حەلسينكيدە جۇمىسشىلار ءتۇس كەزىندە ءبىر ءسات مىزعىپ الادى. جۇمىس ۋاقىتىندا ۇيىقتاعانى ءۇشىن ەشكىم ولاردىڭ جالاقىسىن قىسقارتىپ، جۇمىستان شىعارمايدى. كەرىسىنشە، كومپانيا ۇيقى ءۇشىن جۇمىسشىلارعا اقشا تولەيدى. سەبەبى، فيندىك كاسىپوداق  تۇسكى ۇيقى قىزمەتكەرلەردىڭ جۇمىس بەلسەندىلىگىنە عانا اسەر ەتىپ قويماي، فيرمانىڭ قارجىلىق جاعدايىنا دا وڭ اسەرىن بەرەدى دەگەن ۇيعارىمعا كەلگەن.

ءتىپتى كەيبىر فيرمالار مەديتاسيا جاساۋدى ۇيرەتىپ، ءتۇس كەزىندە بارلىق جۇمىسشىنىڭ ۇيىقتاعانىن قاداعالايتىن مامان جالداعان.

♦فينليانديالىق قوراپ قازاقتىڭ ايەلدەرىنە كەرەك-اق

-جۇمىس ادامعا بوساڭسۋعا مۇمكىندىك بەرمەيدى، ءبىراق جاتتىقتىرۋشىنىڭ كومەگىمەن ءوزىڭدى ەركىن سەزىنە باستايسىڭ. بۇل جاعدايدا نۇسقاۋشىنىڭ كومەگى التىنمەن پارا-پارا. قىزمەتكەرلەرگە كىشىگىرىم ەڭبەك دەمالىسىن الۋعا كومەكتەسەدى-، - دەيدى Sofia Future Farm ورتالىعىنىڭ دەمالىستى ۇيىمداستىرۋشىسى تيينا ۆاينيو.

حەلسينكي كاسىپوداعى ءتۇرلى كومپانيا جۇمىسشىلارىنىڭ اراسىندا ساۋالناما جۇرگىزگەننەن كەيىن تۇسكى ۇيقىنىڭ پايدالى ەكەندىگى تۋرالى تۇجىرىمعا كەلگەن. ادامدار جۇمىستا قاتتى شارشايتىنىن، وتىرىپ ىستەيتىندىكتەن ارقا مەن بەلى اۋىراتىنىن ايتقان. سونىڭ سالدارىنان، ادامدار جۇمىستان تەزىرەك ۇيىنە قايتقىسى كەلەدى ەكەن.

فينليانديانىڭ فەدەرالدىق بۇقارالىق اقپارات قۇرالدارى حەلسينكيدەگى جاڭا ترەند تۋرالى جۇرتشىلىققا وسىلاي قۋانا حابارلاپ جاتىر.. جۋرناليستەر جاقىن ۋاقىتتا فينليانديانىڭ باسقا قالالارىندا دا جۇمىستا  ۇيىقتاۋعا رۇقسات بەرىلەتىنىن ايتادى.

دەمەك، بۇرىن ۇيقى ەرىنشەكتىكپەن بايلانىستىرىلسا، ءقازىر ادامنىڭ ەڭبەككە قابىلەتىن ارتتىرادى دەگەن تۇسىنىك قالىپتاسىپ كەلەدى.  

ال جۇمىستاعى ۇيقىعا بەرىلەتىن ۋاقىت  30 مينۋتتان 60 مينۋتقا دەيىن سوزىلاتىنىن ايتا كەتۋ كەرەك..

بۇعان دەيىن دە ەۋروپادا جۇمىسشىلاردىڭ ەڭبەك ونىمدىلىگىن ارتتىرۋ ماقساتىندا ءتۇرلى تاجىريبە جۇرگىزىلگەن. ماسەلەن، جۇمىس كۇنىن 5 كۇننەن 4 كۇنگە قىسقارتقان. سونىڭ ناتيجەسىندە جۇمىسشىلار جاقسىراق جۇمىس ىستەي باستاعان. كومپانيانىڭ كىرىسى ارتقان. 

ال قازاقستاندا جاعداي وزگەرەك. مۇندا جۇمىس بەرۋشىلەر قول استىنداعى قىزمەتكەرلەردىڭ جۇمىسقا ەرتە كەلىپ، كەش قايتۋىن قالايدى. الايدا قىزمەتكەرلەردىڭ ونداعى فيزيكالىق، پسيحولوگيالىق جاعدايىنا ونشا ءمان بەرە بەرمەيدى.