1 قاراشا كۇنى ءوڭىر اكتيۆىنىڭ جينالىسىندا اتىراۋ وبلىسىنىڭ اكىمى نۇرلان نوعايەۆ جاڭا ورىنباساردى تانىستىردى، دەپ حابارلايدى Qamshy.kz اقپارات اگەنتتىگى اتىراۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.

"ق ر پرەزيدەنتى اكىمشىلىگىنىڭ كەلىسىمىمەن جانە وبلىس اكىمىنىڭ وكىمىمەن نۇرلان باقتىباي ۇلى تاۋبايەۆ وبلىس اكىمىنىڭ جاڭا ورىنباسارى بولىپ تاعايىندالدى"، - دەدى نۇرلان نوعايەۆ.

اكىمنىڭ ورىنباسارى بولىپ تاعايىندالعان نۇرلان تاۋبايەۆتىڭ تۇرعىن ۇي-كوممۋنالدىق، اۆتوموبيل، قۇرىلىس سەكتورىنا جەتەكشىلىك ەتۋگە مۇمكىندىك بەرەتىن ۇلكەن جۇمىس تاجىريبەسى بار.

"مەن نۇرلان باقتىباي ۇلىنىڭ تاجىريبەسى مەن ءبىلىمى قويىلعان مىندەتتەردى جۇزەگە اسىرۋ ءۇشىن پايدالى بولاتىنىنا سەنىمدىمىن. ونىڭ ءۇش جوعارى ءبىلىمى بار. بيزنەس سالاسىندا جۇمىس ىستەدى. ق ر ۇلتتىق ەكونوميكا مينيسترلىگى تابيعي مونوپوليالاردى رەتتەۋ، باسەكەلەستىكتى جانە تۇتىنۋشىلاردىڭ قۇقىقتارىن قورعاۋ كوميتەتىنىڭ اتىراۋ وبلىسى بويىنشا دەپارتامەنتىندە ءارتۇرلى لاۋازىمداردا قىزمەت اتقاردى. 2015 جىلى وسى دەپارتامەنتتى باسقاردى. 2018 جىلدىڭ باسىنان وسى كۇنگە دەيىن اتىراۋ قالاسى اكىمىنىڭ ورىنباسارى قىزمەتىن اتقاردى. بۇل ءوڭىر ءۇشىن قاجەتتى جوبالاردى دامىتۋعا باعىتتالعان مىندەتتەردى ىسكە اسىرۋ ءۇشىن ونىڭ ءبىلىمى جەتكىلىكتى ەكەنىن كورسەتەدى"، - دەدى نۇرلان نوعايەۆ.

نۇرلان تاۋبايەۆ 1976 جىلى اتىراۋ قالاسىندا دۇنيەگە كەلگەن. اتىراۋ مۇناي جانە گاز ينستيتۋتىن، قازاقستان ەكونوميكا جانە قۇقىق ينستيتۋتىن، ح. دوسمۇحامەدوۆ اتىنداعى اتىراۋ ۋنيۆەرسيتەتىن تاۋ – كەن ينجەنەرى، زاڭگەر، ەكونوميست-مەنەدجەر ماماندىعى بويىنشا بىتىرگەن.

ەڭبەك جولىن 1995 جىلى "ەكسپرەسس-يۋگ" ج ش س ديرەكتورىنىڭ ورىنباسارى بولىپ باستاعان، 1998-2000 جىلدارى "دەنساۋلىق" ج ش س جانە "يسلام" ج ش س ديرەكتورى بولىپ جۇمىس ىستەگەن.

2000-2006 جىلدارى اتىراۋ قالاسىنىڭ تۇرعىن ۇي-كوممۋنالدىق شارۋاشىلىق، جولاۋشىلار كولىگى جانە اۆتوموبيل جولدارى ءبولىمىنىڭ باسشىسى، 2006-2008 جىلدارى باسەكەلەستىكتى قورعاۋ كوميتەتى اتىراۋ وبلىسىنىڭ مونوپوليالاردى رەتتەۋ باسقارماسىنىڭ باسشىسى قىزمەتتەرىن اتقاردى.

2008-2012 جىلدارى ق ر باسەكەلەستىكتى قورعاۋ اگەنتتىگىنىڭ (مونوپولياعا قارسى اگەنتتىك) اتىراۋ جانە ماڭعىستاۋ وبلىستارى بويىنشا ءوڭىرارالىق ينسپەكسياسىنىڭ باستىعى، ال 2012-2014 جىلدارى اتىراۋ وبلىسى بويىنشا مونوپولياعا قارسى ينسپەكسيانىڭ باسشىسى بولدى.

2014-2015 جىلدارى ق ر ۇلتتىق ەكونوميكا مينيسترلىگى تابيعي مونوپوليالاردى رەتتەۋ جانە باسەكەلەستىكتى قورعاۋ كوميتەتىنىڭ ستراتەگيالىق تالداۋ باسقارماسىنىڭ باس ساراپشىسى بولىپ جۇمىس ىستەدى.

2015-2017 جىلدارى ق ر ۇلتتىق ەكونوميكا مينيسترلىگى تابيعي مونوپوليالاردى رەتتەۋ جانە باسەكەلەستىكتى قورعاۋ كوميتەتىنىڭ اتىراۋ وبلىسى بويىنشا دەپارتامەنتىنىڭ باسشىسى قىزمەتىن اتقاردى.

2017 جىلدان 2018 جىلعى 15 اقپانعا دەيىن ق ر ۇلتتىق ەكونوميكا مينيسترلىگى تابيعي مونوپوليالاردى رەتتەۋ، باسەكەلەستىكتى جانە تۇتىنۋشىلاردىڭ قۇقىقتارىن قورعاۋ كوميتەتىنىڭ اتىراۋ وبلىسى بويىنشا دەپارتامەنتىنىڭ باسشىسى بولدى.

2018 جىلدىڭ 15 اقپانىنان بۇگىنگى كۇنگە دەيىن اتىراۋ قالاسى اكىمىنىڭ ورىنباسارى.