جاس ءانشى، ءان وڭدەۋشى، قازاق ەستراداسىنداعى بىرنەشە حيت ءاننىڭ اۆتورى باقىتقالي قونىسبايەۆ بۇگىنگى زاماننىڭ «جىراۋى» جان احمادييەۆ ماعان قوقان-لوقى كورسەتىپ ءجۇر دەپ ينستاگرامدى شۋلاتتى. باقىتقالي قونىسبايەۆتىڭ ينستاگرام پاراقشاسىنا كىرىپ، ۆيدەونى كورۋگە اسىق بولدىق. «اتىپ كەتەمىن، مۇگەدەك جاعدايعا تۇسىرەمىن» دەگەن سوزدەر ەستىلەتىن ۆيدەونى ينستاگرامنان كورە الاسىزدار. ناقتى وقيعا باستالماس بۇرىن باقىتقالي قونىسبايەۆتىڭ كامەرانى ادەيى الدىن-الا ستۋديانىڭ قابىرعاسىنا ورنالاستىرىپ، قوناعىن اسىقپاي كۇتكەنى انىق بايقالادى.
ءىستىڭ ءمان-جايىن انىقتاۋ ءۇشىن ءتىلشىمىز باقتىقالي قونىسبايەۆتىڭ وزىنە حابارلاسىپ كوردى.
«بىرنەشە اي بۇرىن ءوزىنىڭ سۇراۋىمەن ءبىر ءان جازىپ بەردىم. العاش جازىپ بەرگەنىمدە كوڭىلىنەن شىققانداي بولىپ، راقمەتىن ايتتى. تويلاردا شىرقاپ ءجۇردى. مىنە، ءبىر اپتاعا جۋىقتاپ قالدى، ستۋدياعا كەلىپ نەمەسە تەلەفون شالىپ ءاننىڭ اقشاسىن قايتارىپ بەرۋىمدى تالاپ ەتەدى. ءتىپتى دورەكىلىك تانىتادى. "ۇرىپ كەتەمىن، سويتەمىن-بۇيتەمىن" دەپ قورقىتادى. مەنىڭشە، ول جاي اقشاسىن ءوندىرىپ الۋدى ماقسات ەتىپ وتىر»، - دەيدى باقىتقالي.
باقىتقالي قونىسبايەۆ جان احمادييەۆپەن ءبىرىنشى رەت شىعارماشىلىق بايلانىس ورناتۋى ەكەن. بۇعان دەيىن قايرات نۇرتاس، تورەعالي تورەالى سىندى حالىقتىڭ سۇيىكتى انشىلەرىنە ءان جازىپ جۇرگەن وڭدەۋشىنىڭ ەڭبەگىن بۇگىنگى زاماننىڭ «جىراۋى» ەش ەتكەنىنە باقىتقالي قاپالى. سەبەبى ءوزىنىڭ ارى تازا ەكەنىنە سەنىمدى. "ءان جازاردا قاتتى تەبىرەنەمىن. حالىقتىڭ كوڭىلىنەن شىقسا ەكەن دەپ ىشتەي تىلەيمىن. ءان حالىق ءۇشىن جازىلعاندىقتان جاۋاپكەرشىلىگىن جەتە تۇسىنەمىن»، دەپ قورىتتى باقىتقالي.
ۆيدەودان بۇرىن ءانشىنىڭ «جان احمادييەۆ دەگەن مال» دەگەن سوزدەردى تاقىرىپ ەتىپ الۋى نازارىمىزعا ءتۇستى. «مالىم-جانىمنىڭ ساداعاسى" دەيتىن قازاقپىز عوي، قاشاننان بەرى "مال" قورلاۋ سوزىنە اينالىپ كەتتى» دەپ ويلادىق، كوڭىلىمىزگە كىربىڭ ءتۇستى. بۇل، ارينە، ۇزاق اڭگىمەنىڭ ارقاۋىنا اينالار بولەك تاقىرىپ.
ەكى جاقتىڭ دا پىكىرىن بىلەيىك دەگەن ءتىلشىمىز جان احمادييەۆتىڭ وزىنە حابارلاسىپ كوردى. ءبىراق تەلەفونى، وكىنىشكە قاراي، ءسوندىرۋلى.
باقىتقالي قونىسبايەۆ انشىلەرگە ءان جازۋدان بولەك، جاستار اراسىندا ەندى عانا تانىلىپ كەلە جاتقان ءانشى. بۇعان قوسا فيلمدەرگە ارناپ ءان جازاتىنى تاعى بار ەكەن. ايتالىق، رەجيسسەر ەركىن راقىشيەۆتىڭ بارلىق فيلمدەرىنىڭ ساۋندترەگىن جازعان باقىتقالي قونىسبايەۆ ەكەن.
ال «جەزوكشەلەردى قامشىمەن ساباعان» جان احمادييەۆ ءوزىن بۇگىنگى زاماننىڭ جىراۋىنا تەڭەيدى. «زاماناۋي جىراۋ» دەگەن اتپەن تانىمال ول سوڭعى جىلدارى بىرنەشە مارتە حالىقتىڭ سىنىنا ۇشىراپ ۇلگەردى. ونى قولداۋشىلاردان گورى سىناۋشىلاردىڭ قاتارى كوپ. Youtube جەلىسىندە اۆتورلىق رەپتەرىنە بەينەباياندار ءتۇسىرىپ، قازاق حالقىنىڭ كوزىن اشۋدى نيەت ەتتى. الايدا «جاقسى نيەتپەن» باستالعان ءار ءىسى حالىقتىڭ قاھارىنا ۇشىراپ جاتتى. "قازاقپىز عوي" دەپ قازاق قوعامىنىڭ تۇيىتكىلدى ماسەلەلەرىن اشىق تۇردە جىرلاعان جان احمادييەۆتىڭ ءوز باۋىرىنا كەلگەندە قاتىگەزدەنۋى، البەتتە، كورەرمەن قاۋىمدى ويلاندىرماي قويماۋى مۇمكىن ەمەس. ءبىراق الدىن-الا تون پىشۋگە اسىقپايمىز. .
