مەنىڭشە، وسى ءبىر ادەتكە اينالىپ بارا جاتقان جاعىمسىز ءۇردىستى توقتاتاتىن كەز كەلدى. اسقا بارساڭ دا، تويعا بارساڭ دا - ءقازىر ەكەۋى دە ءبىر. داستارحانعا قويىلعان تاماقتان ستول مايىسىپ تۇرادى. توي ما، قايعى ما، قارالى كۇن بە، بۇگىندە ءبارى ءبىر مەرەكە بولىپ قالدى. بۇل – اقيقات.
وسىنداي جايتتاردى كوزىمەن كورگەن بولۋى كەرەك، كەشە مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اليك شپەكپايەۆ ءوزىنىڭ Facebook-تەگى الەۋمەتتىك پاراقشاسىندا استا-توك تويدان باس تارتۋعا شاقىردى.
-ۇيلەنۋ تويلارىنان تۇسىرىلگەن بەينەباياندار الەۋمەتتىك جەلىلەردە ءجيى جاريالانادى. زال تولى – گۇل. توي ساحناسىندا – شوۋ-بيزنەس جۇلدىزدارى. 500-600 ادامداي قوناق. كەيىن انىقتالاتىنداي، ءبىر وڭىردەگى باسقارمانىڭ باسشىسى قىزىنىڭ نەمەسە ۇلىنىڭ ۇيلەنۋ-ۇزاتۋ تويلارىن تويلاپ جاتادى. بۇل بۇتىندەي ءبىر ۇردىسكە اينالدى، – دەدى اليك شپەكپايەۆ.
راسىندا دا بۇل ويلاناتىن جايت، بۇل ماسەلە ءبىرتالايدان بەرى ايتىلىپ تا كەلە جاتىر. ءبىراق وزگەرگەن تۇك تە جوق. ءقازىر توي دا، قازا دا، اس بەرۋ دە، ۇيلەنۋ تويى دا، ءتىپتى سۇندەت توي دا باسەكەگە اينالىپ بارادى. ىڭىرشىعى اينالىپ، كۇنىن كورە الماي وتىرعان كەدەي وتباسى دا، توي جاساۋعا قۇشتار. ۇيدەگى جۇمىس ىستەيتىنى، سوسىن نەسيە الادى. مۇنداي جاعدايدىڭ بارلىعى دا اسەر ەتەدى، تۇرمىسقا، وتباسىنا، الەۋمەتتىك جاعدايىنا. ءبىراق ماسەلەنى تۇسىنگەنمەن، داڭعويلىقتى توقتاتا المايمىز. نەگە؟ مۇمكىن مەملەكەتتىك دەڭگەيدە ءىس-قيمىل جاساۋ كەرەك شىعار. كورشىمىز وزبەك پەن تاجىكتەن نەگە ۇلگى المايمىز؟ مىسالى، وزبەك سەناتى ۇيلەنۋ تويلارى مەن قارالى جيىننان كەيىن بەرىلەتىن استى قالاي وتكىزۋ كەرەكتىگى جونىندە بۇكىلحالىقتىق تالقىلاۋعا سالىپ جاتىر. ەندى «وزبەك ەرەجەسى» بويىنشا ءبىرتالاي نارسەلەرگە شەكتەۋ قويىلادى.
- تويلارعا كەلەتىن ادامداردىڭ سانى 150 ادامنان اسپاۋى كەرەك.
- قارالى جيىنعا قاتىساتىندار سانى 200-دەن اسپاعانى دۇرىس.
- استا بەرىلەتىن پالاۋدىڭ مەرزىمى 12.00 –15.00 ساعات اراسىندا بەرىلۋى ءتيىس.
- جاس جۇبايلاردىڭ توي كورتەجى ەكى كولىكتەن اسپاۋى ءتيىس.
- تويعا ءبىر ءانشى نەمەسە ءبىر توپ قانا شاقىرىلادى.
- الداعى ۋاقىتتا 200 ورىننان ارتىق بانكەت زالدارىن سالۋعا رۇقسات ەتىلمەيدى.
- ەگەر بۇل تالاپتار جۇزەگە اسپاعان جاعدايدا ماسەلەنى ارنايى كوميسسيا تالقىعا سالادى.
- ەگەر تالاپ ورىندالماسا، ەرەجەنى بۇزعاندارعا تاعى ءبىر رەت ءتۇسىندىرۋ جۇمىستارى جۇرگىزىلەدى.
- ودان كەيىن ايىپپۇل سالىنادى.
♦دجوردج بۋش قىزىن قالاي ۇزاتتى ءھام قازاقشا "پونتتىڭ" "كاپۋت" بولاتىن كەزى كەلدى (فوتو)
♦شىمكەنتتە وتكەن تويداعى تورت قىزۋ تالقىعا ءتۇستى (فوتو، ۆيدەو)
♦"قاي بەتىمدى شىمشيىن". ورىستىڭ تويى "ورىس كەلىننىڭ" كوزىمەن
وزبەكستاننىڭ Podrobno.uz اقپارات اگەنتتىگى حابارلاعانىنداي، اتالعان ەرەجە ەلدىڭ قاراپايىم ازاماتتارى مەن بيزنەس وكىلدەرىنىڭ بارىنە دە بىردەي تەڭ جاعدايدا قولدانىلادى.
بۇدان بۇرىن دا وزبەكستاننىڭ پرەزيدەنتى شاۆكات ميرزيەيەۆ تە مەملەكەتتىك شەنەۋنىكتەرگە تويعا بارۋعا تىيىم سالعانى بەلگىلى.
–پرەمەر-مينيسترگە، حوكيمدەرگە، سونىمەن قاتار، اتقارۋشى بيلىكتىڭ وكىلدەرىنە تويعا بارۋعا قاتاڭ تۇردە تىيىم سالامىن. ەگەر سول كۇنى قانداي دا ءبىر مەملەكەتتىك مەكەمەنىڭ كولىگىن شايحانانىڭ ماڭىنان كورسەم، مىندەتتى تۇردە قىزمەتتەن بوساتامىن نەمەسە ول قىلمىستىق جاۋاپكەرشىلىككە تارتىلادى. مىسالى، تاشكەنتتە بەس بالاسى بار وتباسى قىزىن ۇزاتۋعا اقشا تاپپاي، نەسيە العان. بەلشەسىنەن قارىزعا باتتى. دەنساۋلىعىن قۇرتتى. اقىرى امالى تاۋسىلعان سوڭ ولگىسى كەلدى. مۇنداي توي كىمگە كەرەك؟!، –دەدى پرەزيدەنت شاۆكات ميرزيەيەۆ.
مىنە وزبەك وزگەرىپ جاتىر. تاجىك تە ىسىراپ اكەلەتىن تويلارعا تىيىم سالدى. قالاي ايتقاندا دا، قازاققا «وزبەك ەرەجەسى «كەرەك. ال ءبىز شە؟ قىزدىڭ جاساۋى مەن قۇدالىقتىڭ ءوزى تويعا كەتەتىن شىعىندى ەكى ەسە وراپ الادى. قازاقستاننىڭ ءىرى قالالارىندا 1000 ادامعا ارنالعان تويحانالار بار. بۇل –ابىروي! ءالى استا-توك توي جاساۋدى ماقتان كورەمىز. داڭعويلىقتى جانىمىز سۇيەدى. كىم توي جاساپ، تابىس تاپتى؟ توي – قۋانىش، ءبىراق – شىعىن. ولاي بولسا، ۇنەمدىلىكتى قاشان ۇيرەنەمىز؟ مۇمكىن بىزگە دە مەملەكەتتىك دارەجەدە توي مەن اسقا قاتىستى شىعىنداردى شەكتەۋ تۋرالى قاتاڭ شەشىم قابىلداۋ قاجەت شىعار...
بەرىك بەيسەن ۇلى
