نۇرسۇلتان نازاربايەۆ الىبەك دىنىشيەۆتىڭ قازاقستان مادەنيەتى مەن ونەرىن دامىتۋ جانە ىلگەرىلەتۋ ىسىندەگى ايرىقشا ءرولى مەن سىڭىرگەن ەڭبەگىن اتاپ ءوتتى، دەپ جازادى Qamshy.kz اقپارات اگەنتتىگى اقورداعا سىلتەمە جاساپ.

مەملەكەت باسشىسى حالىق ءارتىسىنىڭ استانا قالاسى مەن بۇكىل تاۋەلسىز قازاقستاننىڭ قالىپتاسۋ ۇدەرىستەرىنە كۋا بولىپ، بەلسەندى اتسالىسىپ كەلە جاتقانىن ايتتى.

نۇرسۇلتان نازاربايەۆ ءا.دىنىشيەۆتى ەلوردانىڭ 20 جىلدىعىنا وراي «استانا وپەرا» تەاترىندا قويعان كونسەرتىنىڭ تابىستى وتۋىمەن قۇتتىقتادى. 

حالىق ءارتىسى قازاقستان پرەزيدەنتىنىڭ شىعارماشىلىق سالاسىنداعى ساياساتىنا جانە مەملەكەتتىڭ ونەر قايراتكەرلەرىنە قولداۋ كورسەتىپ وتىرعانىنا ريزاشىلىق ءبىلدىردى.

– مەن استانانىڭ مەرەيتويىن اتاپ وتۋگە ۇلەس قوسۋدى پارىزىم دەپ بىلەمىن. ەگەمەن ەلىمىزدىڭ مادەنيەتىن قالىپتاستىرۋ كەزىندە سىزبەن بىرگە بولعانىمدى ماقتان ەتەمىن. بۇل جولدا كوپتەگەن قيىنشىلىقتار ەڭسەرىلدى. ءقازىر ءبارى تۇبەگەيلى وزگەردى، تەاترلارعا كەرەمەت جاعداي جاسالدى. «استانا وپەرا» – سونىڭ جارقىن مىسالى. ونىڭ ساحناسىندا ءان ايتۋ – زور قۋانىش، – دەدى ءا.دىنىشيەۆ.

كەزدەسۋ سوڭىندا نۇرسۇلتان نازاربايەۆ پەن الىبەك دىنىشيەۆ «ليۋبليۋ تەبيا، موي كراي رودنوي» ءانىنىڭ (ءسوزى – ي.نازاليەۆيچتىكى، مۋزىكاسى – گ.پودەلسكييدىكى) ءۇزىندىسىن ايتتى.