بۇكىلحالىقتىق «I`m a singer Kazakhstan» تالانت-شوۋىنىڭ 100 قاتىسۋشىسى اۋقىمدى جوبانىڭ ەكىنشى ماۋسىمىنىڭ ءتۇسىرىلىمىن باستاپ كەتتى. شوۋدى جاساۋعا قازاقستاننىڭ، ۋكراينانىڭ، رەسەيدىڭ ەڭ مىقتى ماماندار توبى جۇمىلۋدا.

العاشقى ىرىكتەۋ كەزەڭى سانالاتىن ءۇش كۇننەن كەيىن جەڭىس ءۇشىن كۇرەسۋ باقىتى 100 قاتىسۋشىنىڭ ۇشتەن بىرىنە عانا بۇيىرادى. بايقاۋعا قاتىسۋعا الەمنىڭ 9 ەلىنەن بىرنەشە مىڭداعان ۇمىتكەر تالاپ ءبىلدىردى. ولاردىڭ ىشىندە قازاقستانعا اتى ءماشھۇر «Melo’Men» توبىنىڭ ءانشىسى عابيت تە بار.

• تالانت-شوۋ تۋرالى وسىدان ەكى اپتاداي ۋاقىت بۇرىن ارىپتەستەرىمنەن ەستىپ ءبىلدىم، - دەيدى عابيت. – ولار ماعان قاتىس دەپ قولقا سالدى. نەگىزىندە، توپ بولىپ قاتىسقىمىز كەلگەن. سويتسەك، ولاي ىستەۋگە بولمايدى ەكەن. سودان سوڭ جىگىتتەر مەنىڭ قاتىسقانىمدى قالايتىندارىن ايتتى. بۇل شوۋدا جەڭىپ شىعاتىنىما 100 پايىز سەنىمدىمىن. بۇل مەنىڭ جوبام. باسقا قاتىسۋشىلارعا ساتتىلىك، ال وزىمە جەڭىس تىلەيمىن!

ەستەرىڭىزگە سالساق، بۇعان دەيىن شوۋ ۇيىمداستىرۋشىلار ماقپال يسابەكوۆامەن كەلىسسوز جۇرگىزىپ، ساراپشى-قازىلار القاسىنىڭ قۇرامىنا بەكىتكەن بولاتىن. قازىلار القاسىنىڭ قۇرامىندا ودان بولەك تە ەلىمىزگە تانىمال انشىلەر بار. ولاردىڭ ءبىرى حالىق ءارتىسى ماقپال ءجۇنىسوۆا بولسا، ەندى ءبىرى «مۋزارت» توبىنى ءانشىسى ساكەن مايعازييەۆ. سونداي-اق، قازاقستاندىق انشىلەردىڭ ءبىرازى قۇرمەتتى قوناق رەتىندە، ساحناعا شىعىپ، ونەر كورسەتەدى. ايتا كەتسەك، شوۋ بارىسىندا ۇزدىك ءانشىنى تاڭداۋعا تەك قانا قازىلار القاسى ەمەس، سونىمەن بىرگە ستۋدياداعى جانە ەكران سىرتىنداعى كورەرمەندەر ءبىر كىسىدەي اتسالىسا االدى. تەلەكورەرمەندەر وزدەرىنە ۇناعان انشىگە سمس-حابارلاما ارقىلى داۋىس بەرۋ قۇقىنا يە بولادى. 

بۇكىلحالىقتىق شوۋدىڭ ەكىنشى ماۋسىمى بيىل 9 قىركۇيەك كۇنى ەفيرگە جول تارتادى. جۇلدە قورى بۇرىن-سوڭدى قازاقستاندا بىردە-بىر بايقاۋدا بولماعان سوما، ياعني 50 000 000 تەڭگەنى قۇرايدى.

2017 جىلى كۇز-قىس تەلەماۋسىمىنىڭ ەڭ اۋقىمدى مۋزىكالىق وقيعاسى اتانعان «I’m a Singer Kazakhstan» جوباسىنىڭ ءبىرىنشى ماۋسىمىنا الەمنىڭ 6 ەلىنەن ەڭ مىقتى 8 كاسىبي ءان ورىنداۋشى قاتىسىپ، كورەرمەننىڭ ەرەكشە ىقىلاسىن وياتقان بولاتىن. جوبا الەمنىڭ التى ەلىندە ترانسلياسيالانىپ، 200 ميلليونعا جۋىق كورەرمەندى قامتىدى. «I’m a Singer Kazakhstan» شوۋىنىڭ ءبىرىنشى كەزەڭىندە قازاقستاندىق ءانشى قايرات تۇنتەكوۆ جەڭىسكە جەتتى. جوبا تۋرالى تولىعىراق singer.31.kz. سايتىنان بىلە الاسىزدار.