بالاباقشا تاربيەشىسى ۇيىقتاعىسى كەلمەگەن بالانىڭ ەركەلىگىن كوتەرە الماي، قيانات جاساعان ۆيدەوسىن بۇكىل قازاقستان بولىپ كورگەن ەدىك. الەۋمەتتىك جەلىنىڭ اۋقىمدىلىعىنىڭ ارقاسىندا تاربيەشىنىڭ ءاتى-جونى دە، وپىق جەگەن بالانىڭ اتا-اناسى دا تەز-اق تابىلدى. ءۇمىت ءپىرماحانوۆا ەسىمدى باقشا تاربيەشىسىنىڭ ۇيىقتاتۋ ادىس-تاسىلىنە قاتىستى ق ر زاڭناماسىنا سايكەس 140 باپتىڭ 2 تارماعى بويىنشا ءىس قوزعالعان بولاتىن. ەستەرىڭىزگە سالا كەتەيىك، 140 باپ «كامەلەتكە تولماعان ادامدى تاربيەلەۋ جونىندەگى مىندەتتەردى ورىنداماۋ» ماسەلەسىنە ارنالادى.
♦بالانى تۇنشىقتىرعان بەزبۇيرەك ايەل 3 جىلدان كەيىن قايتادان تاربيەشى بولا الادى
«بالاعا كۇش جۇمساعان ايەل زاڭعا سايكەس قالاي جازالانادى؟» دەگەن سۇراعىمىزعا باسپا ءسوز حاتشىسى ەكى جارىم اي بۇرىن بىلاي دەپ قىسقا-نۇسقا جاۋاپ قايىرعان بولاتىن: «زاڭعا سايكەس مىنانداي جازا تۇرلەرى تاعايىندالۋى مۇمكىن: 1) 300 ايلىق كورسەتكىشى كولەمىندەگى ايىپپۇل؛ 2)240 ساعاتتىق قوعامدىق جۇمىس؛ 3)72 تاۋلىككە تەمىر تورعا قامالۋ. ەڭ قىزىعى، 3 جىلدان كەيىن «تاربيەشى» قايتادان تاربيەشى بولىپ قىزمەتكە كىرىسۋگە تولىققاندى قۇقىلى ەكەن.
مىنە، كوپتەن كۇتكەن سوت پروسەسى تەمىرتاۋدا باستالىپ تا كەتتى. الايدا ءجابىر كورگەن قىزدىڭ ەت جاقىندارى بالانىڭ اتالمىش جاعدايدان كەيىن توماعا-تۇيىقتالىپ، ناشار ۇيىقتاپ جۇرگەنىن، ەرەسەكتەردەن قاتتى قورقىپ قالعانىن، ءتىپتى اشۋ-ىزاعا جاقىن بولىپ كەتكەنىن حابارلادى. سوتقا ۆيدەوداعى كورىنىس از بولىپ وتىر. تاربيەشىنى 72 ساعاتقا ەمەس، تولىققاندى جازا تارتقىزۋ ءۇشىن قارشاداي قىز ءبىر ايعا جالعىز ءوزى پسيحديسپانسەرگە جاتىپ، تەكسەرىلىپ شىعۋى ءتيىس ەكەن. سوندا عانا ولار بالاعا كەلتىرىلگەن قيان-كەسكى ارەكەتتىڭ سالدارىن دالەلدەي الادى ەكەن. سوندىقتان دا شاعىمدانۋشى اتا-انا تاربيەشىگە قاتىستى ءىستى باسقا باعىتقا بۇرىپ، ايەلدى قاتاڭ جازالاۋىن تالاپ ەتىپ وتىر. سەبەبى ءىستىڭ كۆاليفيكاسياسىن وزگەرتپەسە، تاربيەشى 75 كۇننەن كەيىن بوستاندىققا شىعادى.
بالانى تۇنشىقتارعان تاربيەشى ءۇمىت ءپىرماحانوۆا بولسا، وزىنە تاعىلعان بارلىق ايىپتارمەن كەلىسپەيتىندىگىن جەتكىزدى. ونىڭ ويىنشا، ول تەك مازاسىز بالانى ۇيىقتاتپاقشى بولعان. بالاعا ەشقانداي زيان كەلتىرمەگەن.
سوت-مەديسينالىق ساراپتاما ناتيجەسى ءالى بەلگىسىز. ونىڭ قورىتىندىسى ۇستىمىزدەگى جىلدىڭ 14 قاراشاسىندا بەلگىلى بولادى.
پىكىر قالدىرۋ