جىل سايىن 5 تامىزدا اتاپ وتىلەتىن مەدياسيا كۇنىنىڭ قارساڭىندا ق ر قوعامدىق دامۋ مينيسترلىگى ازاماتتىق قوعام ىستەرى كوميتەتىنىڭ باستاماسىمەن ق ر جوعارعى سوتىمەن بىرلەسە وتىرىپ، مەدياسيا ماسەلەلەرى بويىنشا قوعامداستىق پەن مەملەكەتتىڭ ءوزارا ءىس-قيمىلىن  جاقسارتۋ ماقساتىندا «قازاقستانداعى مەدياسيا: جاعدايى مەن بولاشاعى» اتتى ديالوگ الاڭى  بولىپ ءوتتى، دەپ حابارلايدى Qamshy.kz اقپارات اگەنتتىگى. 

مەدياسيا – بۇل بەيتاراپ تۇلعا-مەدياتوردىڭ نەمەسە سوت مەدياسياسىنىڭ قاتىسۋىمەن شيەلەنۋشى تاراپتاردى ەرىكتى كەلىسسوز جولى ارقىلى تاتۋلاستىرۋ ءۇردىسى.

داۋلى ماسەلەلەردى شەشۋ كەزىندە تاتۋلاسۋ ۇردىستەرىن كەڭىنەن قولدانۋ ەلباسىنىڭ «100 ناقتى قادام» ۇلت جوسپارىندا قويىلعان مىندەتتەردىڭ ءبىرى بولىپ تابىلادى.

ديالوگ الاڭى جۇمىسىنا مەملەكەتتىك ورگانداردىڭ، ۇكىمەتتىك ەمەس ۇيىمداردىڭ جانە بۇقارالىق اقپارات قۇرالدارىنىڭ وكىلدەرى قاتىستى.

تالقىلاۋ بارىسىندا مەدياسيانى جانە وزگە تاتۋلاسۋ ۇردىستەرىن دامىتۋ، قازاقستاندا مەدياسيانى قولدانۋدىڭ تاجىريبەسى، مەكتەپتەگى دەلدالىق جانە مەدياسيانى كاسىپوداقتار ۇيىمدارى جانە باسقالارىنىڭ جۇمىسىندا قولدانۋ ماسەلەلەرى قوزعالدى.

ديالوگ الاڭىنىڭ مودەراتورى ق ر قدم ازاماتتىق قوعام ىستەرى كوميتەتىنىڭ ءتورايىمى ءاليا عالىموۆانىڭ ايتۋى بويىنشا، مەدياسيانى الەۋمەتتىك ءومىر مەحانيزمدەرىنە ەنگىزۋ ازاماتتىق قوعام ينستيتۋتتارىنىڭ دامۋىنا اسەر ەتەدى.

مەدياسيا داۋلاردى شەشۋدىڭ بالامالى ءتۇرى جانە ەڭ تانىمال فورماسى بولىپ تابىلادى. دامىعان مەملەكەتتەردىڭ ستاتيستيكاسى مەدياسيا ءۇردىسىنىڭ 83-85% ءتيىمدى ەكەندىگىن كورسەتتى. مەدياسيا ازاماتتىق قوعامنىڭ نەگىزى، دەموكراتيا مەن جاھاندانۋدىڭ جولى دەگەن پىكىر قالىپتاسقان. مىسالعا، قازاقستاندا مەدياسيانى دامىتۋ ورتالىعىنىڭ مالىمەتتەرى بويىنشا 2018-گە جۋىق مەدياتور 24 147 داۋدى شەشكەن.

دوڭگەلەك ۇستەلدىڭ ناتيجەسى بويىنشا قاتىسۋشىلار مەدياسيانى دامىتۋعا ءبىرقاتار ۇسىنىستار ايتتى. جالپىلاي العاندا، ۇسىنىستار زاڭناما بازاسىن جەتىلدىرۋ، مەدياسيا ورتالىقتارىن قۇرۋ، ازاماتتىق قوعام ينستيتۋتتارىن تارتۋمەن اقپاراتتىق-ناسيحاتتاۋ جۇمىسىن جۇرگىزۋگە قاتىستى.

سونىمەن قوسا، مەدياسيانى جانە وزگە دە تاتۋلاستىرۋ ۇردىستەرىن قولدانۋ ارقىلى قوعامداعى شيەلەنىس دەڭگەيىن تومەندەتۋ ماقساتىندا قوعامدىق دامۋ مينيسترلىگى مەن جوعارعى سوت اراسىندا ىنتىماقتاستىق جونىندەگى مەموراندۋمعا قول قويۋ جوسپارلانۋدا.