مەن قالاي الداندىم؟

مەن جۇمىس ىزدەيمىن دەپ وڭباي الداندىم... ءبىراق باسقا الدانعان ادامدارعا قاراعاندا، قۇدايعا شۇكىر، جاعدايىم ءتاۋىر. ستۋدەنت بولعاسىن جازعى دەمالىستا ۇيدە بوسقا جاتىپ ىشەر بولمايىن دەپ عالامتوردان جۇمىس ىزدەي باستادىم. ءبىر كەزدە «قازاق ءتىلىن بىلەتىن، ادامدارمەن تەز ءتىل تابىسا الاتىن جاس قىزمەتكەر كەرەك» دەگەن حابارلامانى وقىپ قۋانىپ كەتتىم. الدا مەنى نە كۇتىپ تۇرعانىن بىلمەگەندىكتەن تەز ارادا تەلەفون ءنومىردى تەرىپ، حابارلاسىپ ەم، مەنى سۇقباتتاسۋعا شاقىردى. ماعان ايتىلعان (الماتى قالاسى ساتپايەۆ كوشەسى 30ا/3، "ازيا پليۋس" كومپانياسى) مەكەنجايعا باردىم. ءوفيستىڭ ءىشى قۇجىناعان ادامدار، ءبىرى كىرىپ جاتىر، ەندى ءبىرى ايعاي شىعارۋدا. تۇك تۇسىنبەدىم. ماعان بەرىلگەن انكەتانى تولتىرىپ، مەنى قابىلداۋ كەرەك «باستىقتى» كۇتتىم. ەردەن ءوزىنىڭ وسى جەردە «باستىق» بولىپ جۇمىس ىستەيتىنىن، وزىنە قۇجاتتاردى رەتتەپ، تەلەفون قوڭىراۋلارىنا جاۋاپ بەرەتىن كومەكشى كەرەكتىگىن ايتتى. مەن ءۇشىن تىم وڭاي جۇمىستىڭ ايلىعى 120 000 بولدى. ءيا، مەن دە ءسىز سەكىلدى بۇل نە دەگەن باتپان قۇيرىق دەپ ويلادىم، الايدا ماعان قىزىق بولعانىن جاسىرمايمىن. الگى جىگىت مەنى بۇل قىزمەتكە يكەمدى ەكەنىمدى بايقاپتى-مىس. «ازيا پليۋس» كومپانياسىنىڭ Tiens Kazakhstan ج ش س كومپانياسىمەن سەرىكتەس ەكەنىن ايتتى. مەن Tiens (تيانشي) تۋرالى بۇرىن ەستىمەپپىن. سوندىقتان شوشىنا قويمادىم. ەردەن كەشكە ىرىكتەۋ كەزىندە ءوزىنىڭ باسشىلارىنا مەنى ماقتايتىنىن، بارىنشا وسى جۇمىستا قالدىراتىنىن ايتتى. مۇنىڭ «پسيحولوگيالىق شابۋىل» ەكەنىن كەيىن ءبىلدىم. كەشكە قاراي ماعان الگى باستىقسىماعىم حابارلاسىپ، مەنى قۇتتىقتادى. مەن جۇمىسقا قابىلدانىپپىن.

مەن قالاي الدادىم؟

ەرتەڭىنە ءتولقۇجاتىمنىڭ كوشىرمەسى مەن 3/4 سۋرەتىمدى اپارىپ، العاشقى سىناق مەرزىمىنە باردىم. جۇمىس ىستەيمىن دەپ بارىپ، لەكسيا تىڭداپ قايتىپ كەلدىم. العاشقى لەكسيادا قىتايداعى Tiens كومپانياسى تۋرالى تولىعىراق اقپارات ايتتى. كەشكە قاراي كومپانيا تۋرالى Google اتامنان سۇراپ، ىزدەپ ەدىم كوزىم شاراسىنان شىعىپ كەتە جازدادى. بارلىق پىكىرلەردى وقىپ شىقتىم، ءبارى بۇل كومپانياداعى قىزمەتكەرلەردىڭ الاياق ەكەنىن جازعان. الايدا پىكىر جازعانداردىڭ بارلىعى دەرلىك 1ء-شى سىناق مەرزىمىنەن كەيىن كەتىپ قالعان. سول سەبەپتى سىناق مەرزىمىنىڭ سوڭىنا دەيىن بارۋدى ءجون كوردىم. ايتەۋىر سوڭعى سىناق مەرزىمىندە ماعان بۇل كومپانيا ارقىلى تەز ءارى كوپ اقشا تابۋعا بولاتىنىن ايتتى. ءقازىر «بىرنەشە مىڭداعان قارىزى بار ادامنىڭ كوپ اقشانى ەستىپ الداناتىنى بەلگىلى دۇنيە»، - دەپ ءوزىمدى الداۋسىراتىنىم بار.

مەن بۇل كومپانيادان 70 000 تەڭگەگە تاۋار الدىم. ستۋدەنت بولساڭ، اقشانى قايدان الدىڭ دەگەن شىعارسىز ىشتەي. اقشانى ءبىر دوسىمنان سۇراي قويىپ ەدىم بىردەن بەرە قويدى. بۇل سايكەستىك ەمەس، قۇدايدىڭ سىيى شىعار دەپ، تالپىنىسىم ارتا ءتۇستى. ال ءقازىر كۇلكىم كەلەدى.

تاۋارلاردىڭ قاتارىندا دارى-دارمەك پەن شاشقا ارنالعان سۋسابىن، ءتىس پاستاسى بار. تاۋارلاردى العان سوڭ مەن دە ءوزىمدى الداعانداي وزگەلەردى الداي باستادىم. وزگەلەردى الداۋدان بارىنشا ساقتانۋعا تىرىساتىن مەن ءۇشىن بۇل وتە قيىنعا سوقتى. كەيىن ەردەننىڭ باسشىسى ءاليحان ماعان 1-2 ساعات لەكسيا وقىدى. ءتۇرلى مىسالدار كەلتىردى.  مەن سەندىم.  سەبەبى مەنى شاقىرعان جىگىت 500 مىڭ تەڭگەگە تاۋار الىپ، اقشانى 2-3 ايدىڭ ىشىندە قايتارىپ العانىن ايتقان. مۇنىڭ وتىرىك بولۋى مۇمكىن دەگەن وي دا كەلمەپتى. سول سەبەپتى مەن دە سەنىمدى تۇردە جۇمىس ىستەي باستادىم. كۇماندانا باستاعان كومانداداعى كەز-كەلگەن اداممەن ءاليحان سويلەسەتىن.

بۇل جەردە كىمدەر  جۇمىس ىستەيدى؟

بۇل كومپانيادا باسقا جۇمىس ىستەۋگە ەشقانداي مۇمكىندىگى جوق ادامدار ۇزاق ۋاقىت بويى جۇمىس ىستەيدى. ولار «ءبىز باسقالارعا قالاي تەز اقشا تابۋدىڭ جولىن كورسەتەمىز»، - دەپ وزدەرىن الداۋسىراتاتىن. جەلىلىك ماركەتينگتە اۋىر جۇمىس ىستەگىسى كەلمەيتىندەر، ديپلومى جوقتار مەن زەينەت جاسىنا جەتىپ جۇمىس تاپپاعاندار جۇمىس ىستەيدى.  مەن جۇمىس ىستەگەن وفيستەگىلەردىڭ كوبىسى ستۋدەنتتەر مەن زەينەتكەرلەر بولاتىن. ولاردىڭ باسقا تاڭداۋى جوق.

تەز اقشا تاپقىسى كەلەتىندەردى قالاي الدايدى؟

وفيستە ۇنەمى لەكسيا وقىلادى، الەمدىك دەڭگەيدە وزىندىك ورنىن قالىپتاستىرعان، تانىمال كاسىپكەرلەرىدىڭ كىتابىن جومارتسىماقتار 700 تەڭگەگە ساتادى. سونىمەن بىرگە ءجيى-جيى جيىندار وتكىزىلىپ، كوپ اقشا تاپقاندار وزدەرىنىڭ ومىرلىك ۇستانىمدارىمەن قاتار قانداي قيىندىقتار كورگەنىن ايتا باستايدى. بارلىعىنىڭ ايتاتىن ءبىر ءماتىنى بار. ولارعا بارلىعى ياعني دوستارى مەن وتباسى قارسى شىققان. ال ءقازىر بىرنەشە جىلدان كەيىن بۇل ولار وتباسىن دا، دوستارىنا دا ءوز شەشىمىنىڭ راس ەكەنىن دالەلدەگەن. وسى ءماتىن عانا بىردەي. كومپانيانىڭ بەلسەندىلەرىنىڭ ءبىرى Tiens كومپانياسىنىڭ ءدارىسى ارقىلى قاتەرلى ىسىكتى جەڭسە، ەندى ءبىرى اناسىن سول دارى-دارمەكپەن ەمدەپ ءجۇر. الايدا «دەنساۋلىقتى كۇتىپ ۇستاۋ ءۇشىن Tiens كومپانياسىنىڭ ءدارىسىن قابىلداۋ كەرەك»، - دەيتىندەردىڭ سىرتتا شىلىمدى بۋداقتاتا شەككەنىن كورگەندە كوڭىلگە كۇمان ۇيالايتىنى راس.  

ولار جۇمىستى باستاماس بۇرىن جۇمىس ىزدەپ كەلگەندەردەن العا قويعان ماقساتتارىنىڭ ءتىزىمىن جاساپ كەلۋدى تاپسىرادى. كەيىن پسيحولوگيالىق تۇرعىدا كەلگەن ادامداردىڭ ماقساتتارىن وزدەرىنە قارسى پايدالانادى. ياعني، مەن تەز ارادا كولىك الۋدى ماقسات ەتتىم. ولار ماعان «سەن مەملەكەتتىڭ جۇمىسىن ىستەپ ءجۇرىپ الداعى 10 جىلدا كولىك الا المايسىڭ، ال بىزدە جۇمىس ىستەسەڭ، 2-3 جىلدا كولىك جۇرگىزۋشىسى اتاناسىڭ»، - دەيدى. ياعني كەلگەن ادامداردىڭ ماقساتىن پايدالانىپ، پسيحولوگيالىق قىسىم جاسايدى.  

كەيىن مەن ەردەننىڭ سالعان اقشاسىنىڭ جارتىسىن دا قايتارا الماعانىن ەستىدىم. كۇن وتكەن سايىن ءبىر شىندىقتىڭ باسى كورىنىپ، وتىرىكتەرى اشىلا باستادى.

كەيىن بارلىعىنا قولىمدى ءبىر سىلتەدىم. ماعان ءبىر رەت وتىرىك ايتقان ادامنىڭ كەيىن دە الدايتىنىن باسىنان-اق تۇسىنگەنىمدە عوي. ءجا، وكىنگەنمەن مەن سالعان 70 مىڭ وزىمە قايتىپ كەلمەيتىنى تۇسىنىكتى. كومپانيادان شىققان سوڭ بارلىعىن وي ەلەگىنەن وتكىزدىم. ءوزىمدى گيپنوزدان ايىققان ادامداي سەزىندىم. ءوز-وزىمدى ءبىراز ۋاقىتقا دەيىن جوعالتىپ العانداي بولدىم. ءبىراق تەز وز-وزىمە كەلە الدىم. سەبەبى ءوزىم ارمانداعان ماماندىقتا قىزمەت اتقارىپ ءجۇرمىن. بۇل مەنى ۇزاق ۋاقىتتىق دەپرەسسيادان قۇتقاردى.

جەلىلىك ماركەتينگ ارقىلى اقشا تابۋعا بولا ما؟

ءيا، بولادى. مەنى بۇلاي ايتادى دەپ ويلاماعان شىعارسىز. الايدا مەن جەلىلىك ماركەتينگ ارقىلى اقشا تابۋعا بولمايدى دەپ ايتا المايمىن. ءبىراق قوماقتى قاراجات تابۋ ءۇشىن كومپانيانى دۇرىس تاڭداي ءبىلۋ كەرەك. سونىمەن بىرگە ءسىز تاڭداعان كومپانيانىڭ جۇمىس جۇيەسى دۇرىس بولعان ءجون. «بۇل جەلىلىك ماركەتينگ ەمەس»، - دەپ وزگەلەردى الداپ اقشا تاۋىپ جۇرسەڭىز، بۇل ۇزاققا سوزىلمايدى.

P/S: ادام ءوزىنىڭ سۇيىكتى جۇمىسىن ىستەپ ءجۇرىپ راحاتقا بولەنەدى، ال قۇر اقشا ءۇشىن جۇمىس ىستەسە، ەشقانداي پايدا جوق دەگەندى ءتۇسىندىم. جاي عانا ءوز ءىسىمىزدىڭ مامانى بولۋعا ۇمتىلساق، جاقسى قاراجات تابا الامىز جانە بۇل اقشا ءسىز ءۇشىن ادال بولادى. ەڭ باستىسى وسى ەمەس پە؟ اقشانىڭ ارتىنان قۋعاندار ءومىر بويى اقشاعا تويماي وتكەن. تەك اقىلدىلار عانا اقشا ءۇشىن ەمەس، اقشانى وزىنە جۇمىس ىستەتە الادى. مەن ءوزىمنىڭ قالاي الدانعانىمدى دا، قالاي الداعانىمدى دا، قانداي شەشىم قابىلداعانىمدى دا جازدىم. ال سىزدەر ءوز تاڭداۋلارىڭىزدى وزدەرىڭىز جاسارسىزدار. مۇمكىن تاڭداۋ جاساپ قويعان دا شىعارسىز... تەك وكىنبەڭىز!