شىعىس قازاقستان وبلىسىنىڭ اكىمى دانيال احمەتوۆ قىتايدىڭ شىڭجان –ۇيعىر اۆتونوميالىق ايماعىندا ءجۇر. الايدا اكىمشىلىكتىڭ جۇمىس سايتىندا ايماق باسشىسىنىڭ قىتايعا بارعانى تۋرالى بىردە ءبىر اقپارات جوق. دانيال كەنجەتاي ۇلىنىڭ «قىتايشىلاپ»  كەتكەنىن بەيرەسمي اقپارات كوزدەرىنەن عانا ەستىدىك.  احمەتوۆ قىتايعا نە ءۇشىن باردى؟ ءبىراق ايماق باسشىسىنىڭ قايدا ساپارلاعانىن جۇرتشىلىققا جاريا ەتۋگە جاراماي وتىرعان اكىمشىلىكتىڭ بۇل سايتىنىڭ جۇمىسىن ءبىز ساپالى دەي المادىق.

رەسپۋبليكانىڭ اقپارات كوزدەرىنىڭ بارلىعى  دا ءۇنسىز. ءبىر جىلى حابار جوق. كۇمانىمىز قويۋلانا تۇسكەننەن كەيىن عانا بارىپ، اقىرى altaynews.kz پورتالى ءبىر اقپاراتتىڭ شەتىن شىعاردى. «باقساق باقا ەكەن» دەمەكشى، سويتسەك، احمەتوۆ قىتايمەن الىس-بەرىس، اۋىل شارۋشىلىعى سەكتورى،  ءونىمدى قايتا وڭدەۋ، ەكسپورت ماسەلەسىن شەشۋگە بارىپتى. د.سەرىكبايەۆ اتىنداعى شقمتۋ مەن شيحەسزى ۋنيۆەرسيتەتتەرى تەحنيكا سالاسىندا، ال س.امانجولوۆ اتىنداعى شقمۋ مەن ىلە پەدوگوگيكالىق ۋنيۆەرسيتەتى گۋمانيتارلىق عىلىم سالاسىندا جۇمىلا جۇمىس ىستەيتىن بولىپتى. ەڭ ءبىر نازار اۋدارارلىعى، ەكى ايماقتىڭ باسشىلىعى تەچەن – اياگوز باعىتىندا تەمىر جول سالۋ جايىن دا ءسوز ەتىپتى.  ءتىپتى شىڭجاڭ-ۇيعىر اۆتونومياسى پارتيالىق كوميتەتىنىڭ حاتشىسى چەن سيۋانگومەن اڭگىمە بارىسىندا دا وسى ماسەلە ءسوز بولعانعا ۇقسايدى.

ەكىجاقتى كەلىسىمگە دانيال احمەتوۆ ريزا بولعان بولۋى كەرەك، «ەكى تاراپتىڭ ەكونوميكاسىنا دا پايدالى جايلار ايتىلدى. تەمىر جولدىڭ قۇرىلىسى مەن اۋىل شارۋاشىلىعى جونىندەگى جوسپارلارىمىز وڭ ناتيجە بەرەدى دەپ سەنەمىز»،  –  دەپتى.

ءبىراق ءبىزدى الاڭداتقانى باسقا نارسە، سوڭعى بىرەر جىلدان بەرى  تورتكۇل دۇنيەنى الاڭداتىپ جاتقان قىتايداعى قازاق ماسەلەسى نەگە دانيال احمەتوۆتى تولعاندىرماعان؟ قاراپ، بارلاپ، زەرتتەپ شىقتىق. ول تۋرالى ءبىر اقپارات جوق. ءتىپتى احمەتوۆتىڭ ادامدارىنىڭ سوڭعى ءتورت جىلدا قىتايعا 16 رەت رەسمي ساپارمەن بارعانى تۋرالى اقپارات ءورىپ ءجۇر. ەڭ بولماسا، قىتايعا وسى سوڭعى بارعانىندا «قانداستارىمنىڭ ءحالى نەشىك؟» دەپ ءبىر جاعداي سۇراسا نەتتى؟ الدە جانايقايدان الىس-بەرىس جوعارى تۇر ما؟

 قازاقستانداعى قانداستار  شىرىلداپ شىڭجاڭ جاققا قارايدى؟ ال احمەتوۆ...

ۇمىتپاسام، وسىدان بەس اي بۇرىن احمەتوۆتىڭ  ورىنباسارى اسەم ءنۇسىپوۆا بۇكىل ەلىمىز 31 مامىر ساياسي قۋعىن-سۇرگىن قۇرباندارىن ەسكە الىپ، ازا تۇتىپ جاتقاندا،  جۇرتشىلىقتى قارالى كۇنمەن قۇتتىقتاپ، جاعامىزدى ۇستاتقان ەدى.  سول كەزدە سەمەيدەگى ءاليحان بوكەيحاننىڭ ەسكەرتكىشى الدىنا گۇل شوقتارىن قويعان اكىمنىڭ ورىنباسارى قاعازعا شۇقشيىپ، ورىس تىلىندە بايانداما جاساعان. اسەم بەك قىزى ءنۇسىپوۆا سوندا ءسوزىنىڭ سوڭىن «س پرازدنيكوم – 31 مايا!» دەپ اياقتاعان كورىنەدى. مۇنى zhasalash.kz گازەتىنىڭ سايتى كەزىندە جەتەر جەرىنە دەيىن جەتكىزىپ جازدى.

ءبىراق احمەتوۆتىڭ ورىنباسارىنىڭ سەمەيدەگى ءاليحاننىڭ ەسكەرتكىشىنىڭ الدىندا ىڭعايسىزداۋ ءسوز ايتقانىن حالىق ۇمىتا قويعان جوق. كەشە كەندى التاي ءوڭىرىنىڭ ءبىر اقپاراتتىق پورتالى بوكەيحاننىڭ  سول ەسكەرتكىشىنىڭ ماڭايىندا جالاڭاش قالپىمەن (بۇتىندا تەك ءتۇرسيى بار-رەد) گۇلزارمەن راحاتتانىپ كەلە جاتقان جاس جىگىتتىڭ ۆيدەوسىن جاريالادى. مۇنى قالاي تۇسىنۋگە بولادى؟! الاشتىڭ ارداقتىسى ءاليحان بوكەيحان احمەتوۆ باسقارعان ايماققا قاشانعى مازاق بولا بەرەدى؟ ەڭ قۇرىعاندا، قىتايعا ءتورت جىلدا 16 رەت بارعان دانيالدىڭ دەلەگاسياسى وڭىردەگى وسى كەلەڭسىزدىكتى تۇزەسە نەتتى؟!

وبلىستىق پوليسيا دەپارتامەنتىنىڭ باستىعى، پوليسيا گەنەرال-مايورى جاناربەك باقتىبايەۆتىڭ ايتۋىنشا، جاسالعان قىلمىس سانى جونىنەن شىعىس قازاقستان الماتى قالاسى، الماتى وبلىسى جانە استانا قالاسىنان كەيىنگى ءتورتىنشى ورىندا تۇر. بۇل دا قۋانا قوياتىن دەرەك ەمەس.

اltaynews.kz اقپاراتتىق پورتالى وتكەندە «وبلىس تۇرعىندارى جىل سايىن «اششى سۋعا» 30 ملرد تەڭگە شىعىندايدى» دەگەن اقپارات تاراتتى. سۇمدىق قوي. سوندا سالاۋاتتى ءومىر سالتىن ۇستانۋ تۋرالى پرەزيدەنتتىڭ تاپسىرماسى قايدا قالدى؟ بۇل ايماقتىڭ تۇرعىندارى سونشالىقتى ىشكىش دەۋگە اۋزىمىز بارمايدى. بۇل دەرەك راس بولسا، شاكارىم مەن اباي، ورالحان بوكەي مەن قاليحان ىسقاق تۋعان ولكەگە قاتىستى مۇنداي كەلەڭسىز جايتتى ايماق باسشىسى  احمەتوۆ وسى ۋاقىتقا دەيىن نەگە تۇزەي الماعان؟!  

ءقازىر قىتايداعى قانداستاردىڭ ماسەلەسىمەن  قازاقستاننىڭ سىرتقى ىستەر مينيسترلىگى بارىنشا اينالىسىپ جاتىر. كەيبىر جايتتاردىڭ ءتۇيىنى دە شەشىلدى. مينيستر قايرات ءابدىراحمانوۆ وسىدان بىرنەشە اپتا بۇرىن قحر-دىڭ قازاقستانداعى توتەنشە جانە وكىلەتتى ەلشىسى چجان سياونى قابىلداعان كەزدە دە وسىنى اشىق ايتتى. ءبىراق بىزگە مينيستر قايراتتىڭ عانا ەمەس، ماسەلەنى بىرىگىپ شەشۋگە ۇمتىلاتىن بۇكىل قارا قازاقتىڭ قايسارلىعى كەرەك.

قازاقتىڭ جانىن قازاق قانا تۇسىنەدى. قانداستاردىڭ جانايقايى بۇل اششى شىندىق. بۇل ماسەلە ءقازىر بىرىككەن ۇلتتار ۇيىمىنىڭ مىنبەرىنەن، ەۋروپا پارلامەنتىنەن ءجيى كوتەرىلە باستادى. ال «اق جول» پارتياسى ايتقان اقيقاتتى قىتايعا بارىپ تۇرىپ نەگە احمەتوۆ ايتا المايدى؟!

...ءبىزدى ويلاندىرعان وسى ساۋال ەدى.

ەركىن قالدان