قازاقستان رەسپۋبليكاسى

سەنات دەپۋتاتتارىنا

    قۇرمەتتى حالىق قالاۋلىلارى! وسى حاتتى ءوز اتىمنان جانە بۇكىل جەلتوقساندىقتار اتىنان سىزدەرگە جولداپ وتىرمىن.

    الەمدە 200-دەن استام تاۋەلسىز مەملەكەتتەر بولسا، سولاردىڭ ءارقايسىسىنىڭ تاريحي وتپەلى كەزەڭى بار. سونىڭ ىشىندە ءبىزدىڭ حالقىمىزعا دا ەگەمەندىككە قول جەتكىزۋ وڭايعا تۇسكەن جوق. قازاق دالاسىندا 300-دەن استام ۇلكەندى-كىشىلى كوتەرىلىستەر مەن باس كوتەرۋلەر بولعان. ال سونىڭ بارلىعىنا دەرلىك نۇكتە قويعان الماتىداعى 1986 جىلعى بولعان جەلتوقسان كوتەرىلىسى بولدى. سودان بەرى ەلباسىمىز ايتقانداي: «الماتى – تاۋەلسىزدىكتىڭ التىن بەسىگىنە» اينالدى. بۇعان ەشكىم داۋ ايتا الماس دەپ ويلايمىز.

كەڭەس وكىمەتى تۇسىنداعى بيلىككە قارسى كەلۋ تۇگىلى، قارسى سويلەۋگە ەشكىمنىڭ ءداتى شىدامايتىن. سول بۇعاۋدان بوساۋعا، ەلىمىزدى بوداندىقتان قۇتقارۋعا قازاقتىڭ قارشاداي ۇل-قىزى باسىن بايگەگە تىكتى. قانشا بوزداق قىرشىن كەتتى. بۇعان تاريح كۋا، ءسىز بەن ءبىز كۋامىز.

    قايرات رىسقۇلبەكوۆ، ءلاززات اسانوۆا، ەربول سىپاتايەۆ، سابيرا، ت.ت. قانشا بەيكۇنا جاستار تەمىر تورعا قامالىپ، قانشاسى مۇگەدەك بولىپ قالدى، كەيبىر ۇل-قىزدارىمىز ءومىر بويى اتا-انا بولۋ باقىتىنان ايىرىلدى. ءيا، بۇل وسىنداي قيىندىقپەن كەلگەن تاۋەلسىزدىڭ ەدى.

    كەرەك دەسەڭىز، جەلتوقسان كوتەرىلىسى بىزگە عانا ەمەس، كەشەگى كەڭەس وداعى مەملەكەتتەرىنە دە ەگەمەندىك الىپ بەردى! ايتپاعىم، وسى جەلتوقسان كوتەرىلىسىنە دە 30 جىلدان اسىپ كەتتى. ءبىراق ءالى كۇنگە ءوزىنىڭ تاريحي جانە ساياسي باعاسىن (ستاتۋس) العان جوق. تاريحي وقيعالاردىڭ اراعا ۋاقىت تاستاپ بارىپ ءوز باعاسىن الىپ جاتاتىنى بار. الايدا قانمەن كەلگەن تاۋەلسىزدىكتىڭ ەشتەڭە تاۋەلدى بولماي، شىندىقتىڭ سالتانات قۇرعانىن قالايمىن.

    2016 جىلى استانا قالاسىندا جەلتوقساننىڭ 30 جىلدىعىنا ارنالعان حالىقارالىق عىلىمي كونفەرەنسيادا وتكەن ەدى. سوندا 10-نان استام مەملەكەتتەن عالىمدار،  ساياساتكەرلەر كەلدى. سول بۇكىل باسقا ەلدەن كەلگەن كىسىلەر ءبىر اۋىزدان جەلتوقساندى كوتەرىلىس دەپ مويىندادى. سوندا بۇكىل الەم باعاسىن بەرىپ وتىرعان جەلتوقساننىڭ باعاسىن نەگە ءبىزدىڭ مەملەكەت بەرمەيدى، مويىندامايدى.

قۇرمەتتى حالىق قالاۋلىلارى!

سىزدەردىڭ ۇلتجاندىلىقتارىڭىزبەن ادامي قاسيەتتەرىڭىزگە سەنە وتىرىپ ەلىمىزدىڭ زاڭ شاقىرۋشى ورگاننىڭ ءبىرى دەپ، جەلتوقساننىڭ تاريحي جانە ساياسي باعاسىن (ستاتۋس) بەرۋگە اتسالىسادى دەپ سەنىم ارتامىن.

 قۇرمەتپەن قۇدايشۇكىر راحماتۋللا ۇلى ابدۋللايەۆ