«اقكەنت» تۇرعىن ءۇي كەشەنى جانىندا اعاشتىڭ تۇبىنەن اۋىر حالدەگى 5 جاستاعى بالا تابىلدى، دەپ حابارلايدى Qamshy.kz اقپارات اگەنتتىگى. ونى كولىك قاعىپ كەتكەن. كولىك جۇرگىزۋشىسى دىنمۇحاممەد ەسىمدى بالانى اۋرۋحاناعا اپارۋدىڭ ورنىنا كىر توسەنىشكە وراپ  اعاشتىڭ تۇبىنە تاستاپ كەتكەن.

ادامدار بالانى بايقاپ قالىپ دەرەۋ جەدەل جاردەمدى شاقىردى. دىنمۇحاممەد ءقازىر جان ساقتاۋ بولىمىندە جاتىر. دەپۋتات قايرات قۇدايبەرگەن ءوزىنىڭ Facebook پاراقشاسىندا پوليسيا بالانى كىم قاقققانىن انىقتاعانىن جازدى.

«پوليسيا قىلمىسكەردىڭ كىم ەكەنىن انىقتادى. ونى ۇستاۋ 1، 2 كۇننىڭ ەنشىسىندەگى ءىس. «نۇر وتان» پارتياسىنىڭ دەپۋتاتى جانە ادام رەتىندە بالانىڭ جاعدايىن ءبىلۋ ءۇشىن اۋرۋحاناعا بارامىن.  «ترانسفورماتور قازاقستان» كلۋبىنىڭ مۇشەلەرى، كاسىپكەرلەر دىنمۇحاممەدتىڭ ەمىنە كەتەتىن بارلىق شىعىندى ءوز مويىندارىنا الدى. قىلمىسكەردىڭ ويىندا نە بولعانىن بىلمەيمىن، ءبىراق ادام ءيتتى دە تاستامايدى. جازا زاڭ جۇزىندە وتە قاتال بولادى!» دەپ جازدى دەپۋتات.