اليمەنت وندىرە الماعان وتاعاسى. الماتى وبلىسىندا 4 بىردەي كامەلەتكە تولماعان بالاسىن ءوزى تاربيەلەپ وتىرعان ەركەك 5 جىل بۇرىن تاستاپ كەتكەن ايەلىنەن اليمەنت الا الماي وتىر. ءقازىردىڭ وزىندە، "كوكەك انانىڭ" بەرەشەگى 2 ميلليون تەڭگەگە جەتكەن ەكەن. الايدا، سوت شەشىمى بولا تۇرا باۋىر ەتى بالالارىنا ءبىر تيىن دا بەرمەگەن كورىنەدى. بۇل تۋرالى ەۋرازيا ءبىرىنشى ارناسى حابارلايدى.

اناسىنا حات جولداپ وتىرعان بۇل بۇلدىرشىندەر ونى سوڭعى رەت قاشان كورگەندەرىن ۇمىتقان.  ساعىنعاننان بولار، ءجيى تۇستەرىندە كورەتىندەرىن ايتادى. ءقازىر 4 بىردەي بالانى اكەسى مەن اجەسى باعىپ وتىر. انا جىلۋىن بەرە الماساق تا، قاتارىنان قالدىرماي، ءوسىرىپ كەلەمىز، دەيدى.  ۇل-قىزىنىڭ ىشىپ-جەمىنە جاۋاپتى وتاعاسى كەزەكتى رەت جۇمىس ىزدەپ كەتكەن ەكەن.

«4 جىلدان مىنە 7 اي استى جوق بولعانىنا. باسىندا جۇمىس ىستەپ، تابىس تاۋىپ كەلەم دەپتى. بۇل كۇيەۋىنە ايتقانى» - دەيدى اقىن سارا اۋىلىنىڭ تۇرعىنى ورىنباسار ساۋرىقوۆا.

ءىنى-قارىنداستارىنا  باس-كوز بوپ وتىرعان ءۇيدىڭ ۇلكەنى  8-سىنىپتا وقيدى. اناسىن ساعىنعانمەن، رەنىش پەن وكپەسى قارا قازانداي. سول سەبەپتى، ول تۋرالى ايتقىسى جوق.

«ۇيدەگى شارۋالار، ودان كەيىن سۋرەت سالام بوس بولسام، ءۇي جينايمىن. ءاليا مەن نۇرتاستىڭ ساباعىنا كومەكتەسەم كەشكە قاراي» - دەيدى زەينەپ نۇرزاتوۆا.

ءىزىم-عايىم جوق بولعان ايەل 5 جىلعا جۋىقتاسا دا باۋىر ەتى بالالارىن ىزدەمەك تۇگىلى قوڭىراۋ دا شالماپتى. العاشىندا وزىندىك سەبەپتەر بولعان بولار دەپ، "كوكەك انانىڭ" بۇل ارەكەتىنە وتباسى تۇسىنىستىكپەن قاراعان. الايدا، ۋاقىت وتە كەلە قايتىپ كەلمەيتىنىن سەزگەن سوڭ، ءوز بەتىنشە ىزدەۋگە تىرىسقاندارىن ايتادى. ناتيجە بولماعان سوڭ، وتاعاسى سوتقا اجىراسۋ تۋرالى ارىز جازىپ، اليمەنت تولەتۋدى سۇرايدى. سوت قوس بىردەي ءوتىنىشتى  قاناعاتتاندىرىپ، وڭ شەشىم شىعارعان كورىنەدى. الايدا،  3 جىل ىشىندە 2 ميلليون تەڭگەگە جۋىقتاعان اليمەنتتەن "كوكەك انا" بالالارىنا سوقىر تيىن دا بەرمەگەن ەكەن.

«ول ماعان ءبىر تيىن دا اليمەنت بەرمەدى. ەڭ بولماسا انالىق پراۆودان ايىرىلسىن. وكىمەتتىڭ بەرەتىنى بار عوي، ايتەۋىر، قاعاز، كىتاپتارىنا جەتسە. مەن بالادان بەزىپ وتىرعام جوق، وسىلاردىڭ جولىندا ولۋگە دايىنمىن» - دەيدى اقىن سارا اۋىلىنىڭ تۇرعىنى ورىنباسار ساۋرىقوۆا.

وبلىستاعى جەكە سوت ورىنداۋشىلارى ايەلدەرىنەن اليمەنت تالاپ ەتكەن ەركەكتەردىڭ سانى ارتىپ جاتقانىن ايتىپ وتىر. ماسەلەن، بيىلدىڭ وزىندە وندىرىستە 14 مىڭنان استام  اليمەنتتى ءوندىرۋ ءىسى قارالسا، سونىڭ ءبىراز بولىگى وتباسىن جالعىز اسىراپ وتىرعان ەركەكتەردىڭ ءوتىنىشى. دەگەنمەن، بورىشىن وتەۋدەن ايەلدەر دە ءجيى جالتارادى ەكەن. 

«اليمەنت مەندەتتى تۇردە ءبىرىنشى تولەنۋى كەرەك. ول - كامەلەتكە تولماعان بالالاردىڭ قۇقىعى، بىرىنشىدەن. ەكىنشىدەن، ءبىر اتا-انانىڭ ەكىنشىسىنىڭ الدىنداعى مىندەتى، سوتتىڭ شىعارعان بۇيرىعى بويىنشا مىندەتى. سول سەبەپتى، بورىشكەر ءوزىنىڭ مىندەتىن ورىنداماعانا جاعدايدا اكىمشىلىك كودەكستىڭ 169-بابى بويىنشا اكىمشىلىك جازاعا تارتىلادى» - دەيدى جەكە سوت ورىنداۋشى ەرمەك تازابەكوۆ.

اكىمشىلىك جازادان كەيىن دە ءتيىستى ناتيجە بولماسا ءىس قىلمىستىق اتقارۋ جۇيەسىنە وتەدى ەكەن. مۇنى ەسكەرسەك، 5 جىلعا جۋىق بوي كورسەتپەگەن انانى وتاعاسى پوليسياعا شاعىمدانۋ ارقىلى  قىلمىستىق جاۋاپقا تارتا الادى. بۇلاي بولعان جاعدايدا، "كوكەك انا" 2 جىلعا باس بوستاندىعىنان ايىرىلۋى مۇمكىن.