كومسومولدىڭ 100 جىلدىعى الماتىدان باستاۋ العاننان كەيىن ايماقتارعا دا اۋىسا باستادى. ءقازىر جەر-جەردە قىزىل كومسومولدىڭ مەرەيتويى سالتاناتتى تۇردە تويلانىپ جاتىر. بارىنەن بۇرىن، موينىنا قىزىل گالستۋك بايلاپ العان بالالار كىمنىڭ تويى، بۇل جەردە كىمنىڭ مۇددەسى تۇرعانىن ءبىلىپ تە تۇرعان جوق. كەشەدەن قالعان امىرشىل-اكىمشىلىك كوممۋنيستىك جۇيەنىڭ جاندايشاپ بالاسى كومسومولدىڭ 100-گە تولعانى ەڭسەسىن كوتەرگەن ەلگە بۇگىن كەرەك پە، ەدى؟ «تاۋەلسىزدىك تۇعىرىمىزعا قوندى» دەپ قۋانىپ جۇرسەك، جاستاردىڭ كەشەگى «كوسەمدەرىن» اڭسايتىندار بار ەكەن. كەشە اتىراۋ وبلىستىق ىشكى ساياسات باسقارماسى وڭىردە كومسومولدىڭ 100 جىلدىعىن تويلاۋعا تىيىم سالدى. جاس ۇرپاقتىڭ ساناسىن ۋلاماي، ماسەلەنىڭ الدىن العانى ءۇشىن ۇلكەن راحمەت، ولارعا! ءبىراق...
بۇكىل الەۋمەتتىك جەلى شۋلاپ، جۇرتشىلىق الاڭداپ جاتقاندا، جەتىسۋ وڭىرىنە تاراپ جاتقان ايماقتىق باسىلىم بۇتىندەي ءبىر سانىنىڭ ءۇش بەتىن كومسومولدىڭ 100 جىلدىعىنا ارنادى. ەڭ وكىنىشتىسى سول، ەستىپ، بىلگەنىمىزدەي، «الاتاۋ» اتتى ايماقتىق گازەتتىڭ باس رەداكتورى ايتۋلى اقىن ايتاقىن بۇلعاقوۆ ەكەن. جۇرت قازاقتىڭ قانىن جۇكتەگەن كومسومولدان جەرىپ جاتقاندا، اتاقتى اقىن ايتاقىننىڭ «جەتىسۋ جاستارىنىڭ كوسەمدەرى» دەپ ايقارا بەتكە ماقالا باسقانى نەسى؟!
ارىپتەستەردەن سۇراپ بىلگەنىمىز، ايماققا تارايتىن «الاتاۋ» باسىلىمى «الماتى –بولاشاق» اكسيونەرلىك قوعامى تالدىقورعان فيليالىنىڭ گازەتى بولىپ شىقتى. ەڭ ءبىر قىزىعى، «جەتىسۋ جاستارىنىڭ كوسەمدەرىنىڭ» قاتارىندا الماتى وبلىستىق «نۇر وتان» پارتياسى فيليالى ءتوراعاسىنىڭ ءبىرىنشى ورىنباسارى عالياسقار سارىبايەۆ پەن وبلىستىق ىشكى ساياسات باسقارماسىنىڭ باسشىسى رۋستام الپىسبايەۆ تا سۋرەتتەرىمەن ءجۇر.
ءيا، ولار بۇرىن، ياعني كەڭەستىك كەزەڭدە كوممۋنيستىك جۇيەدە، كومسومولدا قىزمەت ىستەگەن شىعار. ءبىراق كومسومول مەن «نۇروتاندى» قيىستىرۋ قانشالىقتى قيسىنعا كەلەدى؟! بۇگىنگى جاس ۇرپاق قابىلداي المايتىن «ەلەسى» دە ەستە قالماعان وتكەن قوعامدى جاڭعىرتۋ كىمگە كەرەك؟
...نە جازساق تا، نە ىستەسەك تە، ويلانساق ەتتى؟!
