزىن جۇڭگو ازاماتىنا بەرۋگە تۋىستارى مەن جاقىندارى ءاۋ باستا قارسى بولعان. الايدا جاستاردىڭ ماحابباتىنا كوزدەرىن جەتكىزگەن ولاردىڭ كونبەسكە امالى قالماعان. قىتايلىقتارمەن قۇداندالى بولعان اكە حاتىنىڭ مازمۇنى تومەندەگىدەي:

مەن، سۇلەيمەن اسقار باعىت ۇلى ءوزىمنىڭ اعايىن تۋىسقاندارىما، دوستارىما، جۇمىستاستارىما جانە بارلىق مەن تانيتىن اعايىندارعا قىزىمنىڭ جۇڭگو ازاماتىنا تۇرمىسقا شىعۋىنىڭ سەبەبىن شىنايى جەتكىزگىم كەلەدى.

اكەسى رەتىندە قىزىمنىڭ جۇڭگو ازاماتىنا تۇرمىسقا شىعۋىنا بايلانىستى الەۋمەتتىك جەلىلەردە ايتىلىپ جاتقان سىندارعا، اتاپ ايتقاندا بايىبىنا بارماي، جامانداپ، قارعاپ - سىلەپ، نە ءبىر جامان سوزدەرمەن اتا- اناسىن، اعايىن-تۋماسىن جانە جاستاردى كىنالاپ، قورقىتىپ-ۇركىتىپ جاتقاندارىڭىز وتە وكىنىشتى.

«ساۋاتسىز، نامىسسىز، جاعدايى جوق. قىزدارىن جۇڭگو جىگىتىنە ساتىپ جاتىر» دەگەن جالعان اقپارات تاراتۋلارىڭىز سەبەپسىز.

قىزىم 2012-2016 جىلدار ارالىعىندا ماسكەۋ قالاسىنداعى رەسەي حالىقتار دوستىعى ۋنيۆەرسيتەتىن (رۋدن) قىزىل جوعارى بىلىممەن ءبىتىرىپ، ەلىنە قازاقستانعا كەلدى. ءبىلىمىن جەتىلدىرۋ ءۇشىن (ماگيستراتۋرا) 2016-2018 جىلدارى الماتى قالاسىنداعى اlmaU (الماتى مەنەدجمەنت ۋنيۆەرسيتەتى) ماگيستر اتاعىن الىپ شىقتى. سودان انگليا ، مالايزيا ەلدەرىندە تاعىلىمدامادان وتكەن بولاتىن. وسى ەكى جىل ىشىندە جۇڭگو ازاماتىمەن بىرگە تانىسىپ، بىرگە وقىپ، بىرگە تاعىلىمدامادان ءوتىپ جاقسى تانىستىققا اينالىپ، ارتى شىنايى سەزىمگە ۇلاسادى.

اتا-اناسىنا، تۋعان ۇيىنە كەلىپ ءوز ويىن، جۇرەك قالاۋىن، سەزىمىن جەتكىزگەن بولاتىن. ارينە جۇڭگو حالقىن بىلەتىنىمىز بار، بىلمەيتىنىمىز بار. قازاق حالقىنىڭ كوزقاراسىنا بايلانىستى قارسى بولدىق. قارسىلىعىمىز ەكى جىلعا سوزىلدى. ءبىراق سول ۋاقىتتىڭ ىشىندە بالالارىمىزدىڭ بىر-بىرىنە دەگەن شىنايى سەزىمدەرىنە كوزىمىز انىق جەتىپ ءوز رۇقساتىمدى بەردىم. بۇنداي جاعدايدى باسىنا تۇسپەي، جۇرەكپەن سەزبەي باسقا ادام بالاسى دۇرىس تۇسىنە المايدى دەپ ويلايمىن.

مەنىڭ اكە رەتىندە الدىمدا تاڭداۋ تۇردى: ەكى جاستىڭ قول ۇستاسىپ قۇزدان قۇلاۋىنا نەمەسە ءوز ابىرويىمدى ويلاپ قالۋىم. مەن ەكى جاستىڭ باقىتى مەن اماندىعىن تاڭدادىم.

قازاقتىڭ اتا سالت-داستۇرىمەن قۇدا ءتۇسىپ، الماتى قالاسىندا ۇزاتۋ تويىن جاسادىم.

قازاق قىزىنىڭ قازاق تاريحىندا ءبىرىنشى بولىپ مەنىڭ قىزىم جۇڭگو ازامىتىنا تۇرمىسقا شىعىپ جاتىر ما ەدى؟ قازاقستاندا 2010 -2016 جىلدار ارالىعىندا 253 قازاقستان ازاماتشالارى جۇڭگو ازاماتتارىمەن تۇرمىس قۇرسا، 277 جۇڭگو ازاماتشالارى قازاق ازاماتتارىمەن تۇرمىس قۇرعان.
جۇڭگو حالقى جاۋ بولسا 1،5 ملن قازاق باۋىرلارىمىز سول ەلدە قالاي تۇرىپ جاتىر؟ مەن تاڭقالاتىنىم، جۇڭگو حالقىڭ جاۋ قىلىپ كورسەتىپ وتىرعان، جالعان اقپارات تاراتىپ جۇرگەن ادامدار سونىڭ ىشىندە ەلگە تانىمال ازاماتتار سىزگە دە، بىزگە دە جاقسىلىق تىلەپ جۇرگەن ادامدار ەمەس. بۇگىنگى تاڭدا قازاقستان ەلىندە 130-دان اسا ۇلت وكىلدەرىنىڭ اۋىزبىرشىلىگىمەن تىنىشتىعىن بۇزۋ دەپ ويلايمىن.

ماۋسىم ايىنىڭ 15-نەن باستاپ الەۋمەتتىك جەلىلەرىندە (Facebook، Instagram، whatsapp) تانيتىن جانە تانىمايتىن تۇلعالاردىڭ ماعان، جانۇياما،اعايىن – تۋماما ايتىلىپ جاتقان سىندارعا، بايىبىنا بارماي، جامانداپ، قارعاپ - سىلەپ، نە ءبىر جامان سوزدەرمەن كىنالاپ، قورقىتىپ-ۇركىتۋىنە جول بەرگەن، فوتو، بەينەجازبالاردى تاراتقان جاناشىر دەگەن قوناقتارىمىزدىڭ بۇل ءىسىن ەشقانداي تۇسىنە الماي وتىرمىن. وسىنداي اقپارات تاراتىپ جازىپ وتىرعان ادامدار سىزدەر دە ۇل-قىز ءوسىرىپ وتىرسىزدار، الدارىڭىزدا نە كۇتىپ تۇرعانىنا كىم كەپىل؟

بەتىمىزگە كۇلە قاراپ، قۋانىشىمىزبەن قايعىمىزعا ورتاقتاسا ءجۇرىپ بۇل نە ىستەگەندەرىڭىز؟ بۇدان بولەك ءبىزدىڭ جاعدايىمىزدى ءتۇسىنىپ تانىسا دا، تانىماسا دا تۇسىنىستىكپەن كاراعان باۋىرلارىمىزعا باس يەمىز. "قىتايعا قىزىڭدى بەردىڭ"، "نەگە ءولتىرىپ تاستامايسىز" دەپ ايتىپ، جازىپ جاتقان ادامدارعا ايتارىم سابالاراڭىزعا ءتۇسىپ، اللادان قورقىڭىز دەگىم كەلەدى. باسىمدا بولىپ جاتقان جاعدايدى ءبىر اللانىڭ ءوزى رەتتەپ، ءبىر اللا جار بولسىن.