16 شىلدەدە فينليانديانىڭ حەلسينكي قالاسىندا اقش جانە رەسەي پرەزيدەنتتەرى دونالد ترامپ پەن ۆلاديمير ءپۋتيننىڭ كەزدەسۋى باستالدى. ترامپ پەن ءپۋتيندى فينليانديا پرەزيدەنتى ساۋلي نينينيستە پرەزيدەنت سارايىندا قارسى الدى.

كەزدەسۋ بارىسىندا ترامپ ءپۋتيندى الەم چەمپيوناتىنىڭ ءساتتى وتۋىمەن قۇتتىقتادى. ءارى ساۋدا، يادرولىق قارۋ، ەكى ەل اراسىنداعى قارىم-قاتىناس، حالىقارالىق ماسەلەلەر ءسوز بولدى.

ترامپ ەكى جاقتى كەلىسسوزدەردىڭ جوعارى دارەجەدە وتكەنىن، ءدال مۇنداي ناتيجە كۇتپەگەنىن مالىمدەدى.

اقش مەملەكەتتىك حاتشىسى مايك پومپەومەن كەزدەسكەن رەسەي ءسىم باسشىسى سەرگەي لاۆروۆ تا كەلىسسوزدەردىڭ ءساتتى وتكەنىن ايتتى. «ءبارى مەن ويلاعاننان دا كەرەمەت بولدى»، - دەدى ول.

پرەزيدەنت سارايىنداعى جاعدايدى BBC بىلاي سيپاتتادى: ءسامميتتىڭ باسىندا ەكى پرەزيدەنتتىڭ دە قاباعى قاتۋلى بولدى. ءتىپتى بىر-بىرىنە قاراعان دا جوق. ۇزاق اڭگىمە جانە اۋقىمدى كەلىسسوزدەردەن سوڭ كوڭىلدەرى جايلاندى. باسپا ءسوز ءماسليحاتى بارىسىندا ەكەۋىنىڭ دە كوڭىلدەرى كوتەرىڭكى بولدى. جۋرناليستەردىڭ سۇراقتارىنا بىر-بىرىمەن «جارىسا» جاۋاپ بەردى.

ال امەريكالىق ساياساتكەرلەر پۋتينمەن كەزدەسكەن ترامپتى جاپپاي سىنعا الدى.

حەلسينكيدەگى سامميتتەن سوڭ پۋتينمەن باسپا ءسوز كونفەرەنسياسىن وتكىزگەن ترامپ ارناۋلى پروكۋرور روبەرت ميۋللەردىڭ تەرگەۋىن امەريكا ءۇشىن «قاسىرەت» دەپ اتادى.

امەريكالىق رەسپۋبليكاشىل سەناتور، قارۋلى كۇشتەر كوميتەتىنىڭ مۇشەسى ليندسي گرەم ادەتتە ترامپتى قولدايتىن. ءبىراق ترامپتىڭ دۇيسەنبى كۇنگى مالىمدەمەلەرىن اقش-تىڭ «السىزدىگى» دەپ باعالادى.

گرەم Twitter پاراقشاسىنا: «پرەزيدەنت ترامپ رەسەيدى 2016 جىلى سايلاۋعا ارالاسقانى ءۇشىن جاۋاپقا تارتىپ، الداعى سايلاۋعا ارالاسپاۋ جايلى قاتاڭ ەسكەرتۋ جاساۋ مۇمكىندىگىن جىبەرىپ الدى. ترامپتىڭ مۇنداي مالىمدەمەسىن رەسەي السىزدىك دەپ تۇسىنەدى. مۇنىڭ شەشكەنىنەن گورى تۋدىرعان ماسەلەسى كوپ» دەپ جازدى.

رەسپۋبليكاشىل سەناتور دجون ماككەين «حەلسينكيدەگى باسپا ءسوز كونفەرەنسياسى – امەريكا پرەزيدەنتىنىڭ تاريحتاعى ەڭ ماسقارا بولعان كەزى. ترامپتىڭ اڭعالدىعىنان، وزىمشىلدىگىنەن، شىندىقتى بۇرىس قابىلداۋى مەن اۆتوريتارلى باسشىلارعا سىڭارجاقتىعىنان كەلگەن زالالدى باعالاۋ قيىن» دەدى.