رەسەي ۋكراينانىڭ 322 ازاماتى مەن 68 كومپانياسىنا سانكسيا سالدى.

ەندىگى جەردە اتالعان ازاماتتار مەن كومپانيالاردىڭ ورىس جەرىندە قىزمەتى جۇرمەيدى، ولار الىس-بەرىس ساۋدامەن اينالىسا المايدى. سونداي-اق، كاپيتالىن جانە قارجىسىن سىرتقا شىعارا المايدى. قىسقاسى،  ەكونوميكاعا قيىن تيەيىن دەپ وتىر.

انىعىنا كەلگەندە، 322 ازامات ۋكراين ۇلتىنىڭ بايلارى  نەمەسە شەتەلدە تۇراتىن، ءبىراق وسى ەلدە ءوندىرىسى مەن كاسىبىن جالعاستىرىپ جاتقاندار.

ولاي بولسا،  ەندىگى جاعداي قالاي بولماق؟ ساراپشىلاردىڭ پىكىرى بۇعان قاتىستى ەكىگە ءبولىنىپ وتىر.

بىرىنشىدەن، كەيبىر  ساياساتكەرلەر «بۇدان ەڭ الدىمەن ۋكراينا ءوندىرىسى زارداپ شەگەتىنىن» ايتادى. ۋكراين ەكونوميسى ولەگ سوسكيننىڭ پىكىرىنشە،  «رەسەي نارىعىمەن تىكەلەي بايلانىسى بار كاسىپورىندارعا بۇل اۋىر تيەدى. ويتكەنى كوپتەگەن ءوندىرىس ورىندارى رەسەيدەن شيكىزات الادى.   دەمەك، ەندى الىس-بەرىس توقتايدى. مۇنىڭ بارلىعى دا ابدەن ويلاستىرىلىپ بارىپ ادەيى جاسالعان نارسە. سوندىقتان ءبىزدىڭ ءوندىرىستى جابۋ كەرەك نەمەسە باسقا جاقتان شيكىزات الۋدى قاراستىرعان ءجون».

ارينە، سانكسيا جەڭىل تيمەيدى. بۇدان ەڭ الدىمەن كاسىپورىندار مەن ونداعى جۇمىس ىستەيتىن ادامدار زارداپ شەگەدى. كەيبىر ساراپشىلار «وسى ۋاقىتقا دەيىن ۋكراينا تاراپىنىڭ ءار ءتۇرلى امال-تاسىلدەرىنە ماسكەۋ كوز جۇما قاراپ كەلدى. ولار ءتيىستى ادەپ شەڭبەرىنەن اسىپ كەتتى. «كوپ اسقانعا ءبىر توسقان». سوندىقتان كرەملدىڭ بۇل جاۋابى ەسكەرتۋ، ال كەلەسىسى ءتىپتى قاتاڭ بولادى» دەپ وتىر.

ەڭ ءبىر نازار اۋدارارلىق ماسەلە، رەسەي تاراپى دونباسس اۋماعىندا جۇمىس ىستەيتىن ءىرى  كاسىپكەرلەرگە سانكسيا سالماعان. ەندى بۇل جاعى ايتپاسا دا، تۇسىنىكتى. ويتكەنى، بۇل ايماقتاعى ءوندىرىس جۇمىس ىستەۋى كەرەك جانە قازىرگى ۋاقىتتا رەسەيمەن بايلانىسى جاندانىپ تۇر.

ءبىراق بۇدان باسقا تاعى ءبىر نارسە بار، كەلەر جىلى ۋكراينادا پرەزيدەنتتىك سايلاۋ وتەدى. رەسمي ماسكەۋ وسىعان وراي سانكسيانى ادەيى سالىپ وتىر. ويلاپ قاراڭىز، جاڭاعى سانكسيا سالىنعان 322 باي ازامات پەن 68 كومپانيانىڭ يەلەرى بۇعان قالاي قارايدى؟ ارينە، رەسەيدى، ەڭ الدىمەن ءپۋتيندى، اتالعان قاۋلىعا قول قويعان ۇكىمەت باسشىسى مەدۆەديەۆتى جاقتىرمايتىنى انىق. ال ەڭ باستىسى، ولاردىڭ ەل پرەزيدەنتى پەتر پوروشەنكوعا  جەك كورۋ سەزىمى كۇشەيەدى. بۇل پرەزيدەنتتىك سايلاۋ الدىندا ەلدەگى ساياسي كۇشتەردىڭ پوروشەنكوعا نارازىلىعىن ارتتىرادى. ويتكەنى ۋكراينانىڭ ءار پارتياسى مەن ساياسي ۇيىمدارىنىڭ ارتىندا ءىرى بايلار مەن داۋلەتتى كاسىپورىن يەلەرى تۇر. دەمەك، ولاردىڭ ساناسىندا «بۇگىنگى اۋىر جاعدايعا رەسەيدەن ىرگەسىن اۋلاق سالعان پوروشەنكو كىنالى» دەگەن ۇعىم پايدا بولادى. ءسويتىپ پرەزيدەنتكە ەلدە قارسىلىق قوزعالىسى ارتادى. مۇنى الدىن الا بولجاپ،  رەسەي تاراپى ادەيى جاساپ وتىر.

كەيبىر ساراپشىلار «پرەزيدەنتتىك سايلاۋدىڭ قارساڭىندا سالىنعان رەسەيلىك سانكسيا پەتر پوروشەنكونىڭ بەدەلىن ءتۇسىرۋ ءۇشىن جاسالدى» دەگەن ويدا. بۇل ەندى راس. بۇدان شىعاتىن قورىتىندى نە؟ ورىستىڭ ءبىرقاتار ساياساتتانۋشىلارىنىڭ بولجامىنشا،  «كەلەسى پرەزيدەنت «باتكوۆششينا» پارتياسىنىڭ ليدەرى ەليا تيموشەنكو بولۋى مۇمكىن». مۇنداي جاعدايدا، پوروشەنكوعا قاراعاندا بولاشاقتا ورىستاردىڭ تيموشەنكومەن كەلىسۋى وڭايىراق.

ءبىر قىزىعى، ۇكىمەت قاۋلىسىندا «ۋكراين تاراپى رايىنان قايتىپ، رەسەي وندىرىسىنە قاتىستى كەيبىر شەكتەۋلەردى الىپ تاستاسا، ءبىزدىڭ جاقتىڭ دا ويلانۋعا مۇمكىندىگى بار» دەلىنگەن.

بولجاپ بىلۋگە بولمايتىن ساياسات الاڭىنداعى جاعدايدى ءتۇسىنۋ ارينە قيىن. ءبىراق  بۇل جەردە ساياسي ويىنشىلار كوپ، ال زارداپ شەگەتىن حالىق...