تاياۋدا الەۋمەتتىك جەلىلەردە "70 جاسىندا تۇرمىسقا شىقتى"، "70-كە كەلىپ ۇزاتىلدى" دەگەن ۆيدەولار تارادى. وسى جاعداي جۇرتتى قىزىقتىرماي قويماعانى انىق، سەبەبى سان ءتۇرلى پىكىرلەر جازىلدى. وسىعان وراي، تengrinews.kz ءتىلشىسى توي يەلەرىمەن سۇحباتتاستى.
جۇرتتى قىزىقتىرۋ ماقساتىندا مۇنداي ۆيدەولاردىڭ سيپاتتاماسى اسىرا سىلتەپ جازىلاتىنى بار، وسى جاعدايدا دا شىندىققا جاناسپايتىن تۇستارىن ايتا كەتەيىك. اجەنىڭ جاسى 70-تە ەمەس، 80-گە تاياپ قالعان جانە ۇزاتىلىپ جاتقان جوق، "گاۋھار تويىن" اتاپ ءوتىپ جاتىر ەكەن.
جامبىل وبلىسى مويىنقۇم اۋدانى كوكتەرەك اۋىلىندا تۇراتىن وڭلاباي (ەل ىشىندە وڭتاي اتا) مۇلكىبايەۆ اتا بيىل 80-گە تولادى، ال قۇداي قوسقان جارى قوجاش قىزى تيىشكۇل اپامىزمەن وتاسقانىنا الپىس جىل بولعان ەكەن. توعىز ۇل ءبىر قىزدى دۇنيەگە الىپ كەلىپ، "ۇلدى ۇياعا، قىزدى قياعا" قوندىرعان زەينەتكەرلەردىڭ بالالارى، نەمەرەلەرى تۋىستارى وسى اتاۋلى مەرەيتويدى سالتاناتپەن وتكىزۋدى جوسپارلاپتى.
وڭتاي اتانىڭ ايتۋىنشا، توي سەكىلدى قاراپايىم وتكىزۋدى ويلاعان، الايدا كورشى اۋىلدا تۇراتىن قايىن جۇرتى، ياعني تيىشكۇل اپامىزدىڭ تۋىستارى تويعا ءبىر كۇن قالعاندا، "قىزدى ۇزاتامىز" دەپ ۇيلەرىنە الىپ كەتكەن. سونىمەن، وڭتاي اتا قۇداسىن جىگىت جولداس ەتىپ، اۋدان ورتالىعىنان ليمۋزين جالداپ، قىزدى الىپ كەتۋگە بارادى. ءتوس تارتۋ، ءىلۋىن بەرۋ (قالىڭ مال) تاعى باسقا ءسالت-داستۇردى ورىنداعاننان كەيىن، تيىشكۇل اپامىزدى سىڭسۋ ايتىپ ۇزاتادى. ءدال وسى ءساتتىڭ ۆيدەوسى جەلىلەردە تاراپ جاتىر ەكەن. مەيرامحاناعا بارار جولدا بينازار بابانىڭ باسىنا بارىپ ءتاۋ ەتكەن. سالتاناتتى شارانىڭ ارى قارايعى جالعاسى تويحانادا وتكەن.
ال ەندى وسى وقيعا الپىس جىل بۇرىن قالاي بولدى؟ وڭتاي اتا مويىنقۇم اۋدانىنداعى قۇموزەك اۋىلىندا دۇنيەگە كەلگەن. اسكەردەگى بورىشىن وتەپ كەلگەن سوڭ، اۋىلىندا 17 جاس شاماسىنداعى قىزدى كورەدى. بۇل بينازار اۋىلىنان اعاسىنىڭ ۇيىنە كەلگەن تيىشكۇل اپا بولاتىن.
"قالايدا وسى قوجاشتىڭ قىزىن الامىن" دەپ ءجۇرىپ، سونىڭ ناتيجەسىندە ۇيلەندىك. توي توبەنىڭ باسىندا ءوتتى. ول زاماندا سولاي وتەتىن. قايىناعاما ات مىنگىزدىم، ءبىراق بۇگىنگىدەي ۇلكەن توي جاساۋ مۇمكىن بولمادى" - دەيدى اقساقال.
وڭتاي اتا مال باعىپ، تراكتور جۇرگىزىپ، ەسەپشى (بۋحگالتەر) بولىپ جۇمىس ىستەگەن، كۇرەسپەن اينالىسقان. 1999 جىلى كوكتەرەك اۋىلىنا كوشىپ بارعان. زەينەتكە شىققان سوڭ، اۋىل يمامى بولعان. جارى دا، ءوزى دە قاجىلىققا بارىپ كەلگەن. بەس بالاسى الماتىدا تۇرادى ەكەن، ال قالعان بەسەۋى جامبىل وبلىسىندا. نەمەرەلەرى عابيدۋللا مەن جۇمادۋللا مۇلكىبايەۆتار كۇرەستەن حالىقارالىق جارىستا قازاقستاننىڭ نامىسىن قورعاپ ءجۇر.
بۇگىندە وڭلاباي اتا مەن تيىشكۇل اپانىڭ 32 نەمەرەسى، 11 شوبەرەسى بار.
قىركۇيەك ايىنىڭ ورتاسىندا وڭتاي اتانىڭ بالالارى ات شاپتىرىپ، كۇرەستەن جارىس وتكىزبەكشى.
