ۆاشينگتوندا شىعاتىن Diplomat گازەتىندە «نازاربايەۆتان كەيىن قازاقستاندى كىم باسقارادى؟» دەگەن ماقالا جاريالاندى. وندا قازىرگى ەل الدىندا جۇرگەن ساياساتكەرلەردىڭ قايسىسى نۇرسۇلتان نازاربايەۆتىڭ ورنىن باسۋى مۇمكىن ەكەنىن بولجاعان. ماقالانى ىقشامداپ، قازاق تىلىندەگى نۇسقاسىن نازارلارىڭىزعا ۇسىنامىز. 

"ەگەر نازاربايەۆ كەنەت ورنىنان كەتسە، ارى قاراي نە بولاتىنى بەلگىسىز. ونىڭ ورنىن كىم باسادى؟  قازاقستان سەكىلدى باسقارۋ جۇيەسى بار ەلدە بيلىكتىڭ اۋىسۋ پروسەسى قيىنعا تۇسەدى. ول جەتەكشى ساياساتكەر ويىنشىلارعا ءقاۋىپ توندىرەدى"، - دەپ جازادى اۆتور.  

ونىڭ ويىنشا، بيلىكتەگى ءاۋىس-تۇيىس شيەلەنىسكە، بيلىككە دەگەن قاتىگەز كۇرەسكە ۇلاسادى.  

«پيراميدانىڭ ەڭ جوعارى نۇكتەسىندە وتىرعاندار باس پايداسى ءۇشىن پروسەستى باقىلاۋعا الىپ، باسقارادى. سوندىقتان نازاربايەۆتىڭ ورنىنا كەلەتىن ادام قازىرگى جوعارىدا وتىرعان، راديكالدى وزگەرىستەر قىزىقتىرمايتىن ادام بولۋى مۇمكىن. مۇنداي كانديداتتار از»، - دەيدى اۆتور.

Diplomat-تىڭ پايىمداۋىنشا، بولاشاق پرەزيدەنت قاسىم-جومارت توقايەۆ، كارىم ءماسىموۆ، يمانعالي تاسماعامبەتوۆ، داريعا نازاربايەۆا نەمەسە تيمۋر قۇلىبايەۆ بولۋى مۇمكىن.

Diplomat پرەزيدەنت بولۋعا توقايەۆتىڭ مۇمكىندىگى كوبىرەك دەپ ەسەپتەيدى. سەبەبى، قازىرگى پرەزيدەنتپەن ءبىر جاعداي بولا قالعان جاعدايدا كونستيتۋسيا بويىنشا  پرەزيدەنتتىڭ ورنىن ۋاقىتشا سەنات ءتوراعاسى باسادى. دەسەك تە، اۆتور قاسىم-جومارت توقايەۆتىڭ ىشكى ساياساتتاعى تاجىريبەسىنىڭ ازدىعى مەن جاسى (65 جاس) ونىڭ ەڭ باستى كەمشىلىگى ەكەنىن ايتادى. 

ماقالادا اۆتور قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ ءتوراعاسى كارىم ءماسىموۆتى دە «نازاربايەۆ وتباسىمەن جاقسى قارىم-قاتىناسى» ءۇشىن پرەزيدەنت بولۋى مۇمكىن ادامداردىڭ تىزىمىنە قوسىپ وتىر. ونىڭ ەكونوميكالىق باسقارۋ جۇيەسىندەگى بىلىكتىلىگى جانە جۇڭگو مەن رەسەيدى جاقسى تانيتىنىن ارتىقشىلىعى رەتىندە باعالاپ وتىر. دەسە دە، ءماسىموۆتى بيلىكتىڭ ەڭ بيىك شىڭىنا وتىرعىزباۋى مۇمكىن ەكەنىن ايتىلادى.

«يمانعالي تاسماعامبەتوۆكە قازاقستاننىڭ كەلەسى پرەزيدەنتى بولۋى ءۇشىن بويىندا بارلىق قاسيەت بار. سول ءۇشىن دە ونىڭ پرەزيدەنت بولماي قالۋ مۇمكىندىگى جوعارى» دەپ جازادى Diplomat. باسىلىمدا تاسماعامبەتوۆ ۇكىمەتتە ماڭىزدى رول ويناسا دا، 2016 جىلى ونى كەنەتتەن رەسەيگە ەلشى رەتىندە جىبەرىلۋى ونىڭ پرەزيدەنت بولۋىنا كونستيتۋسيالىق تۇرعىدان كەدەرگى بولاتىنى ايتىلادى. سەبەبى، كونستيتۋسيا بويىنشا، پرەزيدەنت قازاقستاندا 15 جىلدان كەم ەمەس ۋاقىت تۇرۋى قاجەت.

قازاقستان پرەزيدەنتىنىڭ قىزى داريعا نازاربايەۆانىڭ پرەزيدەنت بولۋى مۇمكىندىگى از. اۆتور ونىڭ سەبەبىن ساياسي تاجىريبەسىنىڭ ازدىعى مەن جىنىسىن ايتادى. Diplomat-تا داريعا نازاربايەۆا پرەمەر-مينيستر نەمەسە مينيستر بولۋى مۇمكىن ەكەنى ايتىلادى.

«روزا وتىنبايەۆا ۋاقىتشا قىرعىز ەلىن باسقارسا دا، داريعا نازاربايەۆا اكەسىنىڭ قولداۋىنا قاراماستان روزا وتىنبايەۆانىڭ جاساعانىن قايتالاي المايدى. وتىنبايەۆا ورتالىق ازياداعى «ايەلدەرگە ۇلتتىق ساياساتتا ورىن جوق» دەگەن تۇسىنىككە كەرەعار كەلگەن ساياساتكەر. نازاربايەۆا رەسمي تۇردە پرەزيدەنتتىككە ءوز كانديداتۋراسىن ۇسىناتىن بولسا، وپپوزيسيا تاراپىنان قارسىلىققا تاپ بولىپ، ءوزىن قولدايتىندار از بولادى»، - دەپ جازادى Diplomat.