ار، ۇيات پەن ساتقىندىق اراسىنداعى ارپالىستا ادىلدىك ۇنەمى جەڭىسكە جەتە بەرمەيدى. ادام ىشىندەگى تولقىنىستا، مانساپ، اقشا، داڭققا دەگەن ماحاببات، ادامنىڭ ءناپسىسى قاراپايىم ادامي قاسيەتتەردى جىعىپ، قايتا بوي كوتەرمەيتىندەي باسىپ تاستايتىن جاعدايلار ءجيى كەزدەسەدى. كەشە الماتىدا وتكەن «ترەنينگ ليچنوستنوگو روستا» ءفيلمىنىڭ جابىق كورسەتىلىمىندە ءدال وسىنداي جاعدايدى باستان وتكەرگەن فيلم كەيىپكەرىنىڭ ارپالىسى سيپاتتالادى. ش. ايمانوۆ اتىنداعى «قازاقفيلم» كينوستۋدياسى تۇسىرگەن اتالمىش ءفيلمنىڭ رەجيسسەرى فارحات ءشارىپوۆ. ءفيلمنىڭ جابىق كورسەتىلىمىنە ب ا ق وكىلدەرى، ونەرتانۋشى، كينو سىنشىلار قاتىستى.
ق ر مادەنيەت جانە سپورت مينيسترلىگى تاپسىرىسى بويىنشا تۇسىرىلگەن «ترەنينگ ليچنوستنوگو روستا» ءفيلمىنىڭ اتاۋىنا قاراپ ترەنينگكە قاتىسىپ، ءومىرىن جاقسى جاققا وزگەرتە العان ادامنىڭ ءومىرى باياندالادى دەپ ويلاۋىڭ مۇمكىن. الايدا مۇندا مانساپقا قول جەتكىزىپ، جىلى كرەسلوعا وتىرۋ ءۇشىن ادامنىڭ قانداي قادام جاساۋىنا ءماجبۇر بولعانى سۋرەتتەلەدى.
«ءار ادامدا تاڭداۋ بار» دەگەن ءسوز ءجيى ايتىلادى. ادامنىڭ تاڭداۋى – ونىڭ بولمىسىن، ىشكى جان دۇنيەسىن ءدال سيپاتتايدى. كەيدە ومىردە ەكى جولدىڭ ءبىرىن تاڭداۋ كەرەك بولعاندا ادام وزىنەن ەشقاشان كۇتپەگەن قادام جاسايدى.
فيلمدە قوعامدا بار كوپتەگەن ماسەلەلەر قامتىلعان. وندا مانساپتا وسۋدە تانىس-تامىردىڭ ىقپالى، جالعىزدىق، قىز تاربيەسى، ادىلدىك ءۇشىن كۇرەستە كەيدە اقشا مەن داڭق سوت تارازىسىندا باسىم تۇسەتىنى، مەشىتكە بارىپ، ورازا ۇستايتىن ادامداردىڭ ءبارى بىردەي يماندى، قۇدايدان قورقادى دەگەندى بىلدىرمەيتىنى، بارىنەن بۇرىن ادامنىڭ ۇياتى الدىنداعى جاۋاپكەرشىلىگى كەيدە ناپسىدەن كەمشىن كەتەتىن تۇستارىن كورۋگە بولادى.
فيلمدە شىم-شىتىرىق وقيعا باياندالمايدى جانە ادەتتەگىدەي فيلمدە كوپ كەيىپكەر دە جوق. وقيعا ەكى اكتەردىڭ اينالاسىندا ءوربيدى. قالعاندارى جاناما كەيىپكەرلەر. كينو سىنشىلار كارتينادا باستى ءرولدى سومداعان دۋلىعا اقمولدا مەن ەرجان ءتۇسىپوۆتىڭ دۋەتىنە وڭ باعاسىن بەردى. ەكى اكتەردىڭ ءساتتى تاندەمىن وزدەرى كوپ جىلدىق تاجىريبەنىڭ ارقاسى ەكەنىن اتاپ ءوتتى.
فيلم ورىس تىلىندە، الماتى قالاسىندا تۇسىرىلگەن. جابىق كورسەتىلىمگە كەلگەن ونەرتانۋشىلار فيلمدە ءبىر اۋىز قازاقشا ءسوز بولماعانى فيلم باسقا قالادا وتكەندەي جانە ءفيلمنىڭ اياعى جوق سەكىلدى اسەر قالدىرعانىن ايتادى.
ءفيلمنىڭ جابىق كورسەتىلىمىنەن كەيىن فيلم رەجيسسەرى فارحات ءشارىپوۆ پەن ءفيلمنىڭ باستى كەيىپكەرلەرى دۋلىعا اقمولدا، ەرجان ءتۇسىپوۆ جابىق كورسەتىلىمگە كەلگەن قوناقتاردىڭ سۇراعىنا جاۋاپ بەردى.
دۋلىعا اقمولدا مەن ەرجان ءتۇسىپوۆ كوپ جىل م. اۋەزوۆ اتىنداعى قازاق دراما تەاترىندا جۇمىس ىستەگەنىن ايتا كەتۋ كەرەك.
«ترەنينگ ليچنوستنوگو روستا» ءفيلمى 23ء-شى حالىقارالىق پۋسان كينوفەستيۆالىنىڭ «ازيا كينوسىنا نازار سالۋ» باعدارلاماسىنا قاتىسقان.
ايتا كەتەيىك، فيلم 22 قاراشادان باستاپ ۇلتتىق پروكاتقا شىعادى.
