استاناداعى ەسىل اۋداندىق №2 سوتىندا قىزىلوردا وبلىستىق ءىىد باستىعى قايرات مۇحيتوۆتىڭ قىزى ماليكا مۇحيتوۆاعا قاتىستى قىلمىستىق ءىستىڭ سوتى باستالدى. ول ولجاس سۇلەيمەنوۆتىڭ نەمەرەسى قايتىس بولعان جول-كولىك وقيعاسىنا قاتىسى بار دەپ ايىپتالۋدا. بۇل تۋرالى NUR.KZ ءتىلشىسى حابارلادى.
اعىمداعى جىلدىڭ ماۋسىم ايىندا شەتەلدىك كولىك مىنگەن ماليكا مۇحيتوۆا موتوسيكلمەن كەلە جاتقان ەسكەندىر سۇلەيمەنوۆپەن سوقتىعىسقان. جاس جىگىت وقيعا ورنىندا كوز جۇمعان بولاتىن.
ماليكا مۇحيتوۆا سوتقا ءۇش ايەلمەن بىرگە كەلدى. ونىڭ قورعاۋشىسى دميتريي كۋرياچەنكو. ال جابىرلەنۋشى تاراپتى دامير ساعىنوۆ تانىستىرۋدا. ءىستى قارايتىن سۋديا قانات تاباعالي ۇلى.
ماليكا مۇحيتوۆا قىلمىستىق كودەكستىڭ 345 بابى بويىنشا ايىپتالۋدا. سوت وتىرىسىن اشىق دەپ جاريالاعان سۋديا ونىڭ اشىق رەجيمدە وتەتىنىن ءمالىم ەتتى.
وسىدان كەيىن ول ايىپتالۋشى تۋرالى مالىمەتتەردى وقىدى. ماليكا - 1989 جىلى تۋعان. تۇرمىس قۇرماعان. "سامۇرىق-قازىنا" اق-دا جوعارى اعا مەنەدجەر بولىپ قىزمەت ەتكەن.
ايتا كەتەيىك، سوت الدىندا ەكى تاراپتىڭ دا قورعاۋشىلارى قىلمىستىق ءىستى قاراۋدى كەيىنگە شەگەرۋ تۋرالى ۇسىنىس جاسادى. سەبەبى جابىرلەنۋشى جاقتان كۋاگەرلىك ەتەتىن ادامدار الىستان كەلە الماي قالعان. ال كۋرياچەنكو سوت وتىرىسىنا جول-كولىك وقيعاسى بولعان ورىندى تەكسەرگەن پوليسەي مەن مارقۇمدى قاراعان دارىگەرلەردىڭ جانە ەسكەندىر موتوسيكل ايداۋدى ۇيرەنگەن اۆتومەكتەپ وكىلدەرىن دە شاقىرتۋ كەرەك دەپ سانايدى.
"مەنىڭ قورعالۋشىم ءوز كىناسىن مويىنداپ، وكىنەتىنىن ايتىپ، شىعىندى تولىق وتەۋگە كەلىسكەنىمەن، ءالى ونىڭ ناقتى كولەمى ءالى انىقتالعان جوق"، - دەدى كۋرياچەنكو.
ادۆوكاتتىڭ سوزىنە سۇيەنسەك، مۇحيتوۆانىڭ جول-كولىك وقيعاسىنا قانداي جىلدامدىقپەن كەلىپ تۇسكەنى دە ءالى بەلگىسىز. سوندىقتان ول قوسىمشا اۆتو-فوتوتەحنيكالىق ساراپتاما جۇرگىزىپ، بارلىعىن ءجىتى انىقتاۋ قاجەت دەپ وتىر.
الايدا جابىرلەنۋشى تاراپ قوسىمشا ساراپتاما جۇرگىزۋگە قارسىلىق تانىتتى. سەبەبى ول ءۇش ايعا سوزىلعان سوتقا دەيىنگى تەرگەۋ كەزىندە ماڭىزدى ساراپتامالار جاسالىپ، ناتيجەسى ءىس ماتەريالىنا قوسىلعان.
"كۋاگەرلەرلەردى قايتا شاقىرتۋعا دا قارسىلىق بىلدىرەمىن. ولاردان جاۋاپ الىندى، ءىس ماتەريالىندا ولاردىڭ حاتتامالارى تۇر. سونى جاريا ەتۋدىڭ ءوزى جەتكىلىكتى دەپ سانايمىن"، - دەدى ساعىنوۆ.
مەملەكەتتىك ايىپتاۋشى دا قوسىمشا ساراپتامالار مەن كۋاگەرلەردى قايتا شاقىرتۋ ءىستىڭ ودان ءارى سوزىلىپ كەتۋىنە الىپ كەلەتىنىن ايتتى.
ناتيجەسىندە سوت ايپتالۋشى مەن جابىرلەنۋشى تاراپتىڭ جانە ارىزدا اتى اتالعان كۋاگەرلەردىڭ تولىق قۇرامدا قاتىسۋىمەن ءىستىڭ قايتا قارالاتىنىن ءمالىم ەتتى.
ەندى كەلەسى سوت وتىرىسى 17 قازاندا وتەتىن بولدى.
