ۋكراينانىڭ تەرنوپول وبلىسىندا ورىس ءتىلىن كەز كەلگەن فورمادا قولدانۋعا موراتوريي قابىلداندى، دەپ حابارلايدى Qamshy.kz اقپارات اگەنتتىگى. 

ورىستار انا ءتىلىن "ۇلى ورىس ءتىلى" دەپ اتايدى. ارينە ءار ۇلت ءۇشىن ءوز انا ءتىلى ۇلى شىعار. الايدا ورىس ءتىلى بۇرىنعى سسرو-نىڭ قۇرامىندا بولعان ەلدەردە عانا قولدانىلادى. دەسەك تە، پوست كەڭەستىك مەملەكەتتەردە دە ورىس ءتىلىنىڭ قولدانىس اياسى جىلدان-جىلعا تارىلىپ كەلەدى. قاي ەل بولماسىن مەملەكەت تىلىنە باسىمدىق بەرىپ، ونىڭ مەرەيىن ۇستەم ەتۋ ءۇشىن بارىن سالۋدا. بۇرىن باۋىرلاس ەلدەر بولعان ۋكراينا مەن رەسەيدىڭ اراسىنداعى كيكىلجىڭنەن كەيىن ۋكراينا ورىس ءتىلىن مۇلدە ىعىستىرۋدى مىقتاپ قولعا الدى. 

بۇعان دەيىن مەكتەپتەردە ورىس ءتىلى ءپانىن الىپ تاستادى، لەنيننىڭ بارلىق ەسكەرتكىشىن قۇلاتتى. وسىلايشا كومسومولدى ەسكە سالاتىن بارلىق نىساننان قۇتىلدى. بيىل تەلەارنالارعا قاتىستى زاڭ قابىلداندى. وعان سايكەس، ۋكراينا تەلەارنالارىندا ەفير ۋاقىتىنىڭ 75% ۋكراين تىلىندەگى جوبالارعا بەرىلۋى ءتيىس.  ەندى، مىنە، ورىس تىلىنە موراتوريي جاريالاپ وتىر. 

ۋكراينانىڭ لۆوۆ وبلىسىندا ورىس ءتىلىن قولدانۋعا تىيىم سالىنعاندا رەسەيدىڭ سىرتقى ىستەر مينيسترلىگى سىن ايتقان ەدى. كوپ ۇزاماي ۋكراينانىڭ باسقا وبلىستارىندا دا ورىس ءتىلىن قولدانۋعا تىيىم سالىندى. 

«وبلىستىق كەڭەس، رەسەي ۋكراينا تەرريتورياسىندا باسقىنشىلىق ارەكەتىن توقتاتپايىنشا تەرنوپول اۋماعىندا كەز كەلگەن فورمادا ورىس ءتىلىن پايدالانۋعا تىيىم سالدى»، - دەلىنگەن وبلىستىق كەڭەستىڭ سايتىندا.

ۋكراينانىڭ ۇلتتىق ۇيىمىنىڭ 90 جىلدىعىنا وراي دەپۋتاتتار وسىنداي شەشىم قابىلداعان. رەسەي ۋكراينانىڭ ۇلتشىلدار ۇيىمىن ەكسترەميستىك دەپ تانىدى.

بۇعان دەيىن جيتومير وبلىستىق كەڭەستىڭ دەپۋتاتتارى دا ورىس ءتىلىن قولدانۋعا تىيىم سالعانىن ەستەرىڭىزگە سالايىق.